4.1. Kunsiderazzjonijiet ġenerali

Dan it-titolu jispeċifika kriterji għall-valutazzjoni tal-mudell tan-negozju u l-istrateġija tal-istituzzjoni. L-għan ta’ din il-valutazzjoni mill-awtoritajiet kompetenti huwa li jinkiseb fehim komprensiv – kemm fil-perspettiva kurrenti kif ukoll prospettiva – tal-operazzjonijiet tal-istituzzjoni, li jiġu identifikati vulnerabbiltajiet sinifikanti eżistenti jew potenzjali li huma l-aktar probabbli li jkollhom impatt materjali fuq l-istituzzjoni, u li tiġi vvalutata s-solidità globali tal-mudell tan-negozju u tal-istrateġija tagħha. Wara din il-valutazzjoni, l-awtoritajiet kompetenti għandhom jiddeterminaw:

• a. il-vijabbiltà tal-mudell tan-negozju kurrenti tal-istituzzjoni, imkejla fuq il-kapaċità tagħha biex tiġġenera redditi aċċettabbli matul it-12-il xahar sussegwenti;
• b. is-sostenibbiltà tal-istrateġija tal-istituzzjoni, fuq il-bażi tal-kapaċità tagħha li tiġġenera redditi aċċettabbli fuq perjodu prospettiv ta’ mill-anqas 3 snin, kif jirriżulta mill-pjanijiet strateġiċi u l-projezzjonijiet finanzjarji tagħha.

L-awtoritajiet kompetenti għandhom jużaw l-eżitu tal-BMA biex jappoġġaw il-valutazzjoni tal-elementi l-oħrajn kollha tal-SREP. L-awtoritajiet kompetenti jistgħu jivvalutaw aspetti speċifiċi tal-BMA, b’mod partikolari l-valutazzjoni kwantitattiva tal-mudell tan-negozju, bħala parti mill-valutazzjoni ta’ elementi oħrajn tal-SREP (eż. il-fehim li l-istruttura ta’ finanzjament tista’ tkun parti mir-riskji għall-valutazzjoni tal-likwidità).

L-awtoritajiet kompetenti għandhom jieħdu inkunsiderazzjoni r-riskji ambjentali, soċjali u ta’ governanza (ESG), filwaqt li jagħtu prijorità lit-tranżizzjoni ambjentali u r-riskji fiżiċi, meta jwettqu l-BMA, bil-għan li jivvalutaw l-implikazzjonijiet strateġiċi u prudenzjali ta’ dawn ir-riskji għall-mudell tan-negozju tal-istituzzjoni fuq perjodu ta’ żmien qasir, medju u twil.

L-awtoritajiet kompetenti għandhom jużaw ukoll l-analiżi tal-mudell tan-negozju biex jivvalutaw l-implikazzjonijiet prudenzjali tar-riskji tal-ML/TF, marbuta mal-mudell tan-negozju tal-istituzzjoni. F’dan ir-rigward, l-awtoritajiet kompetenti għandhom jużaw l-input li jirċievu mis-superviżuri fil-qasam tal-AML/CFT biex jikkomplementaw is-sejbiet tagħhom minn superviżjoni kontinwa u jevalwaw jekk jagħtux lok għal tħassib prudenzjali relatat mar-riskju tal-ML/TF. Meta l-valutazzjoni tindika li l-mudell tan-negozju tal-istituzzjoni jwassal għal tħassib prudenzjali relatat mar-riskju tal-ML/TF, l-awtoritajiet kompetenti għandhom jikkondividu l-eżitu tal-valutazzjoni prudenzjali tal-mudell tan-negozju mas-superviżuri fil-qasam tal-AML/CFT¹⁶ .

¹⁶ F’konformità mal-Linji Gwida tal-EBA dwar il-Kooperazzjoni fil-qasam tal-AML/CFT (EBA/GL/2021/15).

Biex iwettqu l-BMA, l-awtoritajiet kompetenti għandhom jużaw tal-anqas is-sorsi ta’ informazzjoni kwantitattiva u kwalitattiva li ġejjin:

• a. pjan(ijiet) strateġiku/strateġiċi tal-istituzzjoni bi previżjonijiet għas-sena kurrenti u prospettivi, u suppożizzjonijiet ekonomiċi sottostanti;
• b. rapportar finanzjarju (eż. profitt u telf - P&L, divulgazzjonijiet fil-karta bilanċjali);
• c. rapportar regolatorju (COREP, FINREP u reġistru ta’ kreditu, fejn disponibbli);
• d. rapportar intern (informazzjoni ta’ ġestjoni, inkluż – fejn disponibbli – il-kontribut għall-profittabbiltà skont il-linji operatorji, l-ippjanar tal-kapital, ir-rapportar tal-likwidità, ir-reżiljenza operazzjonali, ir-rapporti interni dwar ir-riskju);
• e. pjanijiet ta’ rkupru;
• f. pjanijiet ta’ riżoluzzjoni, inkluż ix-xogħol u l-eżitu tal-valutazzjoni tar-riżolvibbiltà pprovduta mill-awtorità ta’ riżoluzzjoni f’konformità mal-Artikolu 14 tad-Direttiva 2014/59/UE;
• g. il-pjan tal-istituzzjoni biex tindirizza r-riskji tal-ESG, li għandu jiġi ppreparat f’konformità mal-Artikolu 76(2) tad-Direttiva 2013/36/UE;
• h. rapporti ta’ partijiet terzi (eż. rapporti tal-awditjar, rapporti minn analisti ta’ ekwità/kreditu);
• i. studji/stħarriġiet makroprudenzjali jew dwar l-istabbiltajiet finanzjarji rilevanti oħra (eż. mill-Fond Monetarju Internazzjonali - IMF, l-awtoritajiet u l-istituzzjonijiet makroprudenzjali, l-istituzzjonijiet Ewropej).