4.2. Réimsí fócais an BMA a shainaithint

I gcomhréir leis an tsamhail rannpháirtíochta atá leagtha amach i dTeideal 2, ba cheart d'údaráis inniúla a n-anailís a dhíriú ar na réimsí measúnaithe is ábhartha do shamhail ghnó na hinstitiúide. Féadfar raon feidhme agus doimhneacht an BMA a dhifreáil ag brath ar líon agus ar chineál na n-athbhreithnithe maoirseachta a rinneadh roimhe seo ar an institiúid sin. Ba cheart go gcuirfeadh an measúnú seo ar chumas údarás inniúil, i gcás ar bith, teacht ar thuairim ar inmharthanacht agus inbhuanaitheacht shamhail ghnó na hinstitiúide foriomláine.

Ba cheart d’údaráis inniúla teacht ar thuairim maidir le hábharthacht na n-athruithe ar shamhail ghnó na hinstitiúide i gcomparáid le hathbhreithniú maoirseachta roimh ré, d’fhonn raon feidhme agus doimhneacht a measúnaithe a chinneadh agus a mhéid is féidir an measúnú maoirseachta roimh ré a úsáid mar bhonnlíne leis an measúnú nua. Agus na húdaráis inniúla ag teacht ar thuairim den sórt sin, ba cheart doibh, go háirithe, breithniú a dhéanamh ar cibé acu an ndearnadh nó nach ndearnadh athruithe ábhartha sna réimsí seo a leanas den institiúid:

• a. an plean straitéiseach a cuireadh in iúl agus a ndearnadh measúnú air roimhe sin;
• b. struchtúr agus comhdhéanamh an chláir chomhardaithe, lena n-áirítear athruithe ar fhoinsí brabúis agus a gcomhchruinniú, fás sócmhainní, athruithe ar struchtúr na ndliteanas, nó athrú ar na táscairí airgeadais agus riosca ábhartha, agus torthaí an fhaireacháin ar tháscairí a leagtar amach i dTeideal 3 a mheas;
• c. rialachas agus oibríochtaí, lena n-áirítear éadálacha, cumaisc nó dífheistiú eintiteas eile, oscailt nó scor línte gnó nó margaí geografacha chomh maith le hathruithe ar bhonneagar TF.

Na línte gnó is tábhachtaí a shainaithint

Ba cheart do d'údaráis inniúla measúnú ábharthachta a dhéanamh ar línte gnó na hinstitiúide chun na príomhréimsí a shainiú ar cheart don BMA díriú orthu. Agus an measúnú seo á dhéanamh, ba cheart d’údaráis inniúla a chur san áireamh:

• a. ábharthacht na ngnéithe gnó maidir le brabúis/caillteanais a ghiniúint, lena n-áirítear na tíortha geografacha, na fochuideachtaí/craobhacha agus na línte táirgí is ábhartha bunaithe ar a gcuid rannchuidithe leis an ioncam/na costais foriomlána sa chuntas brabúis is caillteanais, riosca (e.g. bunaithe ar TREA nó ar thomhais riosca eile) agus/nó tosaíochtaí eagraíochtúla/reachtúla (e.g. oibleagáidí sonracha ar bhainc earnála poiblí táirgí sonracha a thairiscint);
• b. torthaí maoirseachta roimhe seo, lena n-áirítear iad siúd a eascraíonn as cigireachtaí ar an láthair – i gcás inar féidir leis na torthaí sin táscairí a sholáthar ar línte gnó a bhfuil imscrúdú breise ag teastáil ina leith – chomh maith le torthaí agus barúlacha ó thuarascálacha iniúchóireachta inmheánacha nó seachtracha – cibé ar shainaithin an fheidhm iniúchóireachta inmheánaí saincheisteanna sonracha maidir le hinbhuanaitheacht nó inmharthanacht línte gnó áirithe;
• c. torthaí na n-athbhreithnithe maoirseachta téamacha – cibé ar nochtadh in anailís ar fud na hearnála saincheisteanna bunúsacha coiteanna a spreagann anailís bhreise a bhaineann go sonrach leis an institiúid;
• d. an tábhacht a bhaineann le pleananna straitéiseacha – cibé acu atá nó nach bhfuil línte gnó ann ar mian leis an institiúid iad a mhéadú, nó a laghdú go suntasach;
• e. piar-chomparáidí – cibé ar fheidhmigh líne ghnó go neamhthipiciúil (an raibh sí lasmuigh den choitiantacht) i gcomparáid le piaraí, i gcás ina bhfuil faisnéis den sórt sin ar fáil d’údaráis inniúla. Chun piaraí ábhartha don BMA a shainaithint, ba cheart d’údaráis inniúla breithniú a dhéanamh ar na línte táirge/gnó iomaíocha a dhíríonn ar an bhfoinse chéanna brabúis/custaiméirí, ar na córais rialála agus ar na rioscaí geopholaitiúla a bhaineann le suíomh na n-oibríochtaí chomh maith le tosca eile atá oiriúnach don earnáil ina n-oibríonn an institiúid.