4.2. Identifikazzjoni tal-oqsma ta’ fokus għall-BMA

F’konformità mal-mudell ta’ involviment stabbilit fit-Titolu 2, l-awtoritajiet kompetenti għandhom jiffokaw l-analiżi tagħhom fuq l-aktar oqsma ta’ valutazzjoni materjali għall-mudell tan-negozju tal-istituzzjoni. L-ambitu u l-profondità tal-BMA jistgħu jiġu differenzjati skont l-għadd u n-natura tar-reviżjonijiet superviżorji diġà mwettqa fuq dik l-istituzzjoni. Din il-valutazzjoni għandha fi kwalunkwe każ tippermetti lill-awtoritajiet kompetenti jiffurmaw perspettiva dwar il-vijabbiltà u s-sostenibbiltà ġenerali tal-mudell tan-negozju tal-istituzzjoni.

L-awtoritajiet kompetenti għandhom jiffurmaw perspettiva dwar il-materjalità tal-bidliet fil-mudell tan-negozju tal-istituzzjoni meta mqabbla mar-rieżami superviżorju preċedenti, sabiex jiddeċiedu dwar l-ambitu u l-profondità tal-valutazzjoni tagħhom u dwar il-punt sa fejn il-valutazzjoni superviżorja preċedenti tista’ tintuża bħala linja bażi għal dik ġdida. Fil-formazzjoni ta’ din il-perspettiva, l-awtoritajiet kompetenti għandhom, b’mod partikolari, jikkunsidraw jekk kienx hemm bidliet rilevanti fl-oqsma li ġejjin tal-istituzzjoni:

• a. il-pjan strateġiku li ġie kkomunikat u vvalutat qabel;
• b. l-istruttura u l-kompożizzjoni tal-karta bilanċjali, inklużi l-bidliet fis-sorsi tal-profitt u l-konċentrazzjoni tagħhom, it-tkabbir tal-assi, il-bidliet fl-istruttura tal-obbligazzjonijiet, jew il-bidla fl-indikaturi finanzjarji u tar-riskju rilevanti, u jikkunsidraw ir-riżultati tal-monitoraġġ tal-indikaturi deskritt fit-Titolu 3;
• c. governanza u operazzjonijiet, inklużi akkwisti, fużjonijiet jew divestimenti ta’ entitajiet oħrajn, il-ftuħ jew il-ħruġ ta’ linji operatorji jew swieq ġeografiċi kif ukoll bidliet fl-infrastruttura tal-IT.

Identifikazzjoni tal-linji operatorji l-aktar importanti

L-awtoritajiet kompetenti għandhom iwettqu valutazzjoni tal-materjalità tal-linji operatorji tal-istituzzjoni biex jiddeterminaw l-oqsma ewlenin li l-BMA għandha tiffoka fuqhom. Meta jwettqu din il-valutazzjoni, l-awtoritajiet kompetenti għandhom iqisu:

• a. ir-rilevanza tal-linji operatorji f’termini tal-ġenerazzjoni ta’ profitti/telf, inklużi l-ġeografiji, is-sussidjarji/il-fergħat u l-linji tal-prodotti li huma l-aktar materjali abbażi tal-kontribuzzjoni tagħhom għad-dħul/għall-kostijiet globali fil-P&L, ir-riskju (eż. abbażi tat-TREA jew ta’ miżuri oħra ta’ riskju) u/jew il-prijoritajiet organizzazzjonali/statutorji (eż. obbligi speċifiċi għall-banek tas-settur pubbliku biex joffru prodotti speċifiċi);
• b. sejbiet superviżorji preċedenti, inklużi dawk li jirriżultaw minn spezzjonijiet fuq il-post – fejn dawn is-sejbiet jistgħu jipprovdu indikaturi dwar linji operatorji li jeħtieġu aktar investigazzjoni –, kif ukoll sejbiet u osservazzjonijiet minn rapporti ta’ awditjar interni jew esterni – dwar jekk il-funzjoni tal-awditjar intern identifikatx kwistjonijiet speċifiċi rigward is-sostenibbiltà jew il-vijabbiltà ta’ ċerti linji operatorji;
• c. eżiti ta’ reviżjonijiet superviżorji tematiċi – jekk analiżi fis-settur kollu żvelatx kwistjonijiet sottostanti komuni li jwasslu għal analiżi addizzjonali speċifika għall-istituzzjoni;
• d. importanza għall-pjanijiet strateġiċi – jekk hemmx linji operatorji li l-istituzzjoni tixtieq li jikbru b’mod sostanzjali jew li jonqsu;
• e. paraguni bejn il-pari – jekk linja operatorja kellhiex prestazzjoni atipika (kienet outlier) meta mqabbla mal-pari, fejn din l-informazzjoni tkun disponibbli għall-awtoritajiet kompetenti. Biex jidentifikaw pari rilevanti għall-BMA, l-awtoritajiet kompetenti għandhom jikkunsidraw il-linji tal-prodott/operatorji rivali li għandhom fil-mira l-istess sors ta’ profitti/klijenti, ir-reġimi regolatorji u r-riskji ġeopolitiċi tal-post tal-operazzjonijiet kif ukoll fatturi oħra xierqa għas-settur li fih topera l-istituzzjoni.