11.1. Tástáil struis mhaoirseachta á húsáid ag údaráis inniúla

Ba cheart d’údaráis inniúla, ar bhonn Airteagal 100 de Threoir 2013/36/AE freisin, tástáil struis mhaoirseachta a úsáid chun SREP a éascú agus, go háirithe, measúnú maoirseachta ar a phríomhghnéithe, mar a thuairiscítear i dTeideal 4 go Teideal 8. Ba cheart tosca ESG a chomhtháthú i dtástáil struis mhaoirseachta i gcomhréir leis na Treoirlínte Comhpháirteacha maidir le rioscaí ESG a chomhtháthú i dtástálacha struis mhaoirseachta, agus tús áite á tabhairt do rioscaí comhshaoil. Go háirithe, ba cheart go gcuideodh tástáil struis maoirseachta leis na húdaráis inniúla, i gcás inarb iomchuí, leis an méid seo a leanas:

• a. rioscaí aonair institiúidí maidir le caipiteal a mheasúnú mar a dtagraítear dó i dTeideal 6, nó ar rioscaí do leachtacht agus do chistiú dá dtagraítear i dTeideal 8;
• b. iontaofacht chláir tástála struis na n-institiúidí a mheasúnú, chomh maith le hábharthacht, déine agus inchreidteacht na gcásanna do thástálacha struis na n-institiúidí féin a úsáidtear chun críocha an ICAAP agus an ILAAP. D’fhéadfadh go n-áireofaí leis sin dúshlán a thabhairt do phríomhbhoinn tuisceana agus do chúiseanna riosca institiúidí;
• c. measúnú a dhéanamh ar chumas na n-institiúidí TSCR agus OCR a chomhlíonadh i gcomhthéacs an mheasúnaithe ar leordhóthanacht caipitil, mar a shonraítear i Rannóg 7.7. Ag brath ar chlúdach agus ar chineál na tástála struis maoirseachta, ní fhéadfar an measúnú seo a theorannú ach do roinnt gnéithe den TSCR atá clúdaithe ag gnéithe deartha na tástála struis maoirseachta (e.g. ceanglais P2R le haghaidh catagóirí aonair riosca, más rud é nach gclúdaionn an tástáil struis ach catagóirí riosca den sórt sin amháin);
• d. P2G a chinneadh le haghaidh institiúidí;
• e. leochaileachtaí nó laigí a d’fhéadfadh a bheith i mbainistíocht riosca agus rialuithe institiúidí ar réimsí aonair riosca a shainaithint;
• f. easnaimh féideartha sna socruithe rialachais fhoriomlána nó sna rialuithe ar fud na hinstitiúide a dtagraítear dóibh i dTeideal 5 a shainathint. Go háirithe, má shainaithníonn údarás inniúil trí bhíthin tástála struis maoirseachta, easnaimh i gcláir tástála struis na hinstitiúide féin nó i mbonneagar sonraí riosca tacaíochta, ba cheart iad sin a chur san áireamh agus creat rialachais agus bainistíocht riosca foriomlán na hinstitiúide sin á measúnú.
• g. ceanglais shonracha leachtachta chainníochtúla a chinneadh i gcomhthéacs an mheasúnaithe ar leordhóthanacht leachtachta, go háirithe i gcás nach bhfuil tagarmharcanna sonracha maoirseachta forbartha ag údarás inniúil le haghaidh ceanglais leachtachta. Ba cheart gnéithe áirithe de na tástálacha struis maoirseachta leachtachta a úsáid, i gcás inar cuí, mar ionchuir agus riachtanais leachtachta shonracha á socrú d'institiúidí, mar a shonraítear i Rannóg 8.6.

Ina theannta sin, ba cheart go gcabhródh tástáil struis maoirseachta le húdaráis inniúla measúnú a dhéanamh ar nósanna imeachta eagraíochtúla maoirseachta agus acmhainní maoirseachta a phleanáil, agus faisnéis ábhartha eile á breithniú freisin, go háirithe maidir le measúnú níos rialta agus níos doimhne ar ghnéithe áirithe SREP i gcás institiúidí nach de chatagóir 1 iad, agus chun críocha raon feidhme an chláir um scrúdú maoirseachta a cheanglaítear le hAirteagal 99 de Threoir 2013/36/AE a chinneadh.

Ba cheart d'údaráis inniúla freisin, i gcás inarbh fhiúntach, torthaí tástála struis mhaoirseachta a úsáid chun:

• a. tacú leis an anailís is gá chun críocha ceadanna agus údaruithe éagsúla a cheanglaítear le Rialachán (AE) Uimh. 575/2013 nó le Treoir 2013/36/AE a dheonú, mar shampla i ndáil le sealúchais cháilitheacha, cumaisc agus éadálacha, agus ceannach ar ais scaireanna;
• b. tacú le hanailís théamach ar na leochaileachtaí féideartha a bhaineann le grúpa institiúidí a bhfuil próifílí riosca comhchosúla acu;
• c. tacú leis an anailís ar na tionchair a d’fhéadfadh a bheith ag fachtóirí ESG ar shamhail ghnó na n ‑ institiúidí ar bhonn anailís cháis mheántéarmach go fhadtéarmach a dhéantar i gcomhréir leis na Treoirlínte Comhpháirteacha maidir le rioscaí ESG a chomhtháthú i dtástálacha struis mhaoirseachta;
• d. institiúidí a spreagadh chun a gcumas tástála struis inmheánaigh agus bainistíochta riosca a fheabhsú: go háirithe, d’fhéadfadh tástáil struis mhaoirseachta a bhfuil comhpháirt ón mbun aníos aici institiúidí a spreagadh chun tuilleadh forbartha a dhéanamh agus a fheabhsú ar a gcomhiomlánú sonraí, samhaltú riosca agus uirlisí TF chun críocha tástála struis agus bainistithe riosca.