11.1. Użu tal-ittestjar tal-istress superviżorju mill-awtoritajiet kompetenti

L-awtoritajiet kompetenti għandhom, anke abbażi tal-Artikolu 100 tad-Direttiva 2013/36/UE, jużaw l-ittestjar tal-istress superviżorju biex jiffaċilitaw l-SREP u, b’mod partikolari, il-valutazzjoni superviżorja tal-elementi ewlenin tiegħu, kif deskritt fit-Titoli 4 sa 8. L-integrazzjoni tal-fatturi tal-ESG fit-testijiet tal-istress superviżorju għandha ssir f’konformità mal-Linji Gwida Konġunti dwar l-integrazzjoni tar-riskji tal-ESG fit-testijiet tal-istress superviżorji, billi tingħata prijorità lir-riskji ambjentali. B’mod partikolari, l-ittestjar tal-istress superviżorju għandu jgħin lill-awtoritajiet kompetenti, fejn xieraq, b’dan li ġej:

• a. il-valutazzjoni tar-riskji individwali tal-istituzzjonijiet għall-kapital kif imsemmi fit-Titolu 6, jew ir-riskji għal-likwidità u l-finanzjament kif imsemmi fit-Titolu 8;
• b. il-valutazzjoni tal-affidabbiltà tal-programmi tal-ittestjar tal-istress tal-istituzzjonijiet, kif ukoll ir-rilevanza, is-severità u l-plawżibbiltà tax-xenarji tat-testijiet tal-istress proprji tal-istituzzjonijiet użati għall-finijiet tal-ICAAP u tal-ILAAP. Dan jista’ jinkludi li jiġu kkontestati s-suppożizzjonijiet u l-motivaturi tar-riskji prinċipali tal-istituzzjonijiet;
• c. il-valutazzjoni tal-kapaċità tal-istituzzjonijiet biex jissodisfaw it-TSCR u l-OCR fil-kuntest tal-valutazzjoni tal-adegwatezza tal-kapital, kif speċifikat fit-taqsima 7.7. Skont il-kopertura u t-tip tat-test tal-istress superviżorju, din il-valutazzjoni tista’ tiġi limitata biss għal xi elementi tat-TSCR koperti mill-karatteristiċi tat-tfassil tal-ittestjar tal-istress superviżorju (eż. P2R għal kategoriji ta’ riskju individwali, jekk it-test tal-istress ikopri biss tali kategoriji tar-riskju).
• d. id-determinazzjoni tal-P2G għall-istituzzjonijiet;
• e. l-identifikazzjoni ta’ vulnerabbiltajiet jew dgħufijiet possibbli fil-ġestjoni u l-kontrolli tar-riskji tal-istituzzjonijiet fuq oqsma ta’ riskju individwali;
• f. l-identifikazzjoni ta’ nuqqasijiet possibbli fl-arranġamenti globali ta’ governanza jew fil-kontrolli fuq livell tal-istituzzjoni kollha msemmija fit-Titolu 5. B’mod partikolari, jekk awtorità kompetenti tidentifika, permezz tal-ittestjar tal-istress superviżorju, nuqqasijiet fil-programmi tal-ittestjar tal-istress tal-istituzzjoni stess jew fl-infrastruttura tad-data tar-riskju ta’ appoġġ, dawn għandhom jitqiesu fil-valutazzjoni tal-qafas globali tal-governanza u tal-ġestjoni tar-riskju ta’ dik l-istituzzjoni;
• g. id-determinazzjoni ta’ rekwiżiti speċifiċi kwantitattivi tal-likwidità fil-kuntest tal-valutazzjoni tal-adegwatezza tal-likwidità, speċjalment meta awtorità kompetenti ma tkunx żviluppat punti ta’ riferiment speċifiċi superviżorji għar-rekwiżiti tal-likwidità. Ċerti elementi tat-testijiet tal-istress superviżorji tal-likwidità għandhom, fejn xieraq, jintużaw bħala inputs meta jiġu stabbiliti rekwiżiti ta’ likwidità speċifiċi għall-istituzzjonijiet kif speċifikat fit-taqsima 8.6.

Barra minn hekk, l-ittestjar tal-istress superviżorju għandu jgħin lill-awtoritajiet kompetenti jivvalutaw il-proċeduri organizzazzjonali superviżorji u jippjanaw riżorsi superviżorji, filwaqt li jikkunsidraw ukoll informazzjoni oħra rilevanti, b’mod partikolari għall-valutazzjoni aktar frekwenti u profonda ta’ ċerti elementi tal-SREP fil-każ ta’ istituzzjonijiet mhux tal-Kategorija 1, u bl-għan li jiddeterminaw l-ambitu tal-programm ta’ eżaminazzjoni superviżorja meħtieġ mill-Artikolu 99 tad-Direttiva 2013/36/UE.

L-awtoritajiet kompetenti għandhom ukoll, fejn xieraq, jużaw l-eżiti tal-ittestjar tal-istress superviżorju biex:

• a. jappoġġaw l-analiżi meħtieġa għall-finijiet tal-għoti ta’ diversi permessi u awtorizzazzjonijiet meħtieġa mir-Regolament (UE) 575/2013 jew mid-Direttiva 2013/36/UE, pereżempju fir-rigward tal-parteċipazzjonijiet kwalifikanti, il-fużjonijiet u l-akkwiżizzjonijiet, u r-riakkwisti ta’ ishma.
• b. jappoġġaw analiżi tematika tal-vulnerabbiltajiet potenzjali ta’ grupp ta’ istituzzjonijiet bi profili ta’ riskju simili;
• c. jappoġġaw l-analiżi tal-impatti potenzjali tal-fatturi tal-ESG fuq il-mudell tan-negozju tal-istituzzjonijiet abbażi ta’ analiżi tax-xenarji fuq terminu medju sa twil imwettqa f’konformità mal-Linji Gwida Konġunti dwar l-integrazzjoni tar-riskji tal-ESG fit-testijiet tal-istress superviżorji;
• d. jimmotivaw lill-istituzzjonijiet biex itejbu l-ittestjar tal-istress intern u l-kapaċitajiet ta’ ġestjoni tar-riskju tagħhom: b’mod partikolari, test tal-istress superviżorju b’komponent minn isfel għal fuq jista’ jimmotiva lill-istituzzjonijiet biex ikomplu jiżviluppaw u jtejbu l-aggregazzjoni tad-data, l-immudellar tar-riskju u l-għodod tal-IT tagħhom għall-finijiet tal-ittestjar tal-istress u l-ġestjoni tar-riskju.