8.4. Valutazzjoni tal-qafas ta’ ġestjoni u kontroll tar-riskju ta’ likwidità u ta’ finanzjament

Sabiex jiksbu fehim komprensiv tal-profil tar-riskju ta’ likwidità u ta’ finanzjament tal-istituzzjoni u n-natura interkonnessa tagħhom, l-awtoritajiet kompetenti għandhom jirrevedu wkoll il-qafas tal-ġestjoni tal-governanza u tar-riskju sottostanti r-riskju ta’ likwidità u ta’ finanzjament tagħha. Għal dan il-għan, l-awtoritajiet kompetenti għandhom jivvalutaw:

• a. l-istrateġija tar-riskju ta’ likwidità u ta’ finanzjament u l-aptit għar-riskju ta’ likwidità u ta’ finanzjament;
• b. il-qafas, il-politiki u l-proċeduri organizzazzjonali;
• c. l-identifikazzjoni, il-kejl, il-ġestjoni, il-monitoraġġ u r-rapportar tar-riskju;
• d. it-testijiet tal-istress speċifiċi għal-likwidità u l-finanzjament tal-istituzzjoni;
• e. il-qafas ta’ kontroll intern għall-ġestjoni tar-riskju ta’ likwidità u r-riskju ta’ finanzjament;
• f. il-pjanijiet ta’ kontinġenza tal-likwidità u l-pjanijiet ta’ rkupru tal-istituzzjoni;
• g. il-pjanijiet ta’ finanzjament tal-istituzzjoni.

Strateġija tar-riskju ta’ likwidità u ta’ finanzjament u l-aptit għar-riskju

L-awtoritajiet kompetenti għandhom jivvalutaw jekk l-istituzzjoni għandhiex strateġija tar-riskju ta’ likwidità/finanzjament soda, ifformulata, iddokumentata u kkomunikata b’mod ċar, approvata mill-korp maniġerjali. Għal din il-valutazzjoni, fost fatturi oħra, l-awtoritajiet kompetenti għandhom jieħdu inkunsiderazzjoni r-rwol tal-korp maniġerjali fl-istabbiliment, l-approvazzjoni u r-reviżjoni tal-istrateġija u l-aptit għar-riskju ta’ likwidità/finanzjament (inklużi s-suppożizzjonijiet sottostanti ewlenin tagħha), l-implimentazzjoni xierqa ta’ din l-istrateġija mill-korp maniġerjali kif ukoll l--adegwatezza tagħha għall-istituzzjoni, fid-dawl tal-mudell tan-negozju tagħha, it-tolleranza globali għar-riskju, ir-rwol fis-sistema finanzjarja, il-kundizzjoni finanzjarja u l-kapaċità ta’ finanzjament. Qafas, politiki u proċeduri organizzazzjonali

L-awtoritajiet kompetenti għandhom jivvalutaw jekk l-istituzzjoni għandhiex qafas organizzazzjonali u arranġamenti ta’ governanza xierqa għall-ġestjoni tar-riskji ta’ likwidità u ta’ finanzjament, inkluż qafas tal-ILAAP robust f’konformità mal-paragrafu 91 tat-Titolu 5 ta’ dawn il-Linji gwida. Barra minn hekk, għandhom jivvalutaw jekk l-istituzzjoni implimentatx funzjonijiet ta’ kejl u kontroll xierqa, b’riżorsi umani u tekniċi suffiċjenti biex tiżviluppa u timplimenta dawn il-funzjonijiet u biex twettaq il-kompiti ta’ monitoraġġ meħtieġa. Il-kontroll tar-riskju ta’ likwidità u l-monitoraġġ tas-sistemi u l-proċessi għandhom ikunu kkontrollati minn funzjoni indipendenti.

L-awtoritajiet kompetenti għandhom jivvalutaw jekk l-istituzzjoni għandhiex politiki u proċeduri xierqa għall-ġestjoni tar-riskju ta’ likwidità u ta’ finanzjament u jekk dawn humiex konsistenti mal-aptit għar-riskju ta’ likwidità tal-istituzzjoni. Dan jinkludi valutazzjoni dwar jekk il-politiki u l-proċeduri humiex definiti sew, formalizzati u kkomunikati b’mod effettiv fl-istituzzjoni kollha. Il-korp maniġerjali għandu japprova u jirrevedi b’mod regolari l-politiki u l-proċeduri, u dawn għandhom jiġu implimentati mill-maniġment superjuri.

L-awtoritajiet kompetenti għandhom jivvalutaw l-adegwatezza tal-approċċ tal-istituzzjoni biex iżżomm l-aċċess għas-suq fis-swieq ta’ finanzjament sinifikanti tagħha, inkluż kwalunkwe ttestjar tal-aċċess għas-suq li jkun twettaq, l-approċċ tal-istituzzjoni biex iżżomm preżenza kontinwa fis-swieq (għal istituzzjonijiet żgħar speċifiċi jew mudelli ta’ negozju speċjalizzati, l-ittestjar tal-aċċess għas-swieq jista’ ma jkunx rilevanti), l-approċċ tal-istituzzjoni għall-iżvilupp ta’ relazzjonijiet b’saħħithom ma’ fornituri ta’ finanzjament, u kwalunkwe evidenza li l-istituzzjoni se jibqa’ jkollha aċċess kontinwu għas-suq fi żminijiet ta’ stress.

Identifikazzjoni, kejl, ġestjoni, monitoraġġ u rapportar tar-riskju

L-awtoritajiet kompetenti għandhom jivvalutaw jekk l-istituzzjoni għandhiex qafas u sistemi tal-IT xierqa għall-identifikazzjoni u l-kejl tar-riskju ta’ likwidità u ta’ finanzjament, skont id-daqs, il-kumplessità, l-aptit għar-riskju u l-kapaċità tat-teħid ta’ riskju tal-istituzzjoni. Huma għandhom jikkunsidraw il-fatturi li ġejjin:

• a. jekk l-istituzzjoni tkunx implimentat metodi xierqa għall-ipproġettar tal-flussi tal-flus tagħha matul sett adegwat ta’ perjodi ta’ żmien, jekk wieħed jassumi sitwazzjonijiet ta’ żamma tal-istatus quo u ta’ stress, u b’mod komprensiv fir-rigward tal-motivaturi materjali tar-riskju;
• b. jekk l-istituzzjoni tużax suppożizzjonijiet u metodoloġiji ewlenin xierqa, li jiġu riveduti b’mod regolari, li jirrikonoxxu l-interazzjoni bejn ir-riskji differenti (ta’ kreditu, tas-suq, IRRBB eċċ) li jirriżultaw kemm mill-entrati li jidhru kif ukoll dawk li ma jidhrux fil-karta bilanċjali;
• c. jekk l-istituzzjoni tifhimx il-kapaċità tagħha li jkollha aċċess għal strumenti finanzjarji jkunu fejn ikunu miżmuma, b’kunsiderazzjoni għal kwalunkwe restrizzjoni legali, regolatorja u operazzjonali fuq l-użu tagħhom, inkluż, pereżempju, in-nuqqas ta’ aċċessibbiltà ta’ assi minħabba aggravju matul perjodi ta’ żmien differenti.

L-awtoritajiet kompetenti għandhom jivvalutaw jekk l-istituzzjonijiet għandhomx qafas ta’ rapportar xieraq għar-riskju ta’ likwidità u ta’ finanzjament li ġie miftiehem mill-maniġment superjuri. Għandhom jieħdu inkunsiderazzjoni l-kwalità tas-sistemi tal-informazzjoni u l-flussi interni ta’ informazzjoni użati biex jiġġeneraw ir-rapportar u jekk ir-rapportar jistax jinftiehem mill-udjenza fil-mira, u jekk huwiex preċiż u utilizzabbli (eż. fil-ħin, mhux eċċessivament kumpless, fl-ambitu korrett). Ir-rapportar għandu jiġi pprovdut b’mod regolari lir-riċevituri xierqa (bħall-korp maniġerjali, il-maniġment superjuri jew kumitat tal-assi u l-obbligazzjonijiet).

L-awtoritajiet kompetenti għandhom jivvalutaw l-adegwatezza tal-proċess tal-kejl tar-riskju ta’ likwidità tal-istess ġurnata, speċjalment għal dawk l-istituzzjonijiet li jipparteċipaw f’sistemi ta’ ħlas, saldu u kklerjar. Għandhom jieħdu inkunsiderazzjoni jekk l-istituzzjoni timmonitorjax u tikkontrollax b’mod adegwat il-flussi ta’ flus u r-riżorsi likwidi disponibbli biex jissodisfaw ir-rekwiżiti tal-istess ġurnata u l-previżjonijiet dwar meta se jseħħu l-flussi ta’ flus matul il-ġurnata, u jekk l-istituzzjoni twettaqx testijiet ta’ stress speċifiċi adegwati għall-operazzjonijiet tal-istess ġurnata, filwaqt li jqisu wkoll l-iżviluppi tan-negozju (eż. il-possibbiltà ta’ pagamenti istantanji).

L-awtoritajiet kompetenti għandhom jivvalutaw jekk l-istituzzjoni għandhiex sett adegwat ta’ indikaturi tal-likwidità u tal-finanzjament. Huma għandhom iqisu:

• a. jekk l-indikaturi jirriflettux b’mod adegwat il-profil tar-riskju ta’ likwidità tal-istituzzjoni inkluż il-grad ta’ diversifikazzjoni tal-assi fil-bafer ta’ likwidità u l-konsistenza bejn id-denominazzjoni tal-munita tal-assi likwidi tagħhom u d-distribuzzjoni skont il-munita tal-ħruġ tal-likwidità tagħhom;
• b. jekk l-indikaturi jkoprux b’mod adegwat l-aspetti ewlenin tar-riskju ta’ likwidità relatati ma’ riskji potenzjali ta’ preċipizju bħall-konċentrazzjoni tal-maturitajiet tal-ħruġ (meta jitqies ukoll kwalunkwe rtirar bikri potenzjali tal-obbligazzjonijiet) u l-programmi ta’ appoġġ tal-bank ċentrali;
• c. jekk l-indikaturi jippermettux l-identifikazzjoni tal-vulnerabbiltajiet tal-finanzjament strutturali tal-istituzzjoni, inkluż kwalunkwe konċentrazzjoni fi swieq, muniti, kontropartijiet u maturitajiet partikolari;
• d. jekk l-indikaturi jipprovdux ħarsa lejn ir-”riġidità” tal-finanzjament tal-istituzzjonijiet (indipendentement minn dak li huwa preżunt fl-LCR jew fl-NSFR), inkluż id-diżaggregazzjoni f’kategoriji omoġenji f’konformità mal-proprjetajiet tar-riskju tagħhom, u l-proporzjon ta’ depożiti li jinsabu barra mill-ambitu ta’ skema ta’ garanzija/assigurazzjoni.

L-istituzzjonijiet għandhom ikunu kapaċi juru li l-indikaturi huma dokumentati b’mod adegwat, riveduti perjodikament, użati bħala inputs biex jiddefinixxu l-aptit għar-riskju tal-istituzzjoni, parti mir-rapportar tal-ġestjoni u użati għall-istabbiliment tal-limiti operattivi.