5.2. Struchtúr eagraíochtúil, comhlacht bainistíochta agus a choistí

Agus measúnú á dhéanamh ar struchtúr eagraíochtúil, comhlacht bainistíochta agus coistí na hinstitiúide, ba cheart d’údaráis inniúla measúnú a dhéanamh ar Airteagal 74, Airteagal 88 agus Airteagal 91 de Threoir 2013/36/AE, Treoirlínte an ÚBE maidir le rialachas inmheánach¹⁸ agus Treoirlínte Comhpháirteacha ESMA agus an ÚBE maidir leis an measúnú ar oiriúnacht chomhaltaí an chomhlachta bainistíochta agus sealbhóirí príomhfheidhmeanna a bheith á gcomhlíonadh ag an institiúid¹⁹ . I gcomhthéacs measúnú a dhéanamh ar struchtúr eagraíochtúil agus oibríochtúil na hinstitiúide, agus i gcás inarb infheidhme struchtúr eagraíochtúil agus oibríochtúil an ghrúpa, ba cheart d’údaráis inniúla breithniú a dhéanamh, inter alia, ar na nithe seo a leanas:

• a. cibé acu atá nó nach bhfuil sé bunaithe go hiomchuí agus go soiléir, le línte freagrachta dea-shainithe, trédhearcacha agus comhsheasmhacha, lena n-áirítear don chomhlacht bainistíochta agus dá choistí;
• b. cibé acu atá nó nach bhfuil sé oiriúnach do mhéid agus do chastacht an ghnó agus na n-oibríochtaí;
• c. cibé acu atá nó nach bhfuil sé trédhearcach do pháirtithe leasmhara, lena n-áirítear an fhoireann agus scairshealbhóirí.

¹⁸ ÚBE/GL/2021/05

¹⁹ ÚBE/GL/2021/06

I gcomhthéacs measúnú a dhéanamh ar chomhlacht bainistíochta na hinstitiúide, ba cheart d’údaráis inniúla breithniú a dhéanamh, inter alia, ar na nithe seo a leanas:

• a. cibé acu atá nó nach bhfuil struchtúr dlíthiúil, eagraíochtúil agus oibríochtúil na hinstitiúide (‘bíodh do struchtúr ar eolas agat’) agus na rioscaí a bhaineann léi ar eolas ag an gcomhlacht bainistíochta agus cibé acu an dtuigeann nó nach dtuigeann siad iad, lena n-áirítear maoirseacht iomchuí;
• b. i gcás inarb infheidhme, cibé acu an dtuigeann nó nach dtuigeann comhlacht bainistíochta na hinstitiúide comhdhlúthaithe modh eagraithe an ghrúpa agus róil na n-eintiteas éagsúil, agus na naisc agus na caidrimh eatarthu;
• c. cibé acu atá nó nach bhfuil tuiscint chuí ag an gcomhlacht bainistíochta i dteannta a chéile ar shamhail ghnó agus ar ghníomhaíochtaí na hinstitiúide, agus an mbíonn nó nach mbíonn sé cothrom le dáta maidir le heolas agus scileanna leordhóthanacha i ndáil le rioscaí ábhartha, lena n-áirítear rioscaí TFC, rioscaí ESG agus rioscaí eile atá ag teacht chun cinn, trí oiliúint rialta;
• d. cibé acu atá nó nach bhfuil beartas ag an institiúid chun éagsúlacht agus ionchuimsiú a chur chun cinn laistigh den chomhlacht bainistíochta agus cibé an ndéantar nó nach ndéantar measúnú rialta orthu sin, lena n-áirítear cothromaíocht inscne, agus cibé an dtacaíonn nó nach dtacaíonn comhdhéanamh, feidhmiú agus pleanáil chomharbais an bhoird bainistíochta le cinnteoireacht éifeachtach agus cibé an léiríonn nó nach léiríonn siad cuspóirí éagsúlachta agus ionchuimsithe na hinstitiúide;
• e. cibé an idirghníomhaíonn nó nach n-idirghníomhaíonn comhaltaí an chomhlachta bainistíochta go héifeachtach, lena n-áirítear idir a fheidhmeanna bainistíochta agus maoirseachta;
• f. cibé an ngníomhaíonn nó nach ngníomhaíonn gach comhalta den chomhlacht bainistíochta go neamhspleách, agus an gcoinníonn nó nach gcoinníonn sé/sí gealltanas ama leordhóthanach agus ccibé an gcuirtear nó nach gcuirtear ar an eolas é/í go hiomchuí faoi staid riosca na hinstitiúide;
• g. cibé acu atá nó nach bhfuil coistí riosca, iniúchóireachta, ainmniúcháin agus luach saothair bunaithe agus an gcomhlacht bainistíochta ina fheidhm mhaoirseachta, i gcás inarb infheidhme, agus cibé an gcomhlíonann nó nach gcomhlíonann na coistí seo a gcúraimí mar atá forordaithe ag an gcreat dlíthiúil agus rialála is infheidhme.

Agus meastóireacht á déanamh ar chomhdhéanamh agus ar fheidhmiú chomhlacht bainistíochta na hinstitiúide agus a cuid coistí, ba cheart d'údaráis inniúla aird a thabhairt freisin ar aon torthaí ábhartha ó na measúnuithe oiriúnachta ar chomhaltaí chomhlacht bainistíochta na hinstitiúide agus ar shealbhóirí príomhfheidhmeanna, a rinne an institiúid, nó, i gcás inarb ábhartha, a rinne na húdaráis inniúla. Ba cheart d'údaráis inniúla athbhreithniú a dhéanamh ar thoradh phróiseas na hinstitiúide chun sealbhóirí príomhfheidhmeanna a shainaithint agus measúnú a dhéanamh ar leibhéal na cuntasachta aonair trí na ráitis aonair maidir le róil agus dualgais gach ball den chomhlacht bainistíochta ina fheidhm bhainistíochta, den ardbhainistíocht, agus de na sealbhóirí príomhfheidhmeanna a chur san áireamh, mar aon le mapáil na ndualgas, lena n-áirítear sonraí faoi na línte tuairiscithe, línte freagrachta, agus na daoine atá mar chuid de shocruithe rialachais na hinstitiúide, agus a ndualgais.