5.2. Struttura organizzazzjonali, il-korp maniġerjali u l-kumitati tiegħu

Fil-valutazzjoni tal-istruttura organizzazzjonali tal-istituzzjoni, tal-korp maniġerjali u tal-kumitati, l-awtoritajiet kompetenti għandhom jivvalutaw il-konformità tal-istituzzjoni mal-Artikoli 74, 88 u 91 tad-Direttiva 2013/36/UE, mal-Linji Gwida tal-EBA dwar il-governanza interna¹⁸ u mal-Linji Gwida konġunti tal-ESMA u tal-EBA dwar il-valutazzjoni tal-adegwatezza tal-membri tal-korp maniġerjali u tat-titolari ta’ funzjonijiet ewlenin¹⁹ . Fil-kuntest tal-valutazzjoni tal-istruttura organizzazzjonali u operazzjonali tal-istituzzjoni, u fejn applikabbli dik tal-grupp, l-awtoritajiet kompetenti għandhom jikkunsidraw inter alia jekk:

• a. tkunx stabbilita b’mod xieraq u ċar, b’linji ta’ responsabbiltà definiti sew, trasparenti u konsistenti, inkluż għall-korp maniġerjali u l-kumitati tiegħu;
• b. tkunx adattata għad-daqs u l-kumplessità tan-negozju u l-operazzjonijiet;
• c. hijiex trasparenti għall-partijiet ikkonċernati, inkluż il-persunal u l-azzjonisti.

¹⁸ EBA/GL/2021/05

¹⁹ EBA/GL/2021/06

Fil-kuntest tal-valutazzjoni tal-korp maniġerjali tal-istituzzjoni, l-awtoritajiet kompetenti għandhom jikkunsidraw inter alia jekk:

• a. il-korp maniġerjali jafx u jifhimx l-istruttura legali, organizzazzjonali u operazzjonali tal-istituzzjoni (“kun af l-istruttura tiegħek”) u r-riskji tagħha, inkluża s-sorveljanza xierqa;
• b. fejn applikabbli, il-korp maniġerjali tal-istituzzjoni konsolidanti jifhimx kemm l-organizzazzjoni tal-grupp u r-rwoli tal-entitajiet differenti tiegħu, kif ukoll ir-rabtiet u r-relazzjonijiet bejniethom;
• c. il-korp maniġerjali b’mod kollettiv għandux fehim xieraq tal-mudell tan-negozju u tal-attivitajiet tal-istituzzjoni, u jibqax aġġornat dwar għarfien u ħiliet suffiċjenti rigward ir-riskji rilevanti, inklużi r-riskji tal-ICT, ir-riskji tal-ESG u riskji emerġenti oħra, permezz ta’ taħriġ regolari;
• d. l-istituzzjoni għandhiex politika biex tippromwovi d-diversità u l-inklużjoni fi ħdan il-korp maniġerjali u tivvalutahomx b’mod regolari, inkluż il-bilanċ bejn il-ġeneri, u jekk il-kompożizzjoni, il-funzjonament u l-ippjanar tas-suċċessjoni tal-bord maniġerjali jappoġġawx teħid ta’ deċiżjonijiet effettiv u jirriflettux l-objettivi tad-diversità u tal-inklużjoni tal-istituzzjoni;
• e. il-membri tal-korp maniġerjali jinteraġixxux b’mod effettiv, inkluż bejn il-funzjonijiet maniġerjali u superviżorji tiegħu;
• f. kull membru tal-korp maniġerjali jaġixxix b’indipendenza tal-ħsieb, iżommx impenn ta’ ħin biżżejjed u huwiex infurmat b’mod xieraq dwar is-sitwazzjoni tar-riskju tal-istituzzjoni;
• g. il-korp maniġerjali fil-funzjoni superviżorja tiegħu jkunx stabbilixxa, fejn applikabbli, kumitati tar-riskju, tal-awditjar, tan-nomina u tar-remunerazzjoni, u jekk dawn il-kumitati jissodisfawx il-kompiti tagħhom kif preskritt mill-qafas legali u regolatorju applikabbli.

Meta jkunu qed jirrevedu l-kompożizzjoni u l-funzjonament tal-korp maniġerjali tal-istituzzjoni u l-kumitati tiegħu, l-awtoritajiet kompetenti għandhom ukoll jikkunsidraw kwalunkwe sejba rilevanti mill-valutazzjonijiet tal-adegwatezza dwar il-membri tal-korp maniġerjali tal-istituzzjoni u t-titolari ta’ funzjonijiet ewlenin, imwettqa mill-istituzzjoni, jew fejn rilevanti mill-awtoritajiet kompetenti. L-awtoritajiet kompetenti għandhom jirrieżaminaw l-eżitu tal-proċess tal-istituzzjoni li tidentifika t-titolari ta’ funzjonijiet ewlenin u jevalwaw il-livell ta’ responsabbiltà individwali billi jqisu d-dikjarazzjonijiet individwali rigward ir-rwoli u d-dmirijiet tal-membri kollha tal-korp maniġerjali fil-funzjoni maniġerjali tiegħu, il-maniġment superjuri, u t-titolari ta’ funzjonijiet ewlenin, flimkien mal-immappjar tad-dmirijiet, inklużi d-dettalji tal-linji ta’ rapportar, il-linji ta’ responsabbiltà, u l-persuni li huma parti mill-arranġamenti ta’ governanza tal-istituzzjoni, u d-dmirijiet tagħhom.