7.6. Ceanglais a chomhlíonadh i ndálaí struis – Úsáid P2G agus P2G-LR chun aghaidh a thabhairt ar thorthaí cainníochtúla na tástála struis

Ba cheart d’údaráis inniúla leordhóthanacht chistí dílse na hinstitiúide (cainníocht agus comhdhéanamh) i ndálaí struis a chinneadh trí thástáil struis agus cibé acu atá nó nach bhfuil gá le bearta maoirseachta, lena n-áirítear P2G, P2G-LR, pleanáil caipitil athbhreithnithe agus bearta eile chun aghaidh a thabhairt ar neamhdhóthanachtaí féideartha. Chun leordhóthanacht caipitil a mheasúnú i ndálaí struis, ba cheart d’údaráis inniúla an méid seo a leanas a bhreithniú:

• a. úsáid na dtorthaí cáilíochtúla (e.g. easnaimh a shainaithnítear i mbainistíocht agus rialú riosca) ar thástálacha struis agus ar thástáil struis maoirseachta institiúidí;
• b. torthaí cainníochtúla thástálacha struis institiúidí a úsáid, má mheastar go bhfuil an ICAAP iontaofa, agus torthaí cainníochtúla na dtástálacha struis maoirseachta, de bhun Airteagal 100 de Threoir 2013/36/AE mar a shonraítear i dTeideal 11, agus lena n ‑ áirítear, mar shampla:
• i. cásanna/toimhdí sonracha 'ancaire' a fhorordú atá le cur i bhfeidhm ag institiúidí;
• ii. tástálacha struis a dhéanamh ar fud an chórais trí úsáid a bhaint as modheolaíochtaí comhsheasmhacha agus cásanna comhsheasmhacha arna reáchtáil ag institiúidí nó ag maoirseoirí.

Ba cheart d'údaráis inniúla measúnú a dhéanamh mar is iomchuí ar thorthaí cainníochtúla na dtástálacha struis maidir le leordhóthanacht agus cáilíocht chistí dílse na hinstitiúide agus a chinneadh cibé acu an leor nó nach leor cainníocht agus cáilíocht na gcistí dílse chun na ceanglais chaipitil is infheidhme a chlúdach, agus go háirithe:

• a. OCR lena n-áirítear a cheanglais chaipitil mhaolánaigh chomhcheangailte faoin gcás bunlíne thar thréimhse ama réamhbhreathnaithe 2 bhliain ar a laghad;
• b. TSCR faoi na cásanna díobhálacha thar thréimhse ama réamhbhreathnaitheach 2 bhliain ar a laghad.

Ba cheart d’údaráis inniúla P2G agus P2G-LR a chinneadh agus, i gcás ina dtagann luach dearfach as an gcinneadh, ba cheart dóibh P2G nó P2G-LR a shocrú chun aghaidh a thabhairt ar imní maoirseachta faoi íogaireacht na hinstitiúide do na cásanna díobhálacha a úsáidtear sna tástálacha struis maoirseachta. Níor cheart P2G a úsáid chun rioscaí nó gnéithe de rioscaí atá clúdaithe cheana féin ag an P2R i gcomhréir le Rannóg 7.2 a chlúdach. Ar an gcaoi chéanna, níor cheart P2G-LR a úsáid chun na gnéithe sin de riosca na giarála iomarcaí atá clúdaithe cheana féin ag P2R-LR i gcomhréir le Rannóg 7.3 a chlúdach.

Ba cheart do leibhéal P2G cosaint a thabhairt i gcoinne sáruithe féideartha ar an TSCR i gcás díobhálach. Ar an gcaoi chéanna, ba cheart do leibhéal P2G-LR cosaint a thabhairt i gcoinne sárú ar TSLRR i gcás díobhálach. I gcás ina dtugann torthaí cainníochtúla na dtástálacha struis maoirseachta le fios nach bhfuiltear ag súil go sáróidh an institiúid a TSCR faoin gcás díobhálach tástála struis, féadfaidh údaráis inniúla a chinneadh gan P2G a shocrú. Ar an gcaoi chéanna, féadfaidh údaráis inniúla a chinneadh gan P2G-LR a shocrú i gcás nach bhfuiltear ag súil go sárófar TSLRR faoin gcás díobhálach tástála struis.

Ba cheart d'údaráis inniúla P2G agus P2G-LR a chinneadh agus a shocrú bunaithe ar thorthaí chás díobhálach na dtástálacha struis maoirseachta ábhartha, lena n-áirítear na tástálacha struis uile-AE arna ndéanamh ag an ÚBE nó aon tástálacha struis maoirseachta ábhartha eile arna ndéanamh ar fud an chórais trí úsáid a bhaint as anailís ilfhachtóiriúil ar chásanna thar thréimhse ama réamhbhreathnaitheach 2 bhliain ar a laghad.

Ar bhonn cur chuige comhréireach a bhunú le haghaidh institiúidí neamhchatagóir 1 agus fochuideachtaí de ghrúpaí trasteorann, chun P2G agus P2G-LR a shocrú agus a thabhairt cothrom le dáta féadfaidh údaráis inniúla torthaí foirmeacha simplithe tástálacha struis maoirseachta a mheas (e.g. trí úsáid a bhaint as. cásanna 'ancaire' forordaithe maoirseachta, anailís íogaireachta, tástálacha struis ó bharr anuas arna seoladh ag údaráis ainmnithe, tionchair ar leibhéal na punainne ó thástálacha struis comhdhlúite), tástálacha struis maoirseachta san am atá thart nó tástálacha struis institiúidí i gcomhréir le mír 340. Féadfar foirmeacha simplithe na dtástálacha struis maoirseachta a dhéanamh ar bhonn aonair seachas mar chuid de chleachtadh ar fud an chórais.

Ba cheart d’údaráis inniúla P2G agus P2G-LR a chinneadh agus a shocrú i gcomhréir leis an tsamhail rannpháirtíochta íosta atá sonraithe i Rannóg 2.2.4. Go háirithe, ba cheart gurb í an íosmhinicíocht lena gcinntear agus lena socrófar P2G agus P2G-LR minicíocht an mheasúnaithe ar leordhóthanacht caipitil faoi shamhail íos-rannpháirtíochta SREP.

D’ainneoin na míre roimhe seo, déanfaidh na húdaráis inniúla an méid seo a leanas:

• a. ba cheart dóibh measúnú a dhéanamh cibé acu atá nó nach bhfuil an leibhéal P2G agus P2G-LR atá ann cheana iomchuí fós aon uair a bheidh torthaí tástálacha struis maoirseachta nua ar fáil, agus iad a athbhreithniú más gá;
• b. ní fhéadfaidh siad P2G agus P2G-LR a chinneadh ach amháin gach dara bliain seachas go bliantúil, lena n-áirítear d’institiúidí Chatagóir 1. Mar sin féin, sa bhliain i ndiaidh na bliana ina ndéantar P2G a chinneadh, ba cheart d'údaráis inniúla measúnú a dhéanamh ar cibé acu atá nó nach bhfuil P2G agus P2G-LR fós ábhartha nó an gá iad a nuashonrú, ar bhonn na faisnéise ábhartha go léir, lena n-áirítear torthaí na dtástálacha struis maoirseachta a rinneadh cheana, mar aon le hanailís bhreise íogaireachta (i.e. foirmeacha simplithe de thástáil struis mhaoirseachta).

Agus méid P2G á chinneadh, ba cheart d’údaráis inniúla a áirithiú go socrófar é ar leibhéal is iomchuí chun an t-uastionchar struis a mheastar ar a laghad a chlúdach, ar leibhéal ba cheart a ríomh bunaithe ar na hathruithe ar an gcóimheas CET1 (i.e. an dá ghluaiseacht i gcaipiteal CET1 agus TREA á mbreithniú) sa bhliain is measa struis, agus leibhéal na gceanglas caipitil is infheidhme á gcur san áireamh. Ba cheart an t-uastionchar struis chun P2G a shocrú a thuiscint mar an difríocht idir an cóimheas CET1 is ísle sa chás díobhálach thar thréimhse na tástála struis agus an cóimheas CET1 iarbhír ag an túsphointe.

Maidir leis an P2G-LR a chalabrú, ba cheart an t-uastionchar struis a ríomh bunaithe ar na hathruithe ar chaipiteal Leibhéal 1 sa bhliain is measa struis agus na ceanglais chaipitil maidir leis an gcóimheas giarála is infheidhme á gcur san áireamh. Ba cheart an tionchar uasta struis chun críche P2G-LR a shocrú a thuiscint mar an difríocht idir an cóimheas giarála is ísle sa chás díobhálach thar thréimhse na tástála struis agus an cóimheas giarála iarbhír ag an bpointe tosaigh.

Ba cheart d’údaráis inniúla pointe tosaigh sonrach P2G a fháil do gach institiúid trí gnéithe a chlúdaíonn rioscaí a léirítear san uastionchar struis cheana féin a fhritháireamh. Ba cheart d'údaráis inniúla, go háirithe, na bearta ábhartha a fhritháireamh, go háirithe maolán caomhnaithe caipitil, mar a shonraítear i mír 354. Ina theannta sin, agus pointí tosaigh P2G agus P2G-LR á socrú acu, féadfaidh údaráis inniúla breithniú a dhéanamh, i gcás inarb ábhartha, ar choigeartuithe eile ar an uastionchar struis a bhaineann le toimhde an chláir chomhardaithe statach nó leis an tréimhse ama dhifriúil idir an cleachtadh tástála struis agus am an phointe tosaigh.

Maidir le socrú an P2G agus an P2G-LR, ba cheart d'údaráis inniúla a chinntiú go bhfuil nasc leordhóthanach idir a bpointí tosaigh faoi seach chomh maith lena luachanna deiridh. Chun na críche sin, féadfaidh siad a chinneadh cur chuige buicéadaithe a úsáid chun institiúidí a aicmiú de réir phointí tosaigh P2G agus P2G-LR, bunaithe ar na tástálacha struis maoirseachta ábhartha a leagtar amach i mír 344 nó bunaithe ar chur chuige eile atá leagtha amach i mír 345. Dá bhrí sin, féadfaidh údaráis inniúla raon seasta de leibhéil P2G nó P2G-LR faoi seach a shannadh do gach buicéad agus an P2G deiridh agus an P2G-LR a shocrú laistigh de raon an bhuicéid sannta nó, go heisceachtúil, lasmuigh de raon an bhuicéid ábhartha, bunaithe ar na cúinsí a bhaineann go sonrach leis an institiúid. Ba cheart go mbeadh sé d’aidhm ag údaráis inniúla éifeachtaí aillte idir buicéid a sheachaint, mar shampla trí fhorluí páirteach a cheadú idir na leibhéil P2G nó P2G-LR do bhuicéid chóngaracha, agus ba cheart dóibh a áirithiú go mbeidh an P2G deiridh agus an P2G-LR sainiúil don institiúid.

Agus an P2G agus an P2G-LR deiridh á gcinneadh, ba cheart d'údaráis inniúla na fachtóirí seo a leanas a mheas, i gcás inarb ábhartha agus i gcás ina bhfuil siad ar fáil:

• a. an bhliain a dtarlaíonn an t-uastionchar struis i ndáil le túsphointe agus tréimhse ama na gcásanna a úsáidtear sna tástálacha struis;
• b. toradh tástála struis iontaofa institiúide, agus sainmhínithe agus toimhdí cásanna sonracha á gcur san áireamh, go háirithe i gcás ina meastar go bhfuil siad níos ábhartha do shamhail ghnó agus do phróifíl riosca na hinstitiúide nó i gcás ina bhfuil na cásanna inmheánacha níos déine ná na cásanna maoirseachta;
• c. athruithe a tharlaíonn tar éis dháta scoite an chleachtaidh tástála struis a mbeadh tionchar ábhartha acu ar phróifíl riosca nó ar shuíomh caipitil na n-institiúidí (e.g. iasachtaí neamhthuillmheacha a dhíol). Féadfar a áireamh sna hathruithe sin athruithe eatramhacha ar an bpróifíl riosca lena n-áirítear athruithe struchtúracha ar ghníomhaíocht nó ar chlár comhardaithe na n-institiúidí;
• d. gníomhaíochtaí maolaitheacha bainistíochta ábhartha na hinstitiúide a mheastar a bheith inchreidte agus thar a bheith cinnte tar éis a measúnú maoirseachta;
• e. faisnéis agus tuairimí maoirseachta maidir le hábharthacht na tástála struis maoirseachta do straitéis, do phleananna airgeadais agus do shamhail ghnó na hinstitiúide;
• f. cinnteacht laghdaithe maidir le híogaireacht iarbhír na hinstitiúide do chásanna díobhálacha;
• g. aon fhorluí féideartha leis an P2R nó P2R-LR;
• h. cumas aisghabhála foriomlán na hinstitiúide mar a shonraítear i dTreoirlínte an ÚBE maidir le cumas téarnaimh foriomlán i bpleanáil téarnaimh⁴³ ;
• i. cáilíocht (comhdhéanamh) chistí dílse na hinstitiúide atá ar fáil, lena n-áirítear an bhliain is measa den strus;
• j. cibé acu atá nó nach bhfuil an institiúid faoi athstruchtúrú nó faoi réiteach.

⁴³ Treoirlínte an ÚBE maidir le hacmhainneacht téarnaimh fhoriomlán i bpleanáil téarnaimh (ÚBE/GL/2023/06) – Rannóg II. Measúnú ar ORC – ‘ORC coigeartaithe’

Chun críocha P2G a chinneadh, ba cheart d'údaráis inniúla a mheas freisin a mhéid a chlúdaíonn cásanna struis na rioscaí ábhartha uile a rannchuidíonn leis na ceanglais cistí dílse breise in TSCR. Ba cheart d’údaráis inniúla féachaint go háirithe don bhfíric go bhféadfadh sé nach gclúdófaí i gcásanna macraeacnamaíocha meathlaithe rioscaí áirithe, mar shampla riosca pinsin nó gnéithe áirithe de riosca comhchruinnithe creidmheasa (e.g. comhchruinniú ainm aonair) – a d’fhéadfadh caillteanais ionchasacha a mhéadú faoi na cásanna díobhálacha a ndearnadh tástáil orthu.

Ina theannta sin, ba cheart d’údaráis inniúla a bhreithniú a mhéid a chlúdaíonn na ceanglais chomhcheangailte maolánacha atá ann cheana agus bearta eile is infheidhme cheana rioscaí a nochtar trí thástáil struis. Maidir leis seo, i gcás údaráis inniúla:

• a. ba cheart P2G a fhritháireamh i gcoinne an mhaoláin chaomhnaithe caipitil (CCB), toisc go bhfuil forluí idir P2G agus CCB de réir nádúir;
• b. ba cheart, i gcásanna eisceachtúla, P2G a fhritháireamh ar bhonn cáis i gcoinne an mhaoláin chaipitil fhrith-thimthriallaigh (CCyB) – cé nach bhfuiltear ag súil le haon fhorluí eatarthu i bprionsabal – bunaithe ar bhreithniú na mbunrioscaí a chlúdaítear leis an maolán agus a bheith curtha san áireamh i ndearadh na gcásanna a úsáidtear do na tástálacha struis, tar éis idirchaidreamh a dhéanamh leis an údarás macrastuamachta;
• c. níor cheart P2G a fhritháireamh in aghaidh na maolán um riosca sistéamach (Maoláin G-SII/O-SII agus an maolán maidir le riosca sistéamach), ós rud é go bhfuil siad ceaptha chun na rioscaí a chruthaíonn institiúid don chóras airgeadais a chlúdach;
• d. níor cheart P2G-LR a fhritháireamh i gcoinne cheanglas maolánach cóimheas giarála G-SII a shonraítear in Airteagal 92(1a) de Rialachán (AE) Uimh. 575/2013.
• e. féadfaidh siad athbhreithniú a dhéanamh ar an P2G a cuireadh in iúl don institiúid sin chun a áirithiú go leanfaidh a calabrú de bheith iomchuí i gcás ina dtiocfaidh institiúid faoi cheangal ag an íosráta aschuir, i gcomhréir le hAirteagal 104b(4a) de Threoir 2013/36/AE.

I gcás ina gcinnfidh údaráis inniúla P2G, ba cheart dóibh an treoir seo a chur leis an OCR. I gcás ina gcinnfidh údaráis inniúla P2G-LR, ba cheart dóibh an treoir seo a chur leis an OLRR. Ba cheart d’údaráis inniúla OCR agus OLRR a mheas mar dhá chruach riachtanas ar leith. Dá bhrí sin, is féidir na cistí dílse atá ar fáil a úsáid go comhuaineach chun P2G agus P2G-LR a chomhlíonadh.