7.6. Konformità mar-rekwiżiti f’kundizzjonijiet ta’ stress – Użu tal-P2G u tal-P2G-LR biex jindirizzaw l-eżiti kwantitattivi tal-ittestjar tal-istress

L-awtoritajiet kompetenti għandhom jiddeterminaw permezz tal-ittestjar tal-istress l-adegwatezza tal-fondi proprji tal-istituzzjoni (kwantità u kompożizzjoni) f’kundizzjonijiet ta’ stress u jekk il-miżuri superviżorji, inklużi l-P2G, il-P2G-LR, l-ippjanar tal-kapital rivedut u miżuri oħra humiex meħtieġa sabiex jiġu indirizzati l-inadegwatezzi potenzjali. Sabiex jivvalutaw l-adegwatezza tal-kapital f’kundizzjonijiet ta’ stress, l-awtoritajiet kompetenti għandhom jikkunsidraw:

• a. l-użu tal-eżiti kwalitattivi (eż. nuqqasijiet identifikati fil-ġestjoni u l-kontroll tar-riskju) tat-testijiet tal-istress tal-istituzzjonijiet u tal-ittestjar tal-istress superviżorju;
• b. l-użu tal-eżiti kwantitattivi tat-testijiet tal-istress tal-istituzzjonijiet, jekk l-ICAAP jitqies affidabbli, u tat-testijiet tal-istress superviżorji, skont l-Artikolu 100 tad-Direttiva 2013/36/UE kif speċifikat fit-Titolu 11, u inkluż, pereżempju:
• i. il-preskrizzjoni ta’ xenarji/suppożizzjonijiet “ankra” speċifiċi li għandhom jiġu implimentati mill-istituzzjonijiet;
• ii. it-twettiq ta’ testijiet tal-istress fis-sistema kollha permezz ta’ metodoloġiji konsistenti u xenarji mmexxija minn istituzzjonijiet jew minn superviżuri.

L-awtoritajiet kompetenti għandhom jivvalutaw kif xieraq l-eżiti kwantitattivi tat-testijiet tal-istress fir-rigward tal-adegwatezza u l-kwalità tal-fondi proprji tal-istituzzjoni u jiddeterminaw jekk il-kwantità u l-kwalità tal-fondi proprji humiex suffiċjenti biex ikopru r-rekwiżiti kapitali applikabbli, u b’mod partikolari:

• a. OCR li jinkludi r-rekwiżiti ta’ bafer kombinat tiegħu skont ix-xenarju bażi fuq perjodu ta’ żmien prospettiv ta’ mill-inqas sentejn;
• b. TSCR skont ix-xenarji negattivi fuq perjodu ta’ żmien prospettiv ta’ mill-inqas sentejn.

L-awtoritajiet kompetenti għandhom jiddeterminaw il-P2G u l-P2G-LR, u, fejn id-determinazzjoni twassal għal valur pożittiv, dawn għandhom jistabbilixxu l-P2G jew il-P2G-LR biex jindirizzaw it-tħassib superviżorju dwar is-sensittività tal-istituzzjoni għax-xenarji negattivi użati fit-testijiet tal-istress superviżorji. Il-P2G m’għandux jintuża biex ikopri riskji jew elementi ta’ riskji diġà koperti mill-P2R f’konformità mat-taqsima 7.2. B’mod simili, il-P2G-LR ma għandux jintuża biex ikopri dawk l-aspetti tar-riskju ta’ ingranaġġ eċċessiv diġà koperti mill-P2R-LR f’konformità mat-taqsima 7.3.

Il-livell tal-P2G għandu jipproteġi kontra l-ksur potenzjali tat-TSCR f’xenarju negattiv. Bl-istess mod, il-livell tal-P2G-LR għandu jipproteġi kontra l-ksur tat-TSLRR f’xenarju negattiv. Meta l-eżiti kwantitattivi tat-testijiet tal-istress superviżorji jissuġġerixxu li ma huwiex mistenni li l-istituzzjoni tikser it-TSCR tagħha fix-xenarju tat-test tal-istress negattiv, l-awtoritajiet kompetenti jistgħu jiddeċiedu li ma jistabbilixxux P2G. Bl-istess mod, l-awtoritajiet kompetenti jistgħu jiddeċiedu li ma jistabbilixxux il-P2G-LR fejn it-TSLRR ma jkunx mistenni li jinkiser taħt ix-xenarju negattiv tat-test tal-istress.

L-awtoritajiet kompetenti għandhom jiddeterminaw u jistabbilixxu l-P2G u l-P2G-LR abbażi tal-eżiti tax-xenarju negattiv tat-testijiet tal-istress superviżorji rilevanti, inklużi testijiet tal-istress fl-UE kollha mwettqa mill-EBA jew kwalunkwe test tal-istress superviżorju rilevanti ieħor imwettaq fuq bażi tas-sistema kollha fuq perjodu ta’ żmien prospettiv ta’ mill-inqas sentejn.

Abbażi tal-istabbiliment ta’ approċċ proporzjonat għall-istituzzjonijiet u s-sussidjarji li ma jikklassifikawx fil-Kategorija 1 ta’ gruppi transfruntiera, għall-istabbiliment u l-aġġornament tal-P2G u l-P2G-LR l-awtoritajiet kompetenti jistgħu jikkunsidraw l-eżiti ta’ forom simplifikati ta’ testijiet tal-istress superviżorji (eż. permezz tal-użu ta’ xenarji “ankra” superviżorji preskritti, analiżi tas-sensittività, testijiet tal-istress minn fuq għal isfel imwettqa minn awtoritajiet maħtura, u impatti fil-livell tal-portafoll minn testijiet tal-istress fil-livell konsolidat), testijiet tal-istress superviżorji preċedenti jew testijiet tal-istress tal-istituzzjonijiet f’konformità mal-paragrafu 340. Il-forom simplifikati tat-testijiet tal-istress superviżorji jistgħu jitwettqu fuq bażi individwali aktar milli bħala parti mill-eżerċizzju tas-sistema kollha.

L-awtoritajiet kompetenti għandhom jiddeterminaw u jistabbilixxu l-P2G u l-P2G-LR f’konformità mal-mudell ta’ impenn minimu speċifikat fit-taqsima 2.4. B’mod partikolari, il-frekwenza minima li biha l-P2G u l-P2G-LR jiġu ddeterminati u stabbiliti għandha tkun il-frekwenza tal-valutazzjoni tal-adegwatezza tal-kapital skont il-mudell ta’ impenn minimu tal-SREP.

Minkejja l-paragrafu preċedenti, l-awtoritajiet kompetenti:

• a. għandhom jivvalutaw jekk il-P2G u l-P2G-LR eżistenti għadhomx xierqa kull meta r-riżultati tat-testijiet tal-istress superviżorji ġodda jkunu disponibbli, u jirreveduhom jekk ikun meħtieġ;
• b. jistgħu jiddeterminaw il-P2G u l-P2G-LR kull sentejn biss minflok kull sena, inkluż għall-istituzzjonijiet tal-Kategorija 1 tal-SREP. Madankollu, fis-sena li ssegwi s-sena tad-determinazzjoni tal-P2G, l-awtoritajiet kompetenti għandhom jivvalutaw jekk il-P2G u l-P2G-LR għadhomx rilevanti jew jeħtiġux li jiġu aġġornati, fuq il-bażi ta’ kull informazzjoni rilevanti, inklużi l-eżiti tat-testijiet tal-istress superviżorji preċedenti, flimkien ma’ analiżi addizzjonali tas-sensittività (eż. forom simplifikati ta’ ttestjar tal-istress superviżorju).

Meta jikkalibraw il-P2G, l-awtoritajiet kompetenti għandhom jiżguraw li dan ikun stabbilit f’livell xieraq biex ikopri mill-inqas l-impatt tal-istress massimu antiċipat, li għandu jiġi kkalkolat abbażi tat-tibdil fil-proporzjon tas-CET1 (jiġifieri billi jiġi kkunsidrat kemm iċ-ċaqliq fil-kapital tas-CET1 kif ukoll it-TREA) fl-agħar sena tal-istress u billi jitqies il-livell tar-rekwiżiti kapitali applikabbli. L-impatt massimu tal-istress għall-fini tal-istabbiliment tal-P2G għandu jinftiehem bħala d-differenza bejn l-aktar proporzjon baxx tas-CET1 fix-xenarju negattiv matul il-perjodu tat-test tal-istress u l-proporzjon attwali tas-CET1 fil-punt tat-tluq.

Fil-kalibrazzjoni tal-P2G-LR, l-impatt massimu tal-istress għandu jiġi kkalkolat abbażi tat-tibdil fil-kapital tal-Grad 1 fl-agħar sena tal-istress, u b’kont meħud tar-rekwiżiti kapitali tal-proporzjon ta’ ingranaġġ applikabbli. L-impatt massimu tal-istress għall-fini tal-istabbiliment tal-P2G-LR għandu jinftiehem bħala d-differenza bejn l-aktar proporzjon ta’ ingranaġġ baxx fix-xenarju negattiv matul il-perjodu tat-test tal-istress u l-proporzjon attwali tal-ingranaġġ fil-punt tat-tluq.

L-awtoritajiet kompetenti għandhom jiksbu l-punt tat-tluq tal-P2G speċifiku għal kull istituzzjoni billi jpaċu elementi li diġà jkopru r-riskji riflessi fl-impatt massimu tal-istress. B’mod partikolari, l-awtoritajiet kompetenti għandhom ipaċu l-miżuri rilevanti, b’mod partikolari l-bafer tal-konservazzjoni tal-kapital, f’konformità mal-paragrafu 354. Barra minn hekk, meta jistabbilixxu l-punti tat-tluq tal-P2G u tal-P2G-LR, l-awtoritajiet kompetenti jistgħu jikkunsidraw, fejn rilevanti, aġġustamenti oħra għall-impatt massimu tal-istress relatat mas-suppożizzjoni statika tal-karta bilanċjali jew il-perjodu ta’ żmien differenti bejn l-eżerċizzju tat-test tal-istress u l-mument tal-punt tat-tluq.

Meta jistabbilixxu l-P2G u l-P2G-LR, l-awtoritajiet kompetenti għandhom jiżguraw rabta adegwata bejn il-punti tat-tluq rispettivi tagħhom kif ukoll il-valuri finali tagħhom. Għal dan l-għan, huma jistgħu jiddeċiedu li jużaw approċċ ta’ bucketing biex jikklassifikaw l-istituzzjonijiet f’konformità mal-punti tat-tluq tal-P2G u tal-P2G-LR, abbażi tat-testijiet tal-istress superviżorji rilevanti stabbiliti fil-paragrafu 344 jew abbażi ta’ approċċi oħra stabbiliti fil-paragrafu 345. Konsegwentement, l-awtoritajiet kompetenti jistgħu jassenjaw firxa fissa tal-livelli tal-P2G jew tal-P2G-LR għal kull bucket u jistabbilixxu l-P2G u l-P2G-LR finali fil-medda tal-bucket assenjat jew, b’mod eċċezzjonali, barra mill-medda tal-bucket rilevanti, abbażi tal-kunsiderazzjonijiet speċifiċi għall-istituzzjoni. L-awtoritajiet kompetenti għandhom jimmiraw li jevitaw l-effetti ta’ preċipizju bejn il-buckets, pereżempju billi jippermettu trikkib parzjali bejn il-livelli tal-P2G jew tal-P2G-LR għal buckets kontigwi, u għandhom jiżguraw li l-P2G u l-P2G-LR finali li jirriżultaw ikunu speċifiċi għall-istituzzjoni.

Meta jiddeterminaw il-P2G u l-P2G-LR finali, l-awtoritajiet kompetenti għandhom jikkunsidraw, fejn rilevanti u disponibbli, il-fatturi li ġejjin:

• a. is-sena meta jseħħ l-impatt tal-istress massimu fir-rigward tal-punt tat-tluq u l-perjodu ta’ żmien tax-xenarji użati fit-testijiet tal-istress;
• b. l-eżitu ta’ test tal-istress ta’ istituzzjoni affidabbli, billi jitqiesu d-definizzjonijiet u s-suppożizzjonijiet speċifiċi tax-xenarju, b’mod partikolari meta dawn jitqiesu aktar rilevanti għall-mudell tan-negozju u l-profil tar-riskju tal-istituzzjoni jew meta x-xenarji interni jkunu aktar severi mix-xenarji superviżorji;
• c. tibdil li jseħħ wara d-data limitu tal-eżerċizzju tat-test tal-istress b’impatt materjali fuq il-profil tar-riskju jew il-pożizzjoni kapitali tal-istituzzjoni (eż. il-bejgħ ta’ self improduttiv). Dan it-tibdil jista’ jinkludi tibdil interim fil-profil tar-riskju inkluż tibdil strutturali fl-attività jew fil-karta bilanċjali tal-istituzzjoni;
• d. l-azzjonijiet ta’ ġestjoni mitiganti rilevanti tal-istituzzjoni li jitqiesu kredibbli u ferm ċerti wara l-valutazzjoni superviżorja tagħhom;
• e. informazzjoni dwar perspettivi superviżorji dwar ir-rilevanza tal-ittestjar tal-istress superviżorju għall-istrateġija, il-pjanijiet finanzjarji u l-mudell tan-negozju tal-istituzzjoni;
• f. ċertezza mnaqqsa fuq is-sensittività attwali tal-istituzzjoni għal xenarji negattivi;
• g. kwalunkwe trikkib potenzjali fuq il-P2R jew il-P2R-LR;
• h. il-kapaċità globali ta’ rkupru tal-istituzzjoni kif speċifikata fil-Linji Gwida tal-EBA dwar il-kapaċità globali ta’ rkupru fl-ippjanar għall-irkupru⁴³ ;
• i. il-kwalità (kompożizzjoni) tal-fondi proprji disponibbli tal-istituzzjoni, inkluża l-agħar sena ta’ stress;
• j. jekk l-istituzzjoni hijiex taħt ristrutturar jew riżoluzzjoni jew le.

⁴³ Linji Gwida tal-EBA dwar il-kapaċità globali ta’ rkupru fl-ippjanar għall-irkupru (EBA/GL/2023/06) - Taqsima II. Valutazzjoni tal-ORC – “ORC aġġustata”.

Għall-finijiet tad-determinazzjoni tal-P2G, l-awtoritajiet kompetenti għandhom jikkunsidraw ukoll il-punt sa fejn ix-xenarji tal-istress ikopru r-riskji materjali kollha li jikkontribwixxu għall-P2R fit-TSCR. L-awtoritajiet kompetenti għandhom iqisu, b’mod partikolari, il-fatt li x-xenarji ta’ reċessjoni makroekonomika jistgħu ma jkoprux kompletament xi riskji – pereżempju r-riskju ta’ pensjoni jew xi elementi tar-riskju ta’ konċentrazzjoni ta’ kreditu (eż. konċentrazzjoni f’isem wieħed) – li jistgħu jamplifikaw telf potenzjali fix-xenarji negattivi ttestjati.

Barra minn hekk, l-awtoritajiet kompetenti għandhom jikkunsidraw il-punt sa fejn ir-rekwiżiti tal-bafer kombinat eżistenti u miżuri applikabbli oħra diġà jkopru r-riskji żvelati mill-ittestjar tal-istress. F’dan ir-rigward, l-awtoritajiet kompetenti:

• a. għandhom ipaċu l-P2G mal-bafer kapitali ta’ konservazzjoni (CCB), peress li l-P2G u s-CCB jikkoinċidu min-natura tagħhom.
• b. għandhom f’każijiet eċċezzjonali jpaċu l-P2G fuq bażi ta’ każ b’każ kontra l-bafer kapitali kontroċikliku (CCyB) – filwaqt li fil-prinċipju ma jkun mistenni l-ebda trikkib bejniethom – abbażi tal-kunsiderazzjoni tar-riskji sottostanti koperti mill-bafer u kkunsidrati fit-tfassil tax-xenarji użati għat-testijiet tal-istress, wara li jkun hemm komunikazzjoni mal-awtorità makroprudenzjali;
• c. ma għandhomx ipaċu l-P2G kontra l-bafers tar-riskju sistemiku. (Il-bafers tal-G-SII/O-SII u l-bafer tar-riskju sistemiku), peress li dawn huma maħsuba biex ikopru r-riskji li istituzzjoni toħloq għas-sistema finanzjarja;
• d. ma għandhomx ipaċu l-P2G-LR mar-rekwiżit tal-bafer tal-proporzjon ta’ ingranaġġ ta’ G-SII speċifikat fl-Artikolu 92(1a) tar-Regolament (UE) 575/2013;
• e. jistgħu jirrevedu l-P2G ikkomunikat lil dik l-istituzzjoni biex jiżguraw li l-kalibrazzjoni tiegħu tibqa’ xierqa meta istituzzjoni ssir marbuta mal-minimu tal-output, f’konformità mal-Artikolu 104b(4a) tad-Direttiva 2013/36/UE.

Meta l-awtoritajiet kompetenti jiddeterminaw il-P2G, huma għandhom iżidu din il-gwida mal-OCR. Meta l-awtoritajiet kompetenti jiddeterminaw il-P2G-LR, huma għandhom iżidu din il-gwida mal-OLRR. L-awtoritajiet kompetenti għandhom iqisu l-OCR u l-OLRR bħala żewġ stacks separati ta’ rekwiżiti. Konsegwentement, il-fondi proprji disponibbli jistgħu jintużaw fl-istess ħin biex jissodisfaw il-P2G u l-P2G-LR.