5.8. Riskji tal-ML/TF u tħassib prudenzjali

Meta janalizzaw il-qafas ta’ governanza interna u l-kontrolli fl-istituzzjoni kollha, l-awtoritajiet kompetenti għandhom iqisu wkoll il-valutazzjonijiet riċevuti mis-superviżuri fil-qasam tal-AML/CFT u jevalwaw jekk dawn jagħtux lok għal tħassib prudenzjali. Min-naħa l-oħra, fejn il-valutazzjoni tal-awtorità kompetenti tindika li n-nuqqasijiet fil-qafas tal-kontrolli interni u tal-governanza ta’ istituzzjoni u fil-kontrolli fl-istituzzjoni kollha jwasslu għal tħassib prudenzjali relatat mar-riskju tal-ML/TF u riskji ta’ nuqqas ta’ implimentazzjoni u ta’ evażjoni ta’ sanzjonijiet finanzjarji mmirati, l-awtoritajiet kompetenti għandhom jikkondividu l-eżitu ta’ dik il-valutazzjoni mas-superviżuri fil-qasam tal-AML/CFT.

L-awtoritajiet kompetenti għandhom jivvalutaw jekk il-qafas globali ta’ governanza interna u ta’ ġestjoni tar-riskju tal-istituzzjoni jinkludix ukoll il-ġestjoni tar-riskji ML/TF u tar-riskji ta’ nuqqas ta’ implimentazzjoni u ta’ evażjoni ta’ sanzjonijiet finanzjarji mmirati.

L-awtoritajiet kompetenti għandhom jivvalutaw minn perspettiva prudenzjali jekk ir-rwoli u r-responsabbiltajiet tal-korp maniġerjali fir-rigward tal-qafas tal-AML/CFT humiex qed jiġu rrispettati. L-awtoritajiet kompetenti għandhom iqisu kwalunkwe informazzjoni supplimentari riċevuta mis-superviżuri fil-qasam tal-AML/CFT wara l-valutazzjoni tagħhom f’konformità mal-Linji Gwida tal-EBA dwar il-politiki u l-proċeduri fir-rigward tal-ġestjoni tal-konformità u r-rwol u r-responsabbiltajiet tal-Uffiċjal tal-Konformità tal-AML/CFT²⁶ .

²⁶ EBA/GL/2022/05