7.2. Determinazzjoni tar-rekwiżit tal-Pilastru 2 għal riskji minbarra r-riskju ta’ ingranaġġ eċċessiv (P2R)

L-awtoritajiet kompetenti għandhom jiddeterminaw il-P2R għal riskji għajr ir-riskju ta’ ingranaġġ eċċessiv, meta jidentifikaw kwalunkwe waħda mis-sitwazzjonijiet elenkati fl-Artikolu 104a(1) tad-Direttiva 2013/36/UE għal istituzzjoni, inkluż b’mod partikolari:

• a. ir-riskju ta’ telf mhux mistenni, u ta’ telf mistenni mhux kopert biżżejjed mid-dispożizzjonijiet, fuq perjodu ta’ 12-il xahar (ħlief fejn ir-Regolament (UE) 575/2013 jispeċifika r-rekwiżiti ta’ fondi proprji fuq perjodu differenti), li l-istituzzjonijiet individwali qed jiffaċċjaw minħabba l-attivitajiet tagħhom, inklużi dawk li jirriflettu l-impatt ta’ ċerti żviluppi ekonomiċi u tas-suq;
• b. nuqqasijiet fil-mudell għall-approċċi interni tal-kalkolu tar-rekwiżiti ta’ fondi proprji (“nuqqasijiet fil-mudell regolatorju”) kif ivvalutati fil-kuntest tal-Artikolu 101 tad-Direttiva 2013/36/UE, esklużi dawk diġà koperti mill-fatt li istituzzjoni saret soġġetta għall-minimu tal-output f’konformità mal-Artikolu 92 tar-Regolament 575/2013;
• c. nuqqasijiet fil-governanza interna, inklużi l-arranġamenti ta’ kontroll intern u nuqqasijiet oħrajn, kif ukoll riskju li jirriżulta mill-mudell tan-negozju tal-istituzzjoni, identifikati wara l-valutazzjoni tar-riskju deskritta fit-Titoli 4 sa 6, fejn miżuri superviżorji oħrajn ma kinux effettivi jew jitqiesu insuffiċjenti biex jindirizzaw in-nuqqasijiet identifikati.

7.2.1. Determinazzjoni tal-fondi proprji addizzjonali biex ikopru telf mhux mistenni

Meta jistabbilixxu l-P2R għar-riskju ta’ telf mhux mistenni skont il-punt (a) tal-paragrafu li ġej, l-awtoritajiet kompetenti għandhom jikkunsidraw kull tip ta’ riskju li jista’ jipperikola l-pożizzjoni tal-kapital tal-istituzzjoni. L-awtoritajiet kompetenti għandhom jistabbilixxu l-P2R biex ikopri r-riskju ta’ telf mhux mistenni billi jiddeterminaw il-kapital meqjus adegwat biex ikopri t-tip ta’ riskju u jnaqqsu l-parti rilevanti tal-P1R.

L-awtoritajiet kompetenti għandhom jiddeterminaw fuq bażi ta’ riskju b’riskju, l-ammonti tal-kapital meqjusa adegwati, billi jidentifikaw, jivvalutaw u jikkwantifikaw ir-riskji li l-istituzzjoni tkun esposta għalihom, filwaqt li jieħdu inkunsiderazzjoni l-profil sħiħ tar-riskju tagħha. Id-determinazzjoni tal-ammonti ta’ kapital meqjusa adegwati għandha tinkludi:

• a. riskji speċifiċi għall-istituzzjoni jew elementi ta’ riskji li ma humiex koperti mill-P1R;
• b. riskji speċifiċi għall-istituzzjoni jew elementi ta’ tali riskji li ma humiex koperti biżżejjed mill-P1R.

L-awtoritajiet kompetenti għandhom jiżguraw li l-ammont ta’ kapital meqjus adegwat biex ikopri kull riskju identifikat f’konformità mal-Artikoli 79 sa 85 u 87a tad-Direttiva 2013/36/UE ma jkunx inqas mill-parti rilevanti tal-P1R applikabbli li jkopri dak ir-riskju. F’każijiet eċċezzjonali fejn ikun ta’ piż eċċessiv, speċjalment għal istituzzjonijiet żgħar, li jiżolaw b’mod sinifikanti l-ammont ta’ kapital meqjus adegwat fuq bażi ta’ riskju b’riskju, l-awtoritajiet kompetenti għandhom jikkonformaw mal-ewwel sentenza ta’ dan il-paragrafu fuq il-bażi tal-aħjar sforz, billi jużaw il-kalkoli tal-ICAAP, il-ġudizzju superviżorju u sorsi oħra ta’ informazzjoni.

Meta jidentifikaw, jivvalutaw u jikkwantifikaw ir-riskji li għalihom hija esposta l-istituzzjoni, l-awtoritajiet kompetenti għandhom jiddependu fuq is-sorsi ta’ informazzjoni li ġejjin:

• a. l-ICAAP u l-eżiti tal-valutazzjoni tagħha mill-awtorità kompetenti, inklużi l-kalkoli tal-ICAAP fejn jitqiesu affidabbli jew parzjalment affidabbli f’konformità mal-paragrafi 306 sa 308;
• b. rapportar superviżorju;
• c. l-eżitu tal-valutazzjoni superviżorja, inkluż kwalunkwe attività superviżorja preċedenti rilevanti, u l-valutazzjoni komparattiva, kif ukoll inputs rilevanti oħra, inklużi dawk li jirriżultaw mill-interazzjoni u d-djalogu mal-istituzzjoni.

L-ICAAP u l-eżiti tal-valutazzjoni tiegħu għandhom jitqiesu mill-awtoritajiet kompetenti bħala wieħed mill-inputs ewlenin għall-identifikazzjoni u l-valutazzjoni tar-riskji rilevanti għall-istituzzjoni. Id-determinazzjoni tal-ammont ta’ kapital meqjus bħala adegwat u tal-P2R fuq bażi ta’ riskju b’riskju għandha tqis il-kalkoli tal-ICAAP jekk jitqiesu affidabbli jew parzjalment affidabbli, kif ukoll l-eżiti tal-valutazzjoni komparattiva superviżorja u inputs rilevanti oħra kif xieraq, inkluż il-ġudizzju superviżorju.

Għall-finijiet tal-Artikolu 98(1), il-punt (f) tad-Direttiva 2013/36/UE u d-determinazzjoni tal-P2R, l-awtoritajiet kompetenti għandhom jivvalutaw u jikkunsidraw l-effetti tad-diversifikazzjoni li jirriżultaw minn fatturi ewlenin ġeografiċi, settorjali jew kwalunkwe fattur ewlieni rilevanti ieħor fi ħdan kull kategorija tar-riskju materjali (diversifikazzjoni intrariskju). Għal kull wieħed mir-riskji għall-kapital koperti mir-Regolament (UE) 575/2013, tali effetti tad-diversifikazzjoni m’għandhomx inaqqsu r-rekwiżiti ta’ fondi proprji minimi kkalkolati f’konformità mal-Artikolu 92 tar-Regolament (UE) 575/2013.

Madankollu, id-diversifikazzjoni bejn ir-riskji f’kategoriji differenti, inklużi dawk koperti mir-Regolament (UE) 575/2013 (diversifikazzjoni interriskju) ma għandhomx jitqiesu bħala parti mid-determinazzjoni tal-P2R. Kalkoli tal-ICAAP

L-awtoritajiet kompetenti għandhom jivvalutaw l-affidabbiltà tal-kalkoli tal-ICAAP billi jivvalutaw jekk humiex:

• a. granulari: il-kalkoli/metodoloġiji għandhom jippermettu li l-kalkoli jitqassmu skont it-tip ta’ riskju, aktar milli jippreżentaw kalkolu uniku (kapital ekonomiku) li jkopri r-riskji kollha.
• b. kredibbli: il-kalkoli/metodoloġiji użati għandhom ikopru b’mod ċar ir-riskju li qegħdin ifittxu li jindirizzaw (eż. il-kalkolu tar-riskju ta’ konċentrazzjoni tal-kreditu għandu juża diżaggregazzjonijiet tas-settur xierqa li jirriflettu l-korrelazzjonijiet u l-kompożizzjonijiet tal-portafoll attwali) u għandhom ikunu robusti, stabbli, sensittivi għar-riskju u konservattivi biżżejjed biex jikkwantifikaw b’mod adegwat it-telf assoċjat mar-riskji. Tali kalkoli/metodoloġiji għandhom ikunu konsistenti mal-proċessi strateġiċi tal-istituzzjonijiet, inkluż l-aptit għar-riskju tal-istituzzjonijiet.
• c. jinftiehmu: il-fatturi ewlenin sottostanti u s-suppożizzjonijiet ewlenin tal-kalkoli/metodoloġiji għandhom ikunu speċifikati b’mod ċar. Il-kalkolu ta’ “kaxxa sewda” ma għandux ikun aċċettabbli. L-awtoritajiet kompetenti għandhom jiżguraw li l-istituzzjoni tipprovdi spjegazzjoni tas-suppożizzjonijiet ewlenin użati, inklużi mill-inqas il-perjodu ta’ żmien, il-livelli ta’ fiduċja, is-suppożizzjonijiet ta’ korrelazzjoni, il-parametri ewlenin, l-aktar żoni fallibbli tal-mudelli użati, u kif dawn jitqiesu u jiġu kkoreġuti fil-kalkolu finali tal-ICAAP;
• d. komparabbli: il-kalkoli/metodoloġiji għandhom isemmu b’mod ċar is-suppożizzjonijiet prinċipali f’termini tal-livell globali ta’ konservattiviżmu, il-perjodi ta’ żamma/perjodi ta’ riskju u l-livelli ta’ fiduċja (jew kejl ekwivalenti) sabiex ikun jista’ jsir l-aġġustament li jista’ jintalab jew jiġi promulgat mill-awtoritajiet kompetenti sabiex tiġi ffaċilitata l-komparabbiltà mal-pari u l-valutazzjoni komparattiva superviżorja.

L-awtoritajiet kompetenti għandhom jivvalutaw aktar l-affidabbiltà tal-kalkoli tal-ICAAP billi jqabbluhom mal-eżitu tal-punti ta’ riferiment superviżorji għall-istess riskji, u inputs rilevanti oħrajn.

Il-kalkolu tal-ICAAP għandu jiġi kkunsidrat parzjalment affidabbli meta, minkejja li ma jilħaqx il-kriterji kollha tal-paragrafu 306, il-kalkolu xorta jidher kredibbli ħafna, għalkemm dan għandu jkun fuq bażi eċċezzjonali u akkumpanjat minn passi biex jittejbu n-nuqqasijiet identifikati fil-kalkolu tal-ICAAP.

Punti ta’ riferiment superviżorji u inputs rilevanti oħrajn

L-awtoritajiet kompetenti għandhom jiżviluppaw u japplikaw punti ta’ riferiment superviżorji speċifiċi għar-riskju bħala mezz biex jikkontestaw il-kalkoli tal-ICAAP għal dawk ir-riskji materjali, jew elementi ta’ riskji bħal dawn, li ma humiex koperti jew ma humiex koperti biżżejjed mir-Regolament (UE) 575/2013, jew biex ikomplu jappoġġaw id-determinazzjoni tal-P2R riskju b’riskju, speċjalment fejn il-kalkoli tal-ICAAP għal dawk ir-riskji materjali, jew l-elementi ta’ riskji bħal dawn, jitqiesu inaffidabbli jew ma jkunux disponibbli.

Il-punti ta’ riferiment superviżorji għandhom jiġu żviluppati biex jipprovdu miżura prudenti, konsistenti (jiġifieri, kif applikabbli, ikkalibrata għal perjodi ta’ żamma/orizzonti ta’ riskju u livelli ta’ kunfidenza ekwivalenti kif meħtieġ mir-Regolament (UE) 575/2013), trasparenti u komparabbli li biha jiġi kkalkolat u mqabbel bejn l-istituzzjonijiet il-kapital meqjus adegwat għal riskju partikolari.

Meta japplikaw il-punti ta’ riferiment superviżorji, l-awtoritajiet kompetenti għandhom jikkunsidraw il-mudell tan-negozju tal-istituzzjonijiet u, sa fejn ikun xieraq, jikkomplementawhom bl-applikazzjoni tal-ġudizzju superviżorju biex iqisu kunsiderazzjonijiet speċifiċi għall-mudell tan-negozju u speċifiċi għall-istituzzjoni.

L-awtoritajiet kompetenti għandhom jużaw inputs rilevanti oħra biex jappoġġaw id-determinazzjoni tal-P2R riskju b’riskju. Inputs rilevanti oħrajn jistgħu jinkludu l-eżiti tal-valutazzjonijiet tar-riskju (skont il-kriterji speċifikati fit-Titolu 6), it-tqabbil bejn il-pari, inklużi r-rapport(i) u l-punti ta’ riferiment maħruġa mill-EBA.

Inputs rilevanti oħrajn għandhom iwasslu lill-awtorità kompetenti biex tivvaluta mill-ġdid l-adegwatezza/affidabbiltà ta’ ICAAP/punti ta’ riferiment superviżorji għal riskju speċifiku, u/jew tagħmel aġġustamenti għall-eżitu, fejn iqanqlu dubji dwar il-preċiżjoni tiegħu.

Biex jiżguraw il-konsistenza fid-determinazzjoni tal-P2R, l-awtoritajiet kompetenti għandhom jużaw l-istess gruppi ta’ pari stabbiliti biex janalizzaw ir-riskji għall-kapital kif speċifikati fit-Titolu 6.

Meta l-awtoritajiet kompetenti jieħdu inkunsiderazzjoni l-punti referenzjarji superviżorji kif ukoll inputs rilevanti oħrajn għad-determinazzjoni tal-P2R, bħala parti mid-djalogu mal-istituzzjoni, huma għandhom jispjegaw ir-raġunament u l-prinċipji sottostanti ġenerali wara l-inputs użati.

7.2.2. Determinazzjoni tal-fondi proprji jew miżuri oħrajn li jkopru n-nuqqasijiet tal-mudell regolatorju mhux koperti mill-fatt li istituzzjoni tkun saret marbuta bil-minimu tal-output

Jekk, matul ir-reviżjoni kontinwa tal-approċċi interni għall-kalkolu tar-rekwiżiti ta’ fondi proprji, l-awtoritajiet kompetenti jidentifikaw nuqqasijiet fil-mudell li jistgħu jwasslu għal sottovalutazzjoni tal-P1R, huma għandhom jistabbilixxu l-P2R biss fejn dan jiġi determinat li hu aktar xieraq minn miżuri superviżorji oħra. L-awtoritajiet kompetenti għandhom jistabbilixxu l-P2R biss biex ikopru dawn in-nuqqasijiet:

• a. fejn ma jkunx possibbli li jiġu indirizzati taħt il-P1R permezz ta’ miżuri superviżorji oħra, bħal pereżempju li l-istituzzjonijiet jiġu obbligati jaġġustaw il-mudelli tagħhom jew japplikaw marġni xieraq ta’ konservattiviżmu għall-istimi tagħhom;
• b. billi jqisu jekk l-istituzzjoni tkunx saret marbuta bil-minimu tal-output f’konformità mal-Artikolu 92 tar-Regolament (UE) 575/2013 u, jekk dan ikun il-każ, jipproċedu kif spjegat fil-paragrafu li jmiss. Tali P2R għandu jiġi stabbilit biss bħala miżura interim waqt li jiġu indirizzati n-nuqqasijiet.

Meta istituzzjoni ssir marbuta bil-minimu tal-output kif stabbilit fl-Artikolu 92(3) tar-Regolament (UE) 575/2013, l-awtoritajiet kompetenti għandhom:

• a. jiżguraw li l-ammont nominali ta’ P2R ma jiżdiedx awtomatikament minħabba li l-istituzzjoni ssir marbuta mal-minimu tal-output (“limitu massimu temporanju”), f’konformità mal-Artikolu 104a(6), il-punt (a) tad-Direttiva 2013/36/UE. Għal dan il-għan, il-perċentwal applikabbli tal-P2R li kien ġie kkomunikat qabel lill-istituzzjoni mill-awtorità kompetenti wara l-aħħar ċiklu tal-SREP se jiġi applikat għat-TREA bla minimu (U-TREA) tal-istituzzjoni, kif stabbilit fl-Artikolu 92(4) tar-Regolament (UE) 575/2013. Dan l-approċċ se jibqa’ fis-seħħ sakemm titwettaq ir-reviżjoni deskritta fil-punt b;
• b. mingħajr dewmien, u mhux aktar tard mid-data tat-tmiem tal-SREP li jmiss, trid issir ir-reviżjoni tal-P2R impost fuq l-istituzzjoni f’konformità mal-Artikolu 104(1), il-punt (a) tad-Direttiva 2013/36/UE. Bħala parti minn din ir-reviżjoni, l-awtoritajiet kompetenti għandhom:
• i. ineħħu kwalunkwe parti tal-P2R li tista’ tkun qed tkopri nuqqasijiet fil-mudell regolatorju għall-kalkolu tar-rekwiżiti ta’ fondi proprji li diġà hija koperta mill-minimu tal-output, sabiex jiġi eliminat kwalunkwe effett potenzjali ta’ għadd doppju;
• ii. jikkunsidraw jekk hemmx effetti aritmetiċi (jiġifieri fejn iż-żieda fl-ammont nominali tal-P2R ma tkunx minħabba żieda fir-riskju iżda tirriżulta mill-P2R li jkun espress bħala perċentwal tat-TREA) fuq l-ammont nominali tal-P2R li jirriżulta miż-żieda awtomatika fit-TREA minħabba l-fatt li l-istituzzjoni saret marbuta mal-minimu tal-output, u jneħħuhom kif xieraq;
• c. jikkomunikaw lill-istituzzjonijiet ir-rekwiżiti ta’ fondi proprji applikabbli wara r-reviżjoni fil-punt (b), billi jenfasizzaw, b’mod partikolari, kwalunkwe sejba relatata ma’ elementi ta’ għadd doppju. L-awtoritajiet kompetenti jistgħu wkoll jirrikjedu li l-istituzzjonijiet jiżvelaw, bħala parti mir-rapportar tal-Pilastru 3 tagħhom, l-impatt tal-limitu massimu temporanju jew ir-reviżjoni tal-għadd doppju – skont liema jkun applikabbli fid-data ta’ referenza – fuq il-P2R irrapportat.

Għall-finijiet tal-paragrafu preċedenti, l-awtoritajiet kompetenti għandhom jinkoraġġixxu l-istituzzjonijiet biex jinformawhom fi stadju bikri meta jipprevedu (fuq il-bażi ta’ stimi) li jistgħu jsiru marbuta bil-minimu tal-output. Dan sabiex tiġi ffaċilitata kemm jista’ jkun, ir-reviżjoni tal-elementi tal-għadd doppju deskritti fil-paragrafu preċedenti.

L-awtoritajiet kompetenti għandhom iwettqu r-reviżjoni deskritta fil-paragrafu 317 fil-mument li istituzzjoni ssir marbuta għall-ewwel darba bil-minimu tal-output. Wara l-konklużjoni ta’ din ir-reviżjoni, il-limitu massimu temporanju fuq il-P2R ma japplikax, u l-P2R ikkomunikat mill-awtoritajiet kompetenti japplika għat-TREA bil-minimu. L-awtoritajiet kompetenti għandhom iqisu l-fatt li sakemm istituzzjoni tkun marbuta bil-minimu tal-output, ma għandu jiġi impost l-ebda rekwiżit addizzjonali ta’ fondi proprji li jgħoddu darbtejn ir-riskji li diġà huma koperti bis-sħiħ mill-fatt li l-istituzzjoni hija marbuta bil-minimu tal-output, f’konformità mal-Artikolu 104a(8) tad-Direttiva 2013/36/UE, u f’konformità mal-paragrafu 294. 7.2.3. Determinazzjoni tal-fondi proprji jew miżuri oħrajn biex jiġu koperti nuqqasijiet oħra

L-awtoritajiet kompetenti għandhom jistabbilixxu l-P2R biex ikopru nuqqasijiet – identifikati wara l-valutazzjoni tar-riskju deskritta fit-Titoli 4 sa 6 – fejn miżuri superviżorji oħra ma kinux effettivi jew huma meqjusa insuffiċjenti biex jindirizzaw in-nuqqasijiet identifikati. L-awtoritajiet kompetenti għandhom jistabbilixxu tali P2R biss bħala miżura interim waqt li jkunu qed jiġu indirizzati n-nuqqasijiet.

L-awtoritajiet kompetenti għandhom jistabbilixxu l-P2R biss biex ikopru r-riskju ta’ finanzjament – identifikat wara l-valutazzjoni tar-riskju deskritta fit-Titolu 8 – fejn dan jiġi determinat li jkun aktar xieraq minn miżuri superviżorji oħra.

Meta istituzzjoni ripetutament tonqos milli tistabbilixxi jew iżżomm livell adegwat ta’ fondi proprji biex tkopri l-P2G, l-awtoritajiet kompetenti għandhom jistabbilixxu l-P2R biex ikopru dak ir-riskju addizzjonali mhux aktar tard minn sentejn wara l-ksur tal-gwida. L-awtoritajiet kompetenti jistgħu jipposponu dik id-deċiżjoni meta jippermettu lill-istituzzjonijiet joperaw taħt il-livell ta’ gwida minħabba kundizzjonijiet ekonomiċi jew tas-suq jew ċirkostanzi speċifiċi għall-istituzzjoni, f’konformità mal-paragrafi 452 u 453.

7.2.4. Determinazzjoni tal-kompożizzjoni tar-rekwiżiti tal-Pilastru 2

Fejn meħtieġ, u billi jitqiesu ċ-ċirkostanzi speċifiċi tal-istituzzjoni, l-awtoritajiet kompetenti jistgħu jiddeċiedu li jitolbu lill-istituzzjoni biex tkopri l-P2R b’kapital ta’ kwalità ogħla minn dak imsemmi fl-Artikolu 104a(4) tad-Direttiva 2013/36/UE⁴² . Din id-deċiżjoni għandha tkun iġġustifikata b’mod ċar, filwaqt li tenfasizza ċ-ċirkostanzi speċifiċi li wasslu għaliha. Fil-ġustifikazzjonijiet tagħhom l-awtoritajiet kompetenti għandhom jirreferu għal elementi bħal:

• a. in-natura speċifika tal-istituzzjoni, l-istruttura tal-parteċipazzjoni azzjonarja tagħha u, fejn rilevanti, l-istruttura tal-grupp, li potenzjalment jaffettwaw il-possibbiltà li jinġabar kapital;
• b. in-natura speċifika tar-riskju li tiffaċċja l-istituzzjoni, li potenzjalment twassal għal tnaqqis partikolarment rapidu tal-kapital tas-CET1.

⁴² Mill-inqas 56.25 % CET1 u mill-inqas 75 % Grad 1.