7.3. Rekwiżiti tal-Pilastru 2 għar-riskju ta’ ingranaġġ eċċessiv (P2R-LR)

Meta, bħala riżultat tar-riskju ta’ valutazzjoni ta’ ingranaġġ eċċessiv, f’konformità mal-Artikolu 104a(3) u (4), tad-Direttiva 2013/36/UE, l-awtoritajiet kompetenti jiddeterminaw il-P2R-LR biex jindirizzaw dan ir-riskju, huma għandhom iżidu dan ir-rekwiżit mar-rekwiżit ta’ fondi proprji bbażat fuq il-proporzjon ta’ ingranaġġ kif stabbilit fl-Artikolu 92(1), il-punt (d), tar-Regolament (UE) 575/2013 u mhux mal-P1R ibbażat fuq it-TREA kif stabbilit fl-Artikolu 92(1), il-punti (a) sa (c). L-awtoritajiet kompetenti għandhom jikkunsidraw ir-rekwiżit tal-proporzjon ta’ ingranaġġ u l-P2R-LR bħala stack separat mir-rekwiżiti bbażati fuq it-TREA u l-P2R għat-tipi l-oħra kollha ta’ riskju (jiġifieri l-fondi proprji disponibbli jistgħu jintużaw fl-istess ħin biex jiġu ssodisfati r-rekwiżiti fl-istack ibbażat fuq it-TREA u fl-istack ibbażat fuq il-proporzjon ta’ ingranaġġ tar-rekwiżiti ta’ fondi proprji).

7.3.1. Valutazzjoni tar-riskju ta’ ingranaġġ eċċessiv

F’konformità mal-kunċett tal-proporzjon tal-ingranaġġ (u l-istack ta’ rekwiżiti tiegħu) bħala garanzija ta’ kontinġenza għar-rekwiżiti ta’ fondi proprji bbażati fuq it-TREA, fil-valutazzjoni tar-riskju ta’ ingranaġġ eċċessiv, l-awtoritajiet kompetenti għandhom jiffokaw fuq vulnerabbiltajiet materjali potenzjali mhux koperti jew mhux koperti biżżejjed mir-rekwiżiti ta’ fondi proprji kif stabbilit fl-Artikolu 92(1) il-punt (d), tar-Regolament (UE) 575/2013 li jistgħu jirrikjedu miżuri korrettivi għall-attivitajiet kummerċjali tal-istituzzjoni, li ma kinux previsti fil-pjan ta’ direzzjoni tan-negozju tagħha.

Fil-valutazzjoni tar-riskju ta’ ingranaġġ eċċessiv, l-awtoritajiet kompetenti għandhom jikkunsidraw l-aspetti kollha li ġejjin u jadattaw il-profondità tal-valutazzjoni ta’ kull aspett f’konformità mar-rilevanza tiegħu għall-istituzzjoni:

• a. L-elementi ta’ riskju ta’ ingranaġġ eċċessiv li huma meqjusa bħala mhux koperti jew li ma humiex koperti biżżejjed mir-rekwiżit ta’ fondi proprji tal-proporzjon ta’ ingranaġġ stabbilit fl-Artikolu 92(1) il-punt (d) tar-Regolament (UE) 575/2013, b’riżultat b’mod partikolari ta’:
• i. arbitraġġ regolatorju/ottimizzazzjoni tal-proporzjon ta’ ingranaġġ billi jiġu skambjati l-iskoperturi magħduda fil-proporzjon ta’ ingranaġġ għal skoperturi ekonomikament simili li jistgħu jingħaddu inqas fil-kalkolu tal-iskopertura tal-proporzjon ta’ ingranaġġ;
• ii. arbitraġġ regolatorju/ottimizzazzjoni billi tiġi mminimizzata l-iskopertura tal-proporzjon ta’ ingranaġġ fil-forma ta’ tnaqqis temporanju tal-volumi ta’ tranżazzjonijiet fi swieq finanzjarji ewlenin (b’mod partikolari fis-suq monetarju, f’ċerti attivitajiet bħal SFTs, iżda wkoll fis-suq tad-derivattivi) madwar id-dati ta’ referenza, li jirriżultaw fir-rapportar u d-divulgazzjoni pubblika ta’ proporzjonijiet ta’ ingranaġġ għoljin (“attivitajiet ta’ window-dressing”);
• iii. karatteristiċi speċifiċi tal-mudell tan-negozju, tal-attivitajiet kummerċjali jew ta’ idjosinkraziji bankarji oħra li jew iżidu jew inaqqsu l-punt sa fejn l-istituzzjoni tkun esposta għar-riskju ta’ ingranaġġ eċċessiv, iżda ma humiex koperti jew ma humiex koperti biżżejjed fil-kalkolu tal-proporzjon ta’ ingranaġġ. L-awtoritajiet kompetenti għandhom jikkunsidraw, fejn applikabbli, skoperturi għoljin għal opzjonijiet mibjugħa fuq l-ekwità jew pożizzjonijiet qosra permezz ta’ derivattivi ta’ kreditu li jista’ jkollhom skopertura elevata għal telf massimu, peress li dawn il-pożizzjonijiet ma humiex koperti bis-sħiħ fl-iskopertura tal-proporzjon ta’ ingranaġġ (b’kuntrast ma’, pereżempju, derivattivi ta’ kreditu mibjugħa), u konċentrazzjonijiet f’ċerti entrati li ma jidhrux fil-karta bilanċjali fejn l-idjosinkraziji inerenti għall-attivitajiet kummerċjali tal-istituzzjoni jistgħu jwasslu għal żieda fil-volatilità tal-prelevamenti.
• b. l-elementi ta’ riskju ta’ ingranaġġ eċċessiv li huma espliċitament esklużi mir-rekwiżit ta’ fondi proprji tal-proporzjon ta’ ingranaġġ jew li ma humiex indirizzati b’mod espliċitu minnu, inkluż minħabba l-esklużjonijiet elenkati fl-Artikolu 429a tar-Regolament (UE) 575/2013, b’mod partikolari fejn ikun hemm tħassib dwar il-valutazzjoni tal-konformità kontinwa mal-kundizzjonijiet għal dawn l-esklużjonijiet u fejn id-dipendenza fuq esklużjoni unika tkun sinifikanti ħafna għall-istituzzjoni u l-ammont eskluż ikun volatili bla bżonn;
• c. it-tibdil fil-proporzjon ta’ ingranaġġ tal-istituzzjoni u l-komponenti tiegħu, inkluż l-impatt prevedibbli tat-telf kurrenti u futur mistenni fuq il-proporzjon ta’ ingranaġġ, filwaqt li jitqies il-mudell tan-negozju tal-istituzzjoni.

7.3.2. Determinazzjoni tal-P2R-LR

L-awtoritajiet kompetenti għandhom jiddeterminaw il-P2R-LR bħala d-differenza bejn il-kapital meqjus adegwat biex ikopri r-riskju ta’ ingranaġġ eċċessiv u r-rekwiżiti ta’ fondi proprji tal-proporzjon ta’ ingranaġġ kif stabbilit fl-Artikolu 92(1), il-punt (d), tar-Regolament (UE) 575/2013. Dan l-ammont ma jistax ikun negattiv.

Meta jistabbilixxu l-P2R-LR, l-awtoritajiet kompetenti għandhom jikkunsidraw b’mod partikolari:

• a) elementi ta’ riskju ta’ ingranaġġ eċċessiv li jitqiesu li ma humiex koperti jew li ma humiex koperti biżżejjed mir-rekwiżit ta’ fondi proprji tal-proporzjon ta’ ingranaġġ stabbilit fl-Artikolu 92(1), il-punt (d) tar-Regolament (UE) 575/2013, b’mod partikolari fejn il-valutazzjoni tal-aspetti deskritti fil-paragrafi 325 u 326 jindikaw vulnerabbiltà għolja meta mqabbla mal-iskopertura tal-proporzjon ta’ ingranaġġ;
• b) elementi ta’ riskju ta’ ingranaġġ eċċessiv li huma esklużi b’mod espliċitu mir-rekwiżit ta’ fondi proprji tal-proporzjon ta’ ingranaġġ jew li ma humiex indirizzati b’mod espliċitu minnu, inkluż minħabba l-esklużjonijiet elenkati fl-Artikolu 429a(1), tar-Regolament (UE) 575/2013, ivvalutati f’konformità mal-paragrafu 326, il-punt b. L-awtoritajiet kompetenti għandhom jistabbilixxu l-P2R-LR biss f’dawk il-każijiet fejn l-użu partikolarment estensiv ta’ ċerta esklużjoni jirriżulta f’livell ta’ proporzjon ta’ ingranaġġ li ma jirriflettix b’mod xieraq ir-riskju ffaċċjat mill-istituzzjoni.

L-awtoritajiet kompetenti għandhom jidentifikaw, jivvalutaw u jikkwantifikaw ir-riskju ta’ ingranaġġ eċċessiv skont is-sorsi ta’ informazzjoni u l-metodi stabbiliti fil-paragrafi 302 u 303, sal-punt li jkunu rilevanti għal dan ir-riskju.

7.3.3. Kompożizzjoni tal-P2R-LR

L-awtoritajiet kompetenti għandhom iżidu l-P2R-LR mar-rekwiżit minimu tal-proporzjon ta’ ingranaġġ tal-Grad 1. Sabiex jissodisfaw dan ir-rekwiżit addizzjonali, l-istituzzjonijiet għandhom ikunu jistgħu jużaw ukoll kwalunkwe kapital tal-Grad 1.

Fejn meħtieġ, u wara li jikkunsidraw iċ-ċirkostanzi speċifiċi tal-istituzzjonijiet, l-awtoritajiet kompetenti jistgħu jiddeċiedu li jitolbu lill-istituzzjonijiet ikopru l-P2R-LR bi kwalità ogħla ta’ kapital minn dik speċifikata fil-paragrafu preċedenti. Din id-deċiżjoni għandha tkun iġġustifikata b’mod ċar, filwaqt li tenfasizza ċ-ċirkostanzi speċifiċi li wasslu għaliha, filwaqt li tqis is-sitwazzjoni ta’ riskju individwali tal-istituzzjoni u tqis sitwazzjonijiet fejn il-materjalizzazzjoni tar-riskju ta’ ingranaġġ eċċessiv tista’ teħtieġ kwalità ogħla ta’ kapital biex tkopri t-telf potenzjali.