8.2. Valutazzjoni tar-riskju ta’ likwidità inerenti

L-awtoritajiet kompetenti għandhom jivvalutaw ir-riskju ta’ likwidità tal-istituzzjoni fuq terminu qasir u fuq terminu medju fuq sett xieraq ta’ perjodi ta’ żmien, inklużi perjodi tal-istess ġurnata, biex jiżguraw li l-istituzzjoni żżomm livelli adegwati ta’ bafers ta’ likwidità, kemm taħt kundizzjonijiet normali kif ukoll taħt kundizzjonijiet ta’ stress. Din il-valutazzjoni tinkludi l-elementi li ġejjin:

• a. evalwazzjoni tal-ħtiġijiet ta’ likwidità fuq terminu qasir u medju;
• b. evalwazzjoni tar-riskju ta’ likwidità tal-istess ġurnata;
• c. evalwazzjoni tal-bafer ta’ likwidità u l-kapaċità ta’ kontrobilanċ;
• d. ittestjar tal-istress fuq il-likwidità superviżorju.

Għall-valutazzjoni tal-ħtiġijiet ta’ likwidità, tal-bafers u tal-kapaċità ta’ kontrobilanċ taħt kundizzjonijiet normali, l-awtoritajiet kompetenti għandhom jappoġġaw l-analiżi b’evidenza mill-mudelli ta’ rapportar għal metriċi ta’ monitoraġġ addizzjonali kif speċifikat fl-ITS dwar ir-rapportar superviżorju. Meta jivvalutaw il-ħtiġijiet ta’ likwidità f’kundizzjonijiet ta’ stress, l-awtoritajiet kompetenti għandhom jikkunsidraw ukoll azzjonijiet li l-istituzzjonijiet jistgħu jieħdu biex jippreservaw ir-reputazzjoni/il-franchise tagħhom. Dan għandu jikkunsidra l-effetti reputazzjonali ta’ kontropartijiet kbar tal-bejgħ bl-ingrossa u tal-bejgħ bl-imnut inklużi dawk potenzjalment skattati permezz ta’ mezzi soċjali jew mezzi oħra. L-awtoritajiet kompetenti jistgħu jwettqu evalwazzjoni tar-riskju ta’ likwidità tal-istess ġurnata u ttestjar tal-istress fuq il-likwidità inqas granulari, fejn dan ikun iġġustifikat minn materjalità aktar baxxa ta’ dawn is-sorsi ta’ riskju, speċjalment għall-istituzzjonijiet tal-Kategorija 3 u tal-Kategorija 4, u meta jiġu meqjusa r-riżultati tal-ILAAP.

Evalwazzjoni tal-ħtiġijiet ta’ likwidità fuq terminu qasir u medju

L-awtoritajiet kompetenti għandhom jivvalutaw il-ħtiġijiet ta’ likwidità tal-istituzzjoni fuq terminu qasir u medju kemm taħt kundizzjonijiet normali kif ukoll taħt dawk ta’ stress. Dawn għandhom iqisu l-effett fuq il-ħtiġijiet ta’ likwidità taħt stress tal-istituzzjoni qabel 30 jum, bejn pereżempju 30 jum u 3 xhur, u wara pereżempju tlieta sa tnax-il xahar ta’ stress sever iżda plawżibbli li jkopru xokkijiet idjosinkratiċi, fis-suq kollu u kkombinati. L-awtoritajiet kompetenti għandhom janalizzaw ukoll id-daqs, il-post u l-munita tal-ħtiġijiet ta’ likwidità u l-impatti separati ta’ xokkijiet fil-muniti materjali differenti tagħha biex jirriflettu r-riskju ta’ konvertibbiltà tal-munita u r-riskju ta’ tfixkil possibbli fl-aċċess għas-swieq tal-kambju (inklużi idjosinkraziji bħal, pereżempju, it-telf ta’ aċċess għal kont ta’ korrispondenza bankarja denominat f’munita barranija).

L-awtoritajiet kompetenti għandhom jappoġġaw il-valutazzjoni tar-riskju ta’ likwidità fuq terminu qasir billi janalizzaw l-LCR, kif speċifikat fir-Regolament Delegat tal-Kummissjoni (UE) 2015/61, inkluż jekk l-LCR huwiex imkejjel u rrapportat b’mod korrett u jidentifikax b’mod adegwat il-kopertura tal-ħtiġijiet ta’ likwidità tal-istituzzjoni. L-awtoritajiet kompetenti għandhom jivvalutaw ukoll jekk l-istituzzjonijiet humiex qed jittestjaw perjodikament il-kapaċità tagħhom li jirrapportaw l-LCR fuq bażi ta’ kuljum sabiex jiġi żgurat li l-istituzzjonijiet ikunu jistgħu jipprovdu data affidabbli f’konformità mal-Artikolu 414 tar-Regolament (UE) 575/2013 meta jkun meħtieġ.

Fl-evalwazzjoni tal-impatt tax-xokkijiet fuq il-ħtiġijiet ta’ likwidità tal-istituzzjoni, l-awtoritajiet kompetenti għandhom iqisu s-sorsi materjali kollha tar-riskju ta’ likwidità għall-istituzzjoni, b’mod partikolari:

• a. il-possibbiltà li kwalunkwe rekwiżit regolatorju applikabbli tal-UE ma jidentifikax b’mod adegwat il-ħtiġijiet ta’ likwidità tal-istituzzjoni fil-każ tat-tip ta’ xenarju ta’ stress użat għar-rekwiżit, inkluż fejn il-maturitajiet ikunu iqsar minn 30 jum;
• b. riskji li jinħolqu fir-rigward ta’ kontropartijiet bl-ingrossa fir-rigward ta’ entrati li jidhru fuq il-karta bilanċjali u konċentrazzjonijiet ta’ finanzjament. L-awtoritajiet kompetenti għandhom iqisu l-volatilità tal-finanzjament ipprovdut minn kontropartijiet li kollha jappartjenu lill-aktar setturi materjali servuti u r-riskji potenzjali ta’ kontaġju. F’dan ir-rigward, għandha tingħata attenzjoni partikolari lill-finanzjament miġbur permezz ta’ linji ta’ negozju u kanali ta’ distribuzzjoni ġodda, kif ukoll minn klijenti li jmexxu attivitajiet li għandhom livell miżjud ta’ riskju (emittenti u fornituri ta’ servizzi tal-kriptoassi);
• c. riskji li jinħolqu fir-rigward ta’ flussi ta’ flus kontinġenti/entrati li ma jidhrux fil-karta bilanċjali (pereżempju, linji ta’ kreditu, sejħiet għall-marġni) u attivitajiet (pereżempju, appoġġ ta’ likwidità għal veikoli bi skop speċjali mhux konsolidati lil hinn mill-obbligi kuntrattwali);
• d. dħul u ħruġ fuq bażi grossa, kif ukoll bażi netta; fejn ikun hemm dħul u ħruġ kbar ħafna, l-awtoritajiet kompetenti għandhom jagħtu attenzjoni speċifika għar-riskju għall-istituzzjoni meta d-dħul ma jasalx meta jkun mistenni, anke meta r-riskju ta’ ħruġ nett ikun limitat;
• e. riskji li jinħolqu fir-rigward ta’ kontropartijiet bl-imnut inklużi konċentrazzjonijiet ta’ finanzjament. Għal dan il-għan, l-awtoritajiet kompetenti għandhom jużaw il-metodoloġija dwar il-klassifikazzjoni ta’ depożiti bl-imnut f’buckets ta’ riskju differenti, skont l-Artikoli 24 u 25 tar-Regolament Delegat tal-Kummissjoni (UE) 2015/61;
• f. ir-riskju li r-riskji eċċessivi fil-profil ta’ finanzjament fuq terminu medju sa twil se jaffettwaw b’mod negattiv l-imġiba tal-kontropartijiet rilevanti għall-pożizzjoni ta’ likwidità fuq terminu qasir;
• g. ir-riskju li jirriżulta fil-kuntest ta’ depożiti fiduċjarji⁴⁵ .

⁴⁵ L-aħjar prattiki huma disponibbli fir-rapport tal-EBA: Monitoraġġ tal-implimentazzjoni tal-proporzjon ta’ kopertura tal-likwidità fl-UE – It-tieni rapport (EBA/REP/2021/07).

L-awtoritajiet kompetenti għandhom jiżguraw li l-valutazzjoni tagħhom tal-ħtiġijiet ta’ likwidità fuq terminu qasir tal-istituzzjoni tqis l-impatt tad-diġitalizzazzjoni (inkluż pereżempju pagamenti istantanji) u l-potenzjal għat-tixrid ta’ informazzjoni fuq il-media soċjali biex tiżdied il-veloċità tal-ġbid f’xenarju ta’ stress.

Evalwazzjoni tar-riskju ta’ likwidità tal-istess ġurnata

L-awtoritajiet kompetenti għandhom jivvalutaw l-iskopertura tal-istituzzjoni għar-riskju tal-likwidità tal-istess ġurnata għal perjodu ta’ żmien magħżul. Din il-valutazzjoni għandha tinkludi, bħala minimu, evalwazzjoni tal-likwidità tal-istess ġurnata disponibbli jew aċċessibbli f’kundizzjonijiet normali, kif ukoll taħt stress finanzjarju jew operazzjonali (eż. fallimenti tal-IT, restrizzjonijiet legali fuq it-trasferiment ta’ fondi, sospensjoni/terminazzjoni tal-aċċess għal servizzi ta’ korrispondenza bankarja u/jew servizzi tal-ikklerjar għal muniti, komoditajiet jew strumenti sinifikanti għall-istituzzjoni). Dan għandu jikkunsidra b’mod partikolari kif fi żminijiet ta’ stress, iż-żieda fil-ħtiġijiet ta’ kollateral tal-istess ġurnata tal-istituzzjoni tista’ tillimita l-kapaċità tagħha li tuża bafer ta’ likwidità sabiex tkopri ħruġ taħt stress meta jkun meħtieġ.

Għal dawk il-ġuriżdizzjonijiet fejn ir-rapportar fuq ir-riskju tal-istess ġurnata għadu mhux disponibbli, l-awtoritajiet kompetenti jistgħu jiddependu fuq l-analiżi tar-riskju ta’ likwidità tal-istess ġurnata tal-istituzzjoni stess.

Evalwazzjoni tal-bafer ta’ likwidità u l-kapaċità ta’ kontrobilanċ

L-awtoritajiet kompetenti għandhom jivvalutaw l-adegwatezza tal-bafer ta likwidità u tal-kapaċità ta’ kontrobilanċ tal-istituzzjoni fir-rigward tal-karatteristiċi tal-assi kkunsidrati taħt xenarji ta’ stress differenti fi żmien xahar kif ukoll fuq perjodi ta’ żmien differenti, potenzjalment sa sena, inkluż mil-lum għall-għada. Il-valutazzjoni għandha tinkludi kunsiderazzjoni tal-klassifikazzjoni u l-kwalità tal-assi likwidi (kif speċifikat fir-Regolament Delegat tal-Kummissjoni (UE) 2015/61), il-konformità tagħhom mar-rekwiżiti ġenerali u operazzjonali għal assi likwidi ta’ kwalità għolja, u jekk il-bafer ta’ likwidità u l-kapaċità ta’ kontrobilanċ humiex konformi mal-aptit għar-riskju tal-istituzzjoni.

L-awtoritajiet kompetenti għandhom jikkunsidraw fatturi li jistgħu jnaqqsu l-kapaċità tal-istituzzjoni li timmonetizza l-assi likwidi tagħha fil-ħin matul perjodu ta’ stress bħal konċentrazzjonijiet għoljin ma’ kontropartijiet jew tipi ta’ assi individwali, assi fil-bafer li huma gravati jew mislufa, u d-denominazzjoni ta’ assi likwidi f’munita differenti mill-ħtiġijiet ta’ likwidità tal-istituzzjoni. L-awtoritajiet kompetenti għandhom jikkunsidraw ukoll il-valur probabbli tal-faċilitajiet ta’ likwidità impenjati li jistgħu jkunu inklużi fil-kapaċità ta’ kontrobilanċ.

L-awtoritajiet kompetenti għandhom jirrevedu (fejn applikabbli) l-adegwatezza tas-suppożizzjonijiet tal-istituzzjoni rigward il-kapaċità tagħha li taċċessa s-swieq repo u l-finanzjament mill-bank ċentrali f’perjodu taħt stress, inkluż fir-rigward tal-adegwatezza u d-disponibbiltà tal-assi biex iservu bħala garanzija. Huma għandhom jikkunsidraw jekk l-istituzzjoni tittestjax l-aċċess għas-suq tagħha billi tbigħ jew tagħmel repo fuq bażi perjodika. Bl-istess mod, għandhom jirrevedu s-suppożizzjonijiet tal-istituzzjonijiet rigward iż-żmien meħtieġ biex jiksbu likwidità taħt stress.

Ittestjar tal-istress fuq il-likwidità superviżorju

L-awtoritajiet kompetenti għandhom iwettqu t-testijiet tal-istress fuq il-likwidità tagħhom stess biex jivvalutaw b’mod indipendenti r-riskji ta’ likwidità fuq terminu qasir u medju. Ix-xenarji ta’ stress għandhom jiġu ankrati mas-suppożizzjonijiet ta’ stress tal-LCR ta’ 30 jum, iżda l-awtoritajiet kompetenti jistgħu jestendu l-ambitu tal-valutazzjoni tagħhom billi jesploraw ir-riskji fi żmien 30 jum kif ukoll aktar minn 30 jum, u billi jibdlu s-suppożizzjonijiet tal-LCR biex jirriflettu riskji mhux koperti b’mod adegwat fl-LCR. Dan għandu jinkludi test tal-istress superviżorju li jgħaqqad stress speċifiku għal istituzzjoni u stress fis-suq kollu.