10.1. Applikazzjoni tal-SREP għal gruppi transfruntiera

Meta japplikaw l-SREP u dawn il-linji gwida għall-gruppi transfruntiera, l-awtoritajiet kompetenti għandhom jivvalutaw il-vijabbiltà tal-grupp kollu, kif ukoll l-entitajiet individwali tiegħu. Is-superviżuri konsolidanti għandhom iwettqu l-valutazzjoni inizjali tal-impriża omm u tal-grupp ta’ istituzzjonijiet fuq livell konsolidat, filwaqt li l-awtoritajiet kompetenti l-oħra għandhom iwettqu l-valutazzjoni inizjali tal-entitajiet taħt is-superviżjoni tagħhom (individwali, jew sottokonsolidati, fejn rilevanti).

Meta dawn il-linji gwida jiġu applikati għas-sussidjarji ta’ grupp transfruntier, l-awtoritajiet kompetenti għas-sussidjarji għandhom, meta jwettqu l-valutazzjoni inizjali tagħhom, jikkunsidraw primarjament l-istituzzjonijiet fuq bażi individwali, kif jagħmlu ma’ istituzzjoni awtonoma. Is-sejbiet minn tali valutazzjonijiet inizjali, fejn ikun rilevanti, għandhom jinkludu wkoll l-identifikazzjoni tal-vulnerabbiltajiet ewlenin fil-kuntest transfruntier jew tal-grupp, u jirriflettu l-punti b’saħħithom u l-fatturi mitiganti relatati mal-fatt li l-entità hija parti mill-grupp.

Ir-riżultati ta’ kwalunkwe valutazzjoni inizjali bħal din tal-elementi tal-SREP, inklużi, jekk jiġu identifikati, perspettivi dwar dipendenzi ewlenin fuq il-kumpanija omm/grupp, għandhom iservu bħala input fil-valutazzjoni konġunta u l-proċess ta’ deċiżjoni skont ir-rekwiżiti tal-Artikolu 113 tad-Direttiva 2013/36/UE. Għalhekk, dawn ir-riżultati għandhom jiġu diskussi mill-awtoritajiet kompetenti fi ħdan il-qafas tal-kulleġġi tas-superviżuri stabbiliti skont l-Artikolu 116 tad-Direttiva 2013/36/UE.

F’konformità mal-Artikolu 3 tar-Regolament ta’ Implimentazzjoni tal-Kummissjoni (UE) Nru 710/2014, qabel il-bidu tal-proċess ta’ deċiżjoni konġunta, is-superviżur konsolidanti u l-awtoritajiet kompetenti rilevanti jeħtieġ li jaqblu dwar skeda ta’ żmien għad-deċiżjoni konġunta li tistabbilixxi l-passi li għandhom jiġu segwiti fil-proċess u jaderixxu mal-iskeda ta’ żmien miftiehma matul il-proċess kollu.

Wara d-diskussjonijiet fil-kulleġġi tas-superviżuri u l-eżiti tal-proċess ta’ valutazzjoni konġunta, l-awtoritajiet kompetenti għandhom jiffinalizzaw il-valutazzjonijiet tal-SREP rispettivi tagħhom, billi jagħmlu l-aġġustamenti meħtieġa bbażati fuq l-eżiti tad-diskussjonijiet tal-kulleġġ.

Fejn valutazzjoni tal-awtorità kompetenti tkun żvelat nuqqasijiet speċifiċi relatati mal-pożizzjonijiet intragrupp li jaffettwaw negattivament il-vijabbiltà globali tal-entità fuq bażi individwali, l-awtoritajiet kompetenti għandhom, fil-kulleġġi tas-superviżuri, jiddiskutu jekk il-valutazzjoni finali ta’ entità għandhiex tinbidel fid-dawl tad-dimensjoni globali tal-grupp, inkluż il-mudell tan-negozju tal-grupp konsolidat, l-istrateġija u l-eżistenza u l-karatteristiċi speċifiċi ta’ arranġamenti ta’ appoġġ finanzjarju intragrupp.

L-awtoritajiet kompetenti għandhom jiddiskutu u jikkoordinaw dawn li ġejjin fil-kulleġġi tas-superviżuri:

• a. l-ippjanar, inkluża l-frekwenza, u l-iskedi taż-żmien għall-eżekuzzjoni tal-valutazzjoni ta’ diversi elementi tal-SREP għall-grupp konsolidat u l-entitajiet tiegħu biex tiġi ffaċilitata l-preparazzjoni tar-rapporti dwar ir-riskju tal-grupp u r-riskju ta’ likwidità meħtieġa għad-deċiżjonijiet konġunti kif speċifikat fl-Artikolu 113 tad-Direttiva 2013/36/UE u fl-Artikolu 3 tar-Regolament ta’ Implimentazzjoni tal-Kummissjoni (UE) Nru 710/2014 filwaqt li jitqiesu l-proporzjonalità u l-involviment superviżorju stabbiliti fit-Titolu 2;
• b. dettalji tal-applikazzjoni tal-punti ta’ riferiment użati għall-valutazzjoni tal-elementi tal-SREP;
• c. approċċ għall-valutazzjoni u l-punteġġ tas-sottokategoriji tar-riskji b’mod individwali, fejn tali sottokategoriji ġew identifikati bħala materjali;
• d. inputs meħtieġa mill-istituzzjoni fil-livell konsolidat u tal-entità għat-twettiq tal-valutazzjoni tal-elementi tal-SREP, inklużi dawk mill-ICAAP u l-ILAAP;
• e. eżiti tal-valutazzjoni, inklużi punteġġi tal-SREP assenjati lil diversi elementi, u l-valutazzjoni globali tal-SREP u l-punteġġ globali tal-SREP fil-livell konsolidat u tal-entità. Meta jiddiskutu l-valutazzjoni tar-riskji individwali għall-kapital u l-likwidità, l-awtoritajiet kompetenti għandhom jiffokaw fuq ir-riskji li huma identifikati bħala materjali għall-entitajiet rispettivi;
• f. implikazzjonijiet prudenzjali transfruntieri tar-riskji tal-ML/TF, riskji ta’ nuqqas ta’ implimentazzjoni u ta’ evażjoni ta’ sanzjonijiet finanzjarji mmirati u tħassib; u
• g. miżuri superviżorjiu ta’ intervent bikri ppjanati, jekk rilevanti.

Meta jippreparaw is-sommarju tal-valutazzjoni globali tal-SREP għall-grupp transfruntier u l-entitajiet tiegħu, l-awtoritajiet kompetenti għandhom jistrutturaw dan b’mod li jiffaċilita l-mili tal-mudelli għar-rapport tal-SREP, ir-rapport tar-riskju tal-grupp, il-valutazzjoni tar-riskju tal-likwidità u mudelli tar-rapport tal-valutazzjoni tar-riskju ta’ likwidità tal-grupp meħtieġa għad-deċiżjoni konġunta f’konformità mal-Artikolu 113 tad-Direttiva 2013/36/UE kif speċifikat fir-Regolament ta’ Implimentazzjoni tal-Kummissjoni (UE) Nru 710/2014.