CAIBIDIL IV TRÉDHEARCACHT MAIDIR LE HÚINÉIREACHT THAIRBHIÚIL

Airteagal 55

I gcás ina bhfuil úinéireacht ag eintitis dhlítheanacha dá dtagraítear in Airteagal 57, nó ag socruithe dlíthiúla, san eintiteas corparáideach, bíodh sin ar bhonn aonair nó go carnach, nó i gcás ina rialaíonn siad an t-eintiteas corparáideach, go díreach nó go hindíreach, trí leas úinéireachta nó trí mhodhanna eile, is iad na húinéirí tairbhiúla na daoine nádúrtha a bheidh ina n-úinéirí tairbhiúla ar na heintitis dhlítheanacha dá dtagraítear in Airteagal 57 nó ar na socruithe dlíthiúla.

Airteagal 56

Tabharfaidh gach Ballstát fógra don Choimisiún faoin 10 Deireadh Fómhair 2027 maidir le liosta de na cineálacha eintiteas dlítheanach arb ann dóibh faoina dhlí náisiúnta le húinéirí tairbhiúla arna sainaithint i gcomhréir le hAirteagal 51 agus Airteagal 52(4).Cuirfear san áireamh san fhógra sin catagóirí sonracha eintiteas, cur síos ar shaintréithe, agus, i gcás inarb infheidhme, bunús dlí faoi dhlí náisiúnta na mBallstát lena mbaineann. Cuirfear in iúl ann freisin cé acu atá nó nach bhfuil feidhm ag an sásra faoi Airteagal 63(4), de bharr foirm shonrach agus struchtúr sonrach eintiteas dlítheanach seachas eintitis chorparáideacha, chomh maith le réasúnú mionsonraithe do na cúiseanna leis sin.

Cuirfidh an Coimisiún an fógra dá dtagraítear sa chéad fhomhír in iúl do na Ballstáit eile.

Airteagal 60

I gcás iontaobhais lánroghnacha, nuair atá tairbhithe fós le roghnú, déanfar ábhair cumhachta agus faighteoirí i gcás mainneachtana a shainaithint. Beidh tairbhithe ar na hábhair cumhachta ina n-úinéirí tairbhiúla a luaithe a shainaithneofar nó a ainmneofar iad. Beidh faighteoirí i gcás mainneachtana ina n-úinéirí tairbhiúla nuair a mhainníonn na hiontaobhaithe a lánrogha a fheidhmiú.

I gcás ina gcomhlíonfaidh iontaobhais lánroghnacha na coinníollacha a leagtar síos in Airteagal 59(2), ní shainaithneofar ach aicme na n-ábhar cumhachta agus faighteoirí i gcás mainneachtana. Tabharfar fógra don Choimisiún faoi na catagóirí sin d’iontaobhais lánroghnacha i gcomhréir le mír 3 den Airteagal sin.

Airteagal 66

Déanfaidh scairshealbhóirí ainmnitheacha agus stiúrthóirí ainmnitheacha d’eintiteas dlítheanach faisnéis leordhóthanach, chruinn agus cothrom le dáta a choimeád faoi chéannacht a n-ainmneora chomh maith le céannacht úinéirí tairbhiúla an ainmneora agus iad a nochtadh chomh maith lena stádas i ndáil le eintiteas dlítheanach. Déanfaidh eintitis dhlítheanacha an fhaisnéis sin a thuairisciú chuig na cláir lárnacha.

Déanfaidh eintiteas dlítheanach eile an fhaisnéis dá dtagraítear sa chéad mhír a thuairisciú chuig eintitis faoi oibleagáid freisin i gcás ina bhfuil bearta díchill chuí do chustaiméirí á gcur i bhfeidhm ag na heintitis faoi oibleagáid i gcomhréir le Caibidil III.