RIALACHÁN (AE) 2026/405 Ó PHARLAIMINT NA hEORPA AGUS ÓN gCOMHAIRLE an 11 Feabhra 2026 maidir le glantaigh agus dromchlaghníomhaithe, agus lena n-aisghairtear Rialachán (CE) Uimh. 648/2004 (Téacs atá ábhartha maidir le LEE)

(1)

Rinneadh na coinníollacha le haghaidh glantach agus dromchlaghníomhaithe a chur ar an margadh agus a chur ar fáil ar an margadh a chomhchuibhiú trí Rialachán (CE) Uimh. 648/2004 ó Pharlaimint na hEorpa agus ón gComhairle (3). Leagtar amach sa Rialachán sin ceanglais a bhaineann le hin-bhithdhíghrádaitheacht dromchlaghníomhaithe, srianta nó toirmisc ar dhromchlaghníomhaithe ar fhorais in-bhithdhíghrádaitheachta, teorainneacha ar chion na bhfosfáití agus ar chion na gcomhdhúl eile fosfair i nglantaigh níocháin tomhaltóra agus i nglantaigh miasniteoirí uathoibríocha tomhaltóra, faisnéis nach mór do mhonaróirí a choinneáil ar fáil d’údaráis inniúla na mBallstát agus do phearsanra leighis, agus rialacha maidir le lipéadú glantach, lena n-áirítear maidir le cumhráin ailléirgineacha.

(2)

Thángthas ar an gconclúid sa mheastóireacht a rinne an Coimisiún ar Rialachán (CE) Uimh. 648/2004 go bhfuil cuspóirí an Rialacháin bainte amach den chuid is mó. Mar sin féin, sainaithníodh sa mheastóireacht sin roinnt laigí agus réimsí freisin a bhféadfaí feabhas breise a chur orthu. Le blianta beaga anuas, tá athrú as cuimse tagtha ar an gcreat rialála le haghaidh ceimiceán, a gcruthaítear dúbláil agus easpa comhleanúnachais leis sna rialacha is infheidhme maidir le glantaigh agus go háirithe maidir leis na ceanglais faisnéise ábhartha. Tá gá, dá bhrí sin, le comhsheasmhacht a áirithiú agus le ceanglais faisnéise dhúbláilte a dhíothú.

(3)

Ní chumhdaítear forbairtí nua áirithe sa mhargadh, go háirithe forbairt i nglantaigh ina mbíonn miocrorgánaigh agus i ndíolacháin athlíonta glantach, le Rialachán (CE) Uimh. 648/2004 nó cumhdaítear i bpáirt iad leis. Ina theannta sin, tá méadú ag teacht ar líon na dtáirgí a thairgtear lena ndíol ar an idirlíon agus baineann saincheisteanna forfheidhmiúcháin ar leith leis na díolacháin ar líne sin i gcásanna nach bhfuil monaróir ná allmhaireoir bunaithe san Aontas. Ar an taobh eile, cuireann an digiteáil deiseanna ar fáil i ndáil le simpliú, laghdú ualaigh agus tuilleadh éascaíochta ó thaobh úsáide de agus sothuigtheacht na sábháilteachta agus na húsáide, nithe nach ann dóibh faoi láthair. Is gá, dá bhrí sin, na táirgí nua agus na cleachtais nua a chur san áireamh agus dlús a chur leis na hiarrachtaí i leith na digiteála, i gcomhréir le cuspóirí uileghabhálacha an Aontais, go háirithe i dtéarmaí na hinbhuanaitheachta agus an aistrithe ghlais agus an aistrithe dhigitigh. Ina theannta sin, ba cheart díolacháin athlíonta a spreagadh mar bheart sonrach maidir le dramhaíl a chosc is gá chun spriocanna athúsáide agus athlíonta a bhaint amach, i gcomhréir leis an gComhaontú Glas don Eoraip a leagtar amach i dteachtaireacht ón gCoimisiún an 11 Nollaig 2019 agus leis an bPlean Gníomhaíochta nua don Gheilleagar Ciorclach chun Eoraip níos glaine agus níos iomaíche a bhaint amach, a leagtar amach i dteachtaireacht ón gCoimisiún an 11 Márta 2020. Ar mhaithe le haistriú an Aontais i dtreo geilleagar ciorclach a chur chun cinn a thuilleadh, ba cheart athúsáid agus athlíonadh pacáistíochta a spreagadh agus a chur chun cinn. Ba cheart d’oibreoirí eacnamaíocha féachaint freisin le glantaigh a chur ar fáil ar an margadh do thomhaltóirí i bhfoirmeacha díolacháin inbhuanaithe eile, mar shampla i bpacáistíocht in-athchúrsáilte a chuireann ar chumas tomhaltóirí an phacáistíocht iomchuí a athlíonadh sa bhaile, agus sábháilteacht tomhaltóirí á háirithiú ag an am céanna.

(4)

Sa tSeiceáil Oiriúnachta a rinneadh ar an reachtaíocht cheimiceáin is ábhartha, nach raibh Rialachán (CE) Uimh. 1907/2006 ó Pharlaimint na hEorpa agus ón gComhairle (4) san áireamh inti, léiríodh cé chomh chasta is atá creat rialála an Aontais i ndáil le ceimiceáin agus baineadh de thátal as sin go bhfuil an chastacht sin ann mar thoradh ar líon mór na ngníomhartha dlíthiúla idirnasctha a bhaineann go sonrach le táirge ar leith agus le hearnáil ar leith. Tugadh le fios sa tSeiceáil Oiriúnachta go ndéanann údaráis faireachais margaidh saincheisteanna forfheidhmiúcháin a thuairisciú maidir le táirgí a thagann isteach san Aontas ó thríú tíortha trí dhíolacháin ar líne. Luaitear freisin go bhfuil gá le simpliú a dhéanamh ar chur in iúl faisnéise d’úsáideoirí táirgí trí lipéid agus fuarthas amach nach bhfuil buntáiste á bhaint faoi láthair as uirlisí nuálacha chun faisnéis faoi tháirgí a chur in iúl. Is gá, dá bhrí sin, na rialacha atá ann faoi láthair a shimpliú chun go laghdófar an t-ualach atá ar oibreoirí eacnamaíocha, go bhfeabhsófar tuiscint ag tomhaltóirí agus go n-éascófar faireachas margaidh. Ba cheart, dá bhrí sin, rialachán eile a chur in ionad Rialachán (CE) Uimh. 648/2004.

(5)

I gCinneadh Uimh. 768/2008/CE ó Pharlaimint na hEorpa agus ón gComhairle (5) leagtar síos prionsabail choiteanna agus forálacha tagartha a bhfuil sé beartaithe feidhm a bheith acu maidir leis an reachtaíocht ar fad san earnáil chun bonn comhtháite a chur ar fáil chun an reachtaíocht sin a athbhreithniú. Ba cheart an creat dlíthiúil nua le haghaidh glantaigh agus dromchlaghníomhaithe a bheith ailínithe a mhéid is féidir leis na prionsabail choiteanna sin agus leis na forálacha tagartha.

(6)

Chun deimhneacht dhlíthiúil agus cothrom na Féinne a áirithiú d’oibreoirí eacnamaíocha, ba cheart an sainmhíniú reatha ar ‘glantach’ a leathnú le go gcumhdófar na glantaigh a forbraíodh le déanaí a bhfuil miocrorgánaigh curtha leo d’aon ghnó. Ba cheart a chumhdach leis an sainmhíniú sin freisin táirgí a thacaíonn leis an bpróiseas glantacháin nuair a úsáidtear iad in éineacht le glantach níocháin nó glantach miasniteoirí uathoibríocha, chomh maith le táirgí lena modhnaítear boladh fabraicí, i bhfianaise an róil choimhdigh atá ag na táirgí sin chun an fheidhm ghlantacháin a chomhlíonadh. Áirítear le tagairtí do dhromchlaí dromchla torthaí agus glasraí.

(7)

Ós rud é gurb iad dromchlaghníomhaithe na príomh-chomhábhair i nglantaigh, ba cheart na ceanglais in-bhithdhíghrádaitheachta atá ann cheana a choinneáil. Ós rud é gur in idirbhearta gnólacht le gnólacht go príomha a dhíoltar dromchlaghníomhaithe chun go n-úsáidfear i monarú glantach iad, ní gá iad a bheith faoi réir na gceanglas sin a bhíonn i gceist le glantaigh. Dá bhrí sin, ba cheart rialacha íosta a leagan síos le haghaidh dromchlaghníomhaithe, is é sin rialacha maidir le faisnéis faoi lipéadú agus maidir le hoibleagáid a chur ar mhonaróirí doiciméadacht theicniúil a tharraingt suas. Chun nach gcuirfí ualach riaracháin gan ghá ar an monaróir, níor cheart é a bheith d’oibleagáid air pas táirge digiteach a chruthú agus an bhileog sonraí comhábhar le haghaidh práinnfhreagairt sláinte a sholáthar ach amháin i gcás ina gcuirtear dromchlaghníomhaithe ar fáil ar an margadh go díreach do thomhaltóirí nó d’úsáideoirí deiridh eile. Ina theannta sin, ba cheart feidhm a bheith ag forálacha maidir le díolacháin athlíonta freisin maidir le dromchlaghníomhaithe úsáideora deiridh.

(8)

Leagadh amach sa Chomhaontú Glas don Eoraip an sprioc atá ann maidir le sláinte an duine agus an comhshaol a chosaint níos fearr mar chuid de chur chuige uaillmhianach chun dul i ngleic le truailliú ó gach foinse agus chun gluaiseacht i dtreo comhshaol atá saor ó thocsainí. Mar chuid den chur chuige sin, ba cheart don Rialachán seo na rialacha a leagtar amach in ionstraimí reachtacha atá ann cheana a chomhlánú.

(9)

Ós rud é go bhfuil ceann de na creataí rialála is cuimsithí agus is cosantaí le haghaidh ceimiceán ag an Aontas cheana féin, le tacaíocht ón mbonn eolais is forbartha ar fud an domhain, leis an Rialachán seo ní dhéantar difear do chur i bhfeidhm dhlí an Aontais atá ann cheana a bhaineann le gnéithe de chosaint shláinte an duine, na sábháilteachta agus an chomhshaoil nach gcumhdaítear leis an Rialachán seo. Ba cheart feidhm a bheith ag an Rialachán seo go háirithe, gan dochar do Rialacháin (CE) Uimh. 1907/2006, (AE) Uimh. 1272/2008 (6) agus (CE) Uimh. 528/2012 (7) ó Pharlaimint na hEorpa agus ón gComhairle.

(10)

Is oibreáin dhromchla-ghníomhacha iad dromchlaghníomhaithe a chuidíonn chun an comhéadan idir uisce agus olaí nó salachar a bhriseadh síos. Tá siad ar cheann de na príomhábhair a úsáidtear i nglantaigh. Féadfaidh dromchlaghníomhaithe a bheith ina riosca don chomhshaol, áfach, toisc go scaoiltear amach i gcórais séarachais iad nó díreach isteach in uiscí dromchla. Chun bac a chur ar aon éifeacht dhíobhálach a d’fhéadfadh a bheith ag dromchlaghníomhaithe ar an gcomhshaol, is gá ceanglais a leagan síos lena áirithiú go mbeidh dromchlaghníomhaithe go hiomlán in-bhithdhíghrádaithe, cibé acu an gcuirtear ar an margadh ina n-aonair iad agus é beartaithe iad a úsáid i nglantaigh nó an úsáidtear mar chomhábhar iad i nglantaigh.

(11)

Tá roinnt substaintí ann a úsáidtear i nglantaigh, seachas dromchlaghníomhaithe, ar féidir leo fanacht i bhfuíolluisce tar éis a n-úsáide agus, mura mbaineann oibreoirí gléasraí cóireála fuíolluisce iad trí phróisis chostasacha, maireann siad agus carnann siad sa chomhshaol. Chun an nuálaíocht a éascú agus chun aghaidh a thabhairt ar rioscaí a d’fhéadfadh a bheith ann do shláinte an duine agus don chomhshaol, agus chun tacú le cuspóirí Threoir (AE) 2024/3019 ó Pharlaimint na hEorpa agus ón gComhairle (8), ba cheart spriocanna uaillmhianacha a leagan amach chun critéir in-bhithdhíghrádaitheachta agus modhanna tástála chomhfhreagracha le haghaidh comhábhair eile i nglantaigh a thabhairt isteach, agus tosaíocht á tabhairt do chomhábhair a bhféadfadh tionchair níos airde a bheith acu ar an gcomhshaol. Ba cheart don Choimisiún, sa chéad chéim, critéir in-bhithdhíghrádaitheachta a fhorbairt le haghaidh sceo polaiméireacha uiscethuaslagtha a úsáidtear chun glantaigh a imchochlú agus le haghaidh na bpolaiméirí uile laistigh den sceo sin, agus sa dara céim ba cheart dó na critéir sin a fhorbairt le haghaidh substaintí orgánacha eile a úsáidtear i dtiúchan ard i nglantaigh, arb ionann iad agus 10 % ar a laghad den táirge. Chun a áirithiú go gcaithfear go cothrom le táirgí beag beann ar a bhfoirm leachtach nó sholadach agus chun caolú a sheachaint, ba cheart an céatadán sin a ríomh as mais iomlán na substaintí, lena n-áirítear tuaslagóirí éagsúla, gan an cion uisce a chur san áireamh. Ba cheart don Choimisiún modhanna oiriúnacha tástála a chinneadh freisin, chun cur chun feidhme aonfhoirmeach agus faireachas éifeachtach margaidh ar fud an Aontais a áirithiú. Ina theannta sin, ar mhaithe le soiléireacht dhlíthiúil agus intuarthacht, ba cheart amlínte réalaíocha a leagan síos do mhonaróirí chun a bhfoirmlithe táirgí a oiriúnú chun na critéir in-bhithdhíghrádaitheachta atá le forbairt ag an gCoimisiún le haghaidh an sceo nó na bpolaiméirí laistigh de sceo agus na substaintí orgánacha i dtiúchan ard a chomhlíonadh. Chun solúbthacht na rialacha a áirithiú i gcásanna a bhfuil údar cuí leo, ba cheart an chumhacht a thabhairt don Choimisiún maoluithe a thabhairt isteach ar na ceanglais in-bhithdhíghrádaitheachta chun a áirithiú nach ndéanfar difear d’éifeachtúlacht, d’infhaighteacht ná d’inacmhainneacht glantach. Ar deireadh, chun ardleibhéal cosanta don chomhshaol a áirithiú, ba cheart don Choimisiún measúnú a dhéanamh freisin ar a indéanta atá sé critéir in-bhithdhíghrádaitheachta a thabhairt isteach le haghaidh substaintí orgánacha atá i dtiúchan níos ísle nó a indéanta atá sé an íostairseach a ísliú. Leis an gcur chuige cuimsitheach céimnithe sin i leith in-bhithdhíghrádaitheachta, ba cheart dul chun cinn seasta i dreo táirgí in-bhithghrádaithe a áirithiú, laistigh d’amlínte réalaíocha. Chun am a thabhairt do mhonaróirí foirmlithe táirgí a oiriúnú, ba cheart tréimhsí idirthréimhseacha leordhóthanacha a sholáthar, agus ba cheart critéir tástála ábhartha a bhunú i bhfad roimh ré.

(12)

Is príomh-chomhábhar eile é fosfar a úsáidtear i nglantaigh. Déanann fosfar agus a chuid comhdhúl dochar d’éiceachórais agus don chomhshaol uisceach, áfach, toisc go gcuireann siad le heotrófú. Meastar go ndéanfar dul chun cinn suntasach maidir le fosfar a aisghabháil ó fhuíolluisce uirbeach faoi Threoir (AE) 2024/3019. Mar sin féin, tá sé tábhachtach leanúint d’aghaidh a thabhairt ar bhunús na faidhbe trí theorainn a chur leis an gcion fosfair sna cineálacha glantach a úsáidtear sna méideanna is airde. Dá bhrí sin, chun ardleibhéal cosanta don chomhshaol a áirithiú a thuilleadh agus chun an méid a chuireann glantaigh le heotrófú a laghdú, is gá na teorainneacha comhchuibhithe a choinneáil maidir le cion na bhfosfáití agus cion na gcomhdhúl eile fosfair i nglantaigh níocháin tomhaltóra agus i nglantaigh miasniteoirí uathoibríocha tomhaltóra. I bhfianaise na n-iarmhairtí suntasacha a d’fhéadfadh a bheith ag an eotrófú, ba cheart don Choimisiún measúnú a dhéanamh ar a indéanta atá sé na teorainneacha sin a laghdú a thuilleadh agus teorainneacha nua a thabhairt isteach do chatagóirí eile táirgí agus, i gcás inarb iomchuí, togra a ghlacadh chun na gnéithe bunriachtanacha sin den Rialachán seo a leasú.

(13)

Le blianta beaga anuas, forbraíodh táirgí glantacháin nua ina mbíonn miocrorgánaigh mar chomhábhair ghníomhacha. Tá a mbitheolaíocht féin ag miocrorgánaigh agus freagraíonn siad don chomhshaol as a stuaim féin. Toisc go bhfuil miocrorgánaigh in ann iomadú, tá difríocht shoiléir idir gnáth-ghlantaigh agus glantaigh mhiocróbacha. Dá bhrí sin, ní gá go bhfuil cineál na nguaiseacha bunúsacha agus na rioscaí atá ag teacht chun cinn a bhaineann leo cosúil leo siúd a bhaineann le ceimiceáin, go háirithe i ndáil leis an acmhainneacht atá ag miocrorgánaigh maireachtáil agus méadú i níos mó ná comhshaol amháin agus raon mór meitibilíte agus tocsaine a tháirgeadh a bhféadfadh suntasacht thocsaineolaíoch a bheith bainteach leo.

(14)

Ós rud é nach bhfuil miocrorgánaigh faoi réir clárú de bhun Rialachán (CE) Uimh. 1907/2006, nó faoi aon dlí eile de chuid an Aontais lena gcuirtear de cheangal ar mhonaróirí a léiriú go bhfuil an úsáid bheartaithe sábháilte, níor cheart iad a bheith incháilithe mar chomhábhair do ghlantaigh ach amháin i gcás inar sainaithníodh go soiléir iad agus inar léiríodh, de réir sonraí, go bhfuil sé sábháilte iad a úsáid. Ba cheart, dá bhrí sin, rialacha comhchuibhithe a bhunú lena rialaítear úsáid shábháilte miocrorgánach i nglantaigh. Chun ardleibhéal cosanta do shláinte an duine agus don chomhshaol agus cothrom iomaíochta d’oibreoirí eacnamaíocha a áirithiú, ba cheart don Choimisiún modheolaíocht a leagan amach chun measúnú riosca a dhéanamh ar ghlantaigh ina bhfuil miocrorgánaigh. Ba cheart an mhodheolaíocht sin a bheith chomh cuimsitheach agus is féidir agus ba cheart di gach riosca aitheanta a chumhdach, lena n-áirítear le haghaidh catagóirí sonracha táirgí ar nós iad siúd atá i bhformáid sprae nó iad siúd atá le húsáid ar dhromchlaí a bhíonn i dteagmháil le bia.

(15)

I gcomhréir le Treoir 2010/63/AE ó Pharlaimint na hEorpa agus ón gComhairle (9), is gá tástáil ar ainmhithe a ionadú, a laghdú nó a bheachtú, d’fhonn deireadh a chur de réir a chéile le húsáid ainmhithe lena dtástáil a luaithe is féidir é sin a dhéanamh. Dá bhrí sin, ba cheart toirmeasc ginearálta a chur ar ghlantaigh agus ar dhromchlaghníomhaithe a bhí faoi réir tástáil ar ainmhithe a chur ar an margadh chun ceanglais an Rialacháin seo a chomhlíonadh agus ba cheart, ina ainneoin sin, úsáid sonraí stairiúla a cheadú. Ba cheart don Choimisiún foráil a dhéanamh maidir le maolú, i gcás inarb iomchuí, chun ardleibhéal cosanta do shláinte an duine agus don chomhshaol a áirithiú, agus ba cheart dó aon chinneadh mar sin lena ndeonaítear maolú a chur in iúl do na Ballstáit agus do na hoibreoirí eacnamaíocha ábhartha.

(16)

Chun ardleibhéal cosanta leasa phoiblí a áirithiú, agus chun iomaíocht chóir ar an margadh inmheánach a ráthú, ba cheart gurb iad na hoibreoirí eacnamaíocha a bheadh freagrach as comhlíonadh cheanglais an Rialacháin seo ag glantaigh agus ag dromchlaghníomhaithe i ndáil leis na róil faoi seach atá acu sa slabhra soláthair. Nuair is iomchuí, is ceart do gach monaróir agus gach allmhaireoir tástáil shamplach a dhéanamh ar na glantaigh agus na dromchlaghníomhaithe sin a chuireann siad ar fáil ar an margadh chun sláinte agus sábháilteacht tomhaltóirí agus an chomhshaoil a chosaint.

(17)

Ba cheart do gach oibreoir eacnamaíoch a mbíonn baint acu leis an slabhra soláthair agus dáilte bearta iomchuí éifeachtacha a ghlacadh chun a áirithiú nach gcuireann siad ar fáil ar mhargadh an Aontais ach glantaigh agus dromchlaghníomhaithe atá i gcomhréir leis an Rialachán seo. Dá bhrí sin, is iomchuí foráil a dhéanamh maidir le dáileadh soiléir comhréireach oibleagáidí a bheidh ag teacht le ról gach oibreora eacnamaíoch sa slabhra soláthair agus dáilte.

(18)

Chun a chur ar a gcumas d’oibreoirí eacnamaíocha a léiriú go gcomhlíonann glantaigh agus dromchlaghníomhaithe a chuirtear ar fáil ar an margadh an Rialachán seo, agus d’údaráis inniúla é sin a fhíorú, is gá foráil a dhéanamh maidir le nós imeachta um measúnú comhréireachta. I gCinneadh Uimh. 768/2008/CE, bunaítear modúil maidir le nósanna imeachta um measúnú comhréireachta, ón gceann is lú déine go dtí an ceann is mó déine, i gcomhréir leis an leibhéal riosca lena mbaineann agus leis an leibhéal sábháilteachta is gá. Chun comhleanúnachas idir earnálacha a áirithiú agus chun leaganacha malartacha ad hoc a sheachaint, sonraítear sa Chinneadh sin na nósanna imeachta um measúnú comhréireachta is féidir a roghnú as measc na modúl sin.

(19)

Is iad na monaróirí is fearr chun a áirithiú go gcomhlíonann an glantach nó an dromchlaghníomhaí an Rialachán seo, ós acu atá an t-eolas mionsonraithe faoin bpróiseas dearaidh agus táirgeachta. Ba cheart, dá bhrí sin, monaróirí a bheith freagrach, go huile is go hiomlán as an nós imeachta um measúnú comhréireachta a dhéanamh i gcás glantach agus dromchlaghníomhaithe. Ba cheart Modúl A, a leagtar amach in Iarscríbhinn II a ghabhann le Cinneadh Uimh. 768/2008/CE, a bheith infheidhme maidir leis an measúnú comhréireachta ar ghlantaigh agus ar dhromchlaghníomhaithe. Ba cheart do mhonaróirí doiciméadacht theicniúil a chur le chéile freisin ina léireofar comhlíontacht na nglantach nó na ndromchlaghníomhaithe leis na rialacha agus modhanna tástála is ábhartha.

(20)

Ós rud é gur féidir seilfré fhada a bheith ag glantaigh agus dromchlaghníomhaithe agus chun comhleanúnachas a áirithiú leis na ceanglais maidir le doiciméadacht a choimeád faoi Rialachán (CE) Uimh. 1272/2008 atá infheidhme maidir le formhór na nglantach, ba cheart do mhonaróirí an doiciméadacht theicniúil, an pas táirge digiteach agus, i gcás inarb infheidhme, an lipéad digiteach a choinneáil ar feadh tréimhse 10 mbliana ón dáta a cuireadh an glantach nó an dromchlaghníomhaí a chumhdaítear leis an doiciméadacht theicniúil sin, an pas táirge digiteach nó an lipéad digiteach sin ar an margadh.

(21)

Chun go n-éascófar comhlíontacht a n-oibleagáidí faoin Rialachán seo ag monaróirí, ba cheart a cheadú do mhonaróirí atá bunaithe san Aontas ionadaí údaraithe a cheapadh chun cúraimí sonracha a dhéanamh ar a son. Níor cheart an ceapachán sin a bheith bailí ach amháin nuair a ghlacann an t-ionadaí údaraithe leis i scríbhinn. Thairis sin, chun a áirithiú go ndáilfear freagrachtaí go soiléir agus go comhréireach idir an monaróir agus an t-ionadaí údaraithe, is gá an liosta de chúraimí a leagan amach lenar cheart do mhonaróirí ina leith dul ar iontaoibh an ionadaí údaraithe maidir leo, chomh maith leis an liosta de thascanna nach féidir a tharmligean. Thairis sin, chun in-fhorfheidhmitheacht agus éifeachtacht na gceanglas maidir le faireachas margaidh a áirithiú agus chun a áirithiú nach gcuirfear ach glantaigh agus dromchlaghníomhaithe comhlíontacha ar mhargadh an Aontais, ba cheart eintiteas a bheith bunaithe san Aontas i gcónaí a bheidh freagrach as idirchaidreamh a dhéanamh le húdaráis faireachais margaidh agus as comhlíonadh an Rialacháin seo a áirithiú. Chuige sin, ba cheart do mhonaróirí atá bunaithe lasmuigh den Aontas ionadaí údaraithe atá bunaithe san Aontas a cheapadh i leith na nglantach agus na ndromchlaghníomhaithe a chuireann siad ar mhargadh an Aontais trí chiandíolachán, lena n-áirítear trí mhargaí ar líne. Dá bhrí sin, ba cheart liosta de chúraimí breise a leagan amach sa Rialachán seo a mbeidh ar na monaróirí sin a chur de chúram ar ionadaithe údaraithe. Ba cheart a áireamh ar an liosta sin oibleagáid chun a dhícheall a dhéanamh chun a fhíorú go léiríonn an fhaisnéis agus an doiciméadacht arna soláthar ag an monaróir go bhfuil an Rialachán seo á chomhlíonadh. Ba cheart an oibleagáid sin a thuiscint mar sheiceáil dhoiciméadbhunaithe, ós rud é nár cheart a cheangal ar an ionadaí údaraithe imscrúduithe mionsonraithe ná anailísí uileghabhálacha a dhéanamh ar chomhlíonadh. D’áiritheofaí leis cosaint iomchuí do shláinte an duine agus don chomhshaol agus urraim á tabhairt, i gcomhréir le prionsabal na comhréireachta, do ról agus d’acmhainneachtaí ar leith na n-ionadaithe údaraithe.

(22)

D’fhonn cumarsáid idir na hoibreoirí eacnamaíocha, na húdaráis faireachais margaidh agus na tomhaltóirí a éascú, ba cheart do na hoibreoirí eacnamaíocha a mionsonraí teagmhála, mar shampla uimhir theileafóin chomh maith leis na seoltaí poist agus ríomhphoist nó bealaí cumarsáide eile, a léiriú agus a choinneáil cothrom le dáta.

(23)

Chun feidhmiú an mhargaidh inmheánaigh a choimirciú, agus a áirithiú go mbainfear amach an cuspóir ardleibhéal cosanta a sholáthar i ndáil le sláinte an duine agus leis an gcomhshaol, is gá a shuí go gcomhlíonfaidh glantaigh agus dromchlaghníomhaithe ó thríú tíortha a thugtar isteach i margadh an Aontais, lena n-áirítear trí dhíolacháin ar líne, an Rialachán seo freisin. Is gá, go háirithe, a áirithiú gur chuir monaróirí nósanna imeachta iomchuí um measúnú comhréireachta i gcrích maidir leis na táirgí sin. Is gá freisin rialacha a leagan síos d’allmhaireoirí chun a áirithiú go gcomhlíonann na glantaigh agus na dromchlaghníomhaithe a chuirtear ar an margadh na ceanglais sin. Ba cheart d’allmhaireoirí agus d’ionadaithe údaraithe a áirithiú go bhfuil an doiciméadacht arna tarraingt suas ag monaróirí ar fáil do na húdaráis náisiúnta inniúla lena hiniúchadh. Ba cheart foráil a dhéanamh d’allmhaireoirí agus, i gcás inarb infheidhme, d’ionadaithe údaraithe chun a áirithiú gur cruthaíodh pas táirge digiteach le haghaidh glantach agus dromchlaghníomhaithe úsáideora deiridh.

(24)

Ós rud é go mbíonn ról tábhachtach ag allmhaireoirí i ráthaíocht chomhlíontacht na nglantach agus na ndromchlaghníomhaithe allmhairithe i margadh an Aontais, agus glantach nó dromchlaghníomhaí á chur ar an margadh acu, ba cheart d’allmhaireoirí a n-ainm, a dtrádainm cláraithe nó a dtrádmharc cláraithe, chomh maith lena seoladh poist agus seoladh ríomhphoist agus a n-uimhir theileafóin, a léiriú ar lipéad an táirge.

(25)

Toisc go gcuireann dáileoirí glantach nó dromchlaghníomhaí ar fáil ar an margadh tar éis don mhonaróir nó don allmhaireoir é a chur ar an margadh, ba cheart do dháileoirí gníomhú leis an gcúram is cuí i ndáil leis na ceanglais is infheidhme. Ba cheart do dháileoirí a áirithiú freisin nach ndéanann an láimhseáil a dhéanann siad ar an nglantach nó ar an ndromchlaghníomhaí difear diúltach dá chomhlíontacht leis an Rialachán seo.

(26)

Ó tharla go bhfuil dáileoirí, allmhaireoirí agus, i gcás inarb infheidhme, ionadaithe údaraithe gar don mhargadh agus go bhfuil ról tábhachtach acu maidir le comhlíonadh táirge a áirithiú, ba cheart dóibh a bheith bainteach le cúraimí faireachais margaidh arna ndéanamh ag na húdaráis náisiúnta inniúla, agus ba cheart dóibh a bheith réidh chun a bheith rannpháirteach go gníomhach tríd an bhfaisnéis uile is gá a bhaineann leis an nglantach nó an dromchlaghníomhaí lena mbaineann a thabhairt do na húdaráis sin.

(27)

Allmhaireoirí agus dáileoirí a chuireann glantach nó dromchlaghníomhaí ar an margadh faoina n-ainm féin nó faoi thrádmharc nó a mhodhnaíonn glantach nó dromchlaghníomhaí ar bhealach ina bhféadfaí difear a dhéanamh don Rialachán seo, ba cheart iad a mheas mar mhonaróirí agus ba cheart dóibh, dá réir sin, oibleagáidí monaróirí a ghlacadh orthu féin. Ar an gcaoi chéanna, allmhaireoirí agus dáileoirí a chuireann dromchlaghníomhaí ar fáil ar an margadh d’úsáideoirí deiridh nár táirgeadh lena sholáthar d’úsáideoirí deiridh ach do tháirgeoirí glantach, ba cheart dóibh ról na monaróirí a ghlacadh agus, i measc nithe eile, pas táirge digiteach a chruthú. I gcásanna eile, ba cheart d’oibreoirí eacnamaíocha nach ndéanann ach glantach nó dromchlaghníomhaí, a chuir oibreoirí eacnamaíocha eile ar an margadh cheana féin, a phacáistiú nó a athphacáistiú, ba cheart dóibh a bheith in ann a chruthú nach ndearnadh difear do chomhlíonadh an Rialacháin seo, trína gcéannacht a léiriú ar an bpacáiste agus trí chóip den fhaisnéis bhunaidh faoi lipéadú a choinneáil. Ba cheart a thuiscint le gníomhaíochtaí pacáistíochta agus athphacáistithe go soláthraítear táirgí d’úsáideoirí deiridh i bpacáistíocht aonair agus níor cheart díolacháin athlíonta a chumhdach leo.

(28)

Ós rud é go n-úsáideann pearsanra speisialaithe lasmuigh den réimse baile glantaigh thionsclaíocha agus institiúideacha, tá siad faoi réir ceanglais nach ionann iad agus glantaigh tomhaltóra. Chun rioscaí do shláinte tomhaltóirí nó don chomhshaol a sheachaint agus chun gníomhaíochtaí faireachais margaidh a éascú, ba cheart glantaigh thionsclaíocha agus institiúideacha a shainaithint go soiléir ar a lipéad.

(29)

Chun ardleibhéal cosanta do shláinte an duine a áirithiú, i bhfianaise infhaighteacht fhorleathan glantach agus dromchlaghníomhaithe úsáideora deiridh agus an ardriosca go dtarlódh nimhiú de thaisme, go háirithe i gcás leanaí, ba cheart rochtain a bheith ag comhlachtaí ceaptha na mBallstát faoi Rialachán (CE) Uimh. 1272/2008 a thacaíonn leis an bpráinnfhreagairt sláinte ar fhaisnéis cháilíochtúil agus chainníochtúil maidir le comhdhéanamh glantach agus dromchlaghníomhaithe úsáideora deiridh, fiú mura gceanglaítear sin faoin Rialachán sin. Dá bhrí sin, sula gcuirfear na táirgí sin ar an margadh, ba cheart do mhonaróirí agus, i gcás inarb infheidhme, dá n-allmhaireoir nó dá n-ionadaí údaraithe bileog sonraí comhábhar a sholáthar maidir le glantaigh agus dromchlaghníomhaithe úsáideora deiridh ar meascáin iad nach bhfuil guaiseach do shláinte an duine. Ina theannta sin, ba cheart do dháileoirí a chuireann na táirgí ar fáil ar an margadh i mBallstáit seachas na Ballstáit ina bhfuil na táirgí ar fáil cheana féin, bileog sonraí na gcomhábhar a sholáthar freisin. Chun cumarsáid na faisnéise a bharrfheabhsú, ba cheart na hoibleagáidí sa Rialachán seo a bheith ag cur leis an gcóras a bhaineann le práinnfhreagairt sláinte a bunaíodh cheana faoi Rialachán (CE) Uimh. 1272/2008, ós rud é go bhfuil cur amach ag go leor oibreoirí eacnamaíocha agus lárionad nimhe air cheana féin. Ba cheart an Coimisiún a chumhachtú chun na ceanglais theicniúla a leagan amach ó thaobh an oibleagáid a chomhlíonadh maidir le bileog sonraí na gcomhábhar a sholáthar.

(30)

Cuirtear faisnéis thábhachtach úsáide agus sábháilteachta in iúl d’úsáideoirí ar lipéid, mar shampla, gur ann d’íogróirí craicinn nó riospráide, mar shampla cumhráin ailléirgineacha, leasaithigh nó einsímí, i nglantaigh agus i ndromchlaghníomhaithe. Trí fhaisnéis a sholáthar maidir le hábhar na substaintí sin ar lipéid glantach agus dromchlaghníomhaithe, is féidir le húsáideoirí a bhfuil ailléirgí orthu nó a bhfuil togracht acu chun ailléirgí roghanna eolasacha a dhéanamh, agus dá bhrí sin, laghdaítear an frithghníomh a d’fhéadfadh a bheith bainteach le húsáid glantach agus dromchlaghníomhaithe. Is gá dá bhrí sin ceanglais lipéadaithe a bhunú maidir le glantaigh agus dromchlaghníomhaithe.

(31)

Toisc go bhféadfadh lipéadú glantach agus dromchlaghníomhaithe teacht faoi ghníomhartha éagsúla dlí de chuid an Aontais, ní mór an fhaisnéis ar lipéid glantach agus dromchlaghníomhaithe a chuíchóiriú ionas gur aon uair amháin a sholáthrófar faisnéis atá i gcomhréir leis na rialacha níos déine nuair is gá faisnéis chomhchosúil a eascraíonn as gníomhartha éagsúla dlí de chuid an Aontais a chur ar lipéid glantach agus dromchlaghníomhaithe. Leis an gcuíchóiriú sin, ar thaobh amháin, chuirfí feabhas ar inléiteacht agus sothuigtheacht na lipéad ag úsáideoirí deiridh agus, ar an taobh eile, laghdófaí an t-ualach riaracháin ar mhonaróirí.

(32)

Is comhdhúile orgánacha iad substaintí cumhráin le bolaithe saintréitheacha, a bhíonn go deas de ghnáth, a úsáidtear go forleathan i nglantaigh agus a úsáidtear freisin i gcuid mhaith earraí eile, mar shampla, cumhráin agus cosmaidí cumhraithe eile. D’fhéadfadh na substaintí sin frithghníomh ailléirgeach a chruthú ar theagmháil leo, go háirithe i gcás daoine íograithe, fiú nuair is ann dóibh i dtiúchana ísle. Tá sé tábhachtach dá bhrí sin faisnéis a sholáthar maidir leis na hailléirginí aonair atá i nglantaigh ionas go mbeidh daoine íograithe in ann teagmháil leis an tsubstaint a bhfuil ailléirge orthu ina leith a sheachaint. Ba cheart ceanglais shonracha maidir le lipéadú a leagan síos, dá bhrí sin, nach mbeadh feidhm acu ach amháin sa chás nach mbeidh lipéid le cur ar na hailléirginí cumhráin faoi Rialachán (CE) Uimh. 1272/2008. Ní hamháin go gcuirfí cosc leis sin ar ualach riaracháin gan ghá a bheith á chur ar oibreoirí eacnamaíocha ach d’áiritheofaí leis freisin go bhfaigheadh tomhaltóirí nó úsáideoirí deiridh eile an fhaisnéis sin agus í curtha i láthair ar bhealach soiléir, rud a sholáthródh, dá bhrí sin, ardleibhéal cosanta do shláinte an duine do dhaoine íograithe.

(33)

Tá ceanglais bhreise lipéadaithe de dhíth maidir le substaintí áirithe amhail leasaithigh chun ardleibhéal cosanta a áirithiú do shláinte an duine. Ba cheart na ceanglais lipéadaithe maidir le leasaithigh, dá bhrí sin, ní hamháin na leasaithigh sin a chuireann an monaróir leis an nglantach d’aon ghnó a chumhdach ach freisin na leasaithigh a eascraíonn as na meascáin atá ina gcuid dá chomhábhair agus a dtagraítear dóibh go minic mar ‘leasaithigh tuliompair’.

(34)

An fhaisnéis maidir leis an méid ceart glantaigh is gá do thomhaltóirí a úsáid nuair a thugann siad faoi ghníomhaíochtaí glantacháin, is é sin, faisnéis dáileoige, ba cheart í a áireamh ar lipéad na nglantach níocháin do thomhaltóirí, na nglantach miasniteoirí uathoibríocha tomhaltóra agus na nglantach dromchlaí do thomhaltóirí chun ró-úsáid ionchasach na nglantach a chosc, rud a laghdóidh an méid iomlán glantaigh agus dromchlaghníomhaí a rachaidh isteach sa chomhshaol.

(35)

D’fhéadfadh an lipéadú digiteach feabhas a chur ar an gcaoi a gcuirtear an fhaisnéis faoi lipéadú in iúl trí lipéid fhisiceacha ró-ualaithe a sheachaint agus trína chur ar a gcumas d’úsáideoirí brath ar roghanna léitheoireachta éagsúla atá ar fáil le haghaidh formáidí digiteacha amháin, amhail cló méadaithe, cuardach uathoibríoch, callairí arda nó aistriúchán go teangacha eile. D’fhéadfadh lipéadú digiteach cur, dá réir sin, le hinléiteacht, éascaíocht úsáide agus tuiscint na lipéad do thomhaltóirí, lena n-áirítear tomhaltóirí leochaileacha agus tomhaltóirí lagamhairc. Chomh maith leis sin, ach lipéid dhigiteacha a sholáthar d’fhéadfadh sé go ndéanfadh oibreoirí eacnamaíocha a gcuid oibleagáidí maidir le lipéadú a bhainistiú ar bhealach níos éifeachtúla, trína dhéanamh níos éasca an fhaisnéis faoi lipéadú a thabhairt cothrom le dáta, na costais a bhaineann le lipéadú a laghdú agus soláthar faisnéise níos spriocdhírithe a chur ar fáil d’úsáideoirí. Dá bhrí sin, ba cheart a cheadú d’oibreoirí eacnamaíocha faisnéis áirithe faoi lipéadú a sholáthar maidir le glantaigh tríd an lipéad digiteach amháin, faoi réir coinníollacha áirithe chun ardleibhéal cosanta a áirithiú d’úsáideoirí.

(36)

Ionas nach gcuirfí ualach riaracháin gan ghá ar oibreoirí eacnamaíocha agus toisc go bhfuil an lipéad digiteach comhlántach leis an lipéad fisiceach, ba cheart d’oibreoirí eacnamaíocha a bheith in ann cinneadh a dhéanamh faoi cé acu lipéid dhigiteacha a úsáid nó gan iad a úsáid nó an fhaisnéis go léir a sholáthar ar lipéad fisiceach amháin. Ba cheart an rogha maidir le lipéad digiteach a sholáthar a bheith faoi mhonaróirí agus allmhaireoirí, atá freagrach as tacar cruinn faisnéise faoi lipéadú a sholáthar.

(37)

D’fhéadfadh lipéadú digiteach dúshláin a chruthú freisin do ghrúpaí leochaileacha den phobal nach bhfuil scileanna digiteacha ar bith acu nó nach leor a scileanna digiteacha agus d’fhéadfaí an deighilt dhigiteach a threisiú dá bharr sin. Ar an gcúis sin, ba cheart a léiriú leis an bhfaisnéis shonrach atá le soláthar ar lipéad digiteach amháin leibhéal na hullmhachta digití atá ann faoi láthair agus staid ar leith úsáideoirí na nglantach, chomh maith le hullmhacht an bhonneagair teicneolaíochta gan sreang agus an bhonneagair theicneolaíoch eile is gá chun rochtain neamhshrianta ar an bhfaisnéis a cheadú. Ina theannta sin, an fhaisnéis uile faoi lipéadú a bhaineann le cosaint na sláinte agus an chomhshaoil, chomh maith leis na treoracha maidir leis an úsáid is lú a bhaint as glantaigh, ba cheart í a bheith le feiceáil fós ar an lipéad fisiceach, chun a chur ar a gcumas do thomhaltóirí agus d’úsáideoirí deiridh eile roghanna eolasacha a dhéanamh sula gceannaíonn siad an glantach agus chun láimhseáil shábháilte an ghlantaigh a áirithiú.

(38)

Maidir le glantaigh agus dromchlaghníomhaithe a dhíoltar le húsáideoirí deiridh trí athlíonadh, ba cheart a bheith in ann méid níos fairsinge faisnéise a sholáthar go digiteach, agus ar an gcaoi sin amháin, chun leas iomlán a bhaint ní hamháin as na tairbhí a bhaineann leis an digiteáil, ach as na tairbhí móra comhshaoil i dtéarmaí laghdú ar phacáistíocht agus ar dhramhaíl ghaolmhar ó phacáistíocht a chuireann cleachtas na ndíolachán athlíonta ar fáil freisin. Mar sin féin, ba cheart d’úsáideoirí deiridh treoracha dáileoige simplithe ar a laghad a fháil i bhfoirm fhisiceach le haghaidh glantaigh níocháin tomhaltóra agus faisnéis maidir le hailléirginí cumhráin agus leasaithigh, chun an riosca a bhaineann le frithghníomhaithe ailléirgeacha a sheachaint.

(39)

Chun cothrom na Féinne a áirithiú i measc oibreoirí eacnamaíocha a chuireann glantaigh ar fáil ar an margadh, agus chun cosaint a thabhairt do thomhaltóirí agus d’úsáideoirí deiridh eile, ba cheart ceanglais ghinearálta maidir le lipéadú digiteach a leagan síos. Mar shampla, ba cheart d’oibreoirí eacnamaíocha a áirithiú gur féidir lipéid dhigiteacha a rochtain go héasca agus saor in aisce agus go ndéanfaí an fhaisnéis éigeantach faoi lipéadú a cheanglaítear faoin Rialachán seo a dheighilt ón bhfaisnéis eile.

(40)

Agus an fhorbairt reatha ar na scileanna digiteacha á cur san áireamh, ba cheart d’oibreoirí eacnamaíocha an fhaisnéis faoi lipéadú a sholáthar do thomhaltóirí agus d’úsáideoirí deiridh eile ar bhealaí eile freisin i gcás nach féidir leo an lipéad digiteach a rochtain. Ba cheart an oibleagáid sin a fhorchur mar bheart sábháilteachta chun aon riosca ionchasach a laghdú a d’fhéadfadh eascairt as cás nach bhfuil fáil ar an bhfaisnéis faoi lipéadú, go háirithe a mhéid a bhaineann le glantaigh athlíonta nó dromchlaghníomhaithe úsáideora deiridh, i gcás ina bhféadfaí an fhaisnéis go léir a sholáthar ar lipéad digiteach, agus air sin amháin.

(41)

Ós rud é go mbaintear an úsáid chéanna as glantaigh agus dromchlaghníomhaithe úsáideora deiridh agus go bhfuil na rioscaí céanna ag baint leo gan beann ar an bhformáid ina gcuirtear ar fáil ar an margadh iad, ba cheart do na hoibreoirí eacnamaíocha a chuireann na táirgí sin ar fáil ar an margadh trí athlíonadh a áirithiú go gcomhlíonann na táirgí sin na ceanglais chéanna a chomhlíonann na táirgí i bpacáistiú aonair. Ina theannta sin, ba cheart do thomhaltóirí an fhaisnéis faoi lipéadú is gá a fháil agus glantaigh athlíonta á roghnú acu, agus ba cheart íoscheanglais sábháilteachta a leagan amach le haghaidh stáisiúin athlíonta. Ba cheart díolacháin athlíonta glantach, dá bhrí sin, a bheith cumhdaithe go sainráite leis an Rialachán seo chun ardleibhéal cosanta i ndáil le sláinte an duine agus leis an gcomhshaol a áirithiú agus chun cothrom na Féinne a áirithiú d’oibreoirí eacnamaíocha.

(42)

Chun coinneáil suas le forbairtí teicneolaíochta agus modhanna nua díolacháin, agus faisnéis mhaith do thomhaltóirí agus gníomhaíochtaí éifeachtúla faireachais margaidh á n-áirithiú ag an am céanna, ba cheart an fhaisnéis faoi lipéadú maidir le glantaigh agus dromchlaghníomhaithe a léiriú i gcás aon ciandíolacháin a dhéantar, lena n-áirítear trí mhargaí ar líne.

(43)

Bíonn faireachas margaidh níos simplí agus níos éifeachtúla más féidir inrianaitheacht glantaigh nó dromchlaghníomhaí a áirithiú ar fud an tslabhra soláthair ina iomláine. Le córas éifeachtúil inrianaitheachta éascaítear cúram na n-údarás faireachais margaidh rianú a dhéanamh ar oibreoirí eacnamaíocha a chuireann glantaigh nó dromchlaghníomhaithe neamhchomhlíontacha ar fáil ar an margadh.

(44)

Ba cheart do mhonaróirí pas táirge digiteach a chruthú chun faisnéis a sholáthar maidir le comhlíontacht glantach agus dromchlaghníomhaithe úsáideora deiridh leis an Rialachán seo. Cé go leagtar amach sa Rialachán seo inneachar íosta an phas táirge dhigitigh, ag tosú le dearbhú comhréireachta AE, d’fhéadfaí a bheartú amach anseo faisnéis bhreise, mar shampla, doiciméadacht theicniúil, a áireamh. Chun seiceálacha ar ghlantaigh nó ar dhromchlaghníomhaithe úsáideora deiridh ag údaráis faireachais margaidh a éascú agus chun ligean do na gníomhaithe sa slabhra soláthair, do thomhaltóirí agus d’úsáideoirí deiridh eile, agus do pháirtithe leasmhara ábhartha eile, mar shampla, eagraíochtaí na sochaí sibhialta agus taighdeoirí, rochtain a fháil ar an bhfaisnéis is gá, ar nós faisnéis comhábhar, ba cheart an fhaisnéis ar an bpas táirge digiteach a sholáthar go digiteach agus ar bhealach atá inrochtana go díreach agus áisiúil don úsáideoir trí iompróir sonraí. Ba cheart an t-iompróir sonraí a bheith infheicthe go soiléir ag an úsáideoir deiridh sula gceannaítear é, lena n-áirítear i gcás ina gcuirtear an glantach nó an dromchlaghníomhaí úsáideora deiridh ar fáil trí fhógra ar líne. Dá bhrí sin, ba cheart rochtain láithreach a bheith ag údaráis faireachais margaidh, ag údaráis chustaim, ag oibreoirí eacnamaíocha, ag tomhaltóirí agus ag úsáideoirí deiridh eile, tríd an iompróir sonraí, ar an bhfaisnéis atá ábhartha dóibh agus bunaithe ar a gcearta rochtana faoi seach.

(45)

Ionas nach gcuirfear costais ar chuideachtaí atá díréireach le tairbhí níos leithne, ba cheart an pas táirge digiteach a bheith sonrach do shamhail glantaigh nó dromchlaghníomhaí úsáideora deiridh. Ba cheart a mheas go mbaineann glantaigh nó dromchlaghníomhaithe úsáideora deiridh leis an múnla céanna fad nach mbeidh aon athrú ar an bhfoirmle ná ar an táirgeadh as a dtiocfadh modhnuithe ar lipéad na dtáirgí.

(46)

Chun dúbailt na hinfheistíochta sa digiteáil ó na gníomhaithe uile lena mbaineann a sheachaint, lena n-áirítear monaróirí, údaráis faireachais margaidh agus údaráis chustaim, i gcás ina gceanglaítear le dlí eile ar bith de chuid an Aontais pas táirge digiteach a bheith ann do ghlantaigh agus do dhromchlaghníomhaithe, ba cheart pas táirge digiteach aonair a bheith ar fáil ina mbeidh an fhaisnéis a cheanglaítear faoin Rialachán seo agus faoin dlí eile sin de chuid an Aontais. Ina theannta sin, ba cheart an pas táirge digiteach a bhunaítear faoin Rialachán seo a bheith idir-inoibritheach go hiomlán le haon phas táirge digiteach a cheanglaítear faoi dhlí eile de chuid an Aontais.

(47)

Go háirithe, le Rialachán (AE) 2024/1781 ó Pharlaimint na hEorpa agus ón gComhairle (10), leagtar síos freisin na ceanglais agus na sonraíochtaí teicniúla le haghaidh pas táirge digiteach, bunú clárlainne pasanna táirge digiteacha (‘an chlárlann’) ag an gCoimisiúin, ina stóráiltear faisnéis faoi phasanna táirge digiteacha agus idirnascadh na clárlainne sin le Córas Malartaithe Deimhnithe de chuid Ionad Ilfhreastail AE maidir le Custam a bunaíodh le Rialachán (AE) 2022/2399 ó Pharlaimint na hEorpa agus ón gComhairle (11). D’fhéadfaí glantaigh nó dromchlaghníomhaithe atá laistigh dá raon feidhme sa mheántéarma a áireamh leis an Rialachán sin, rud lena gceanglófaí dá bhrí sin pas táirge digiteach a chur ar fáil dóibh.

(48)

Dá bhrí sin, ba cheart don phas táirge digiteach le haghaidh na nglantach agus na ndromchlaghníomhaithe úsáideora deiridh, a chruthaítear faoin Rialachán seo, na ceanglais chéanna agus na heilimintí teicniúla céanna leo siúd a leagtar amach i Rialachán (AE) 2024/1781 a chomhlíonadh, lena n-áirítear gnéithe teicniúla, séimeantacha agus eagraíochtúla an Rialacháin a bhaineann leis an gcumarsáid ó cheann go ceann agus an malartú sonraí.

(49)

Tá sé ríthábhachtach go mbeadh sé soiléir do mhonaróirí agus d’úsáideoirí araon go ndearbhaíonn an monaróir go gcomhlíonann an táirge na ceanglais uile is infheidhme agus go nglacann an monaróir freagracht iomlán as an gcomhlíonadh sin, le cruthú an phas táirge dhigitigh do ghlantach nó do dhromchlaghníomhaí úsáideora deiridh.

(50)

I gcás nach soláthraítear faisnéis ach go digiteach, is gá a shoiléiriú gur cheart an fhaisnéis sin a sholáthar trí iompróir sonraí aonair, ach gur cheart í a sholáthar ar leithligh agus í in-idirdhealaithe go soiléir ó fhaisnéis eile. D’éascófaí leis sin obair na n-údarás faireachais margaidh agus sholáthrófaí leis soiléireacht do thomhaltóirí nó d’úsáideoirí deiridh eile maidir leis na míreanna éagsúla faisnéise atá ar fáil dóibh i bhformáid dhigiteach.

(51)

Tá feidhm ag Caibidil VII de Rialachán (AE) 2019/1020 ó Pharlaimint na hEorpa agus ón gComhairle (12), lena mbunaítear na rialacha a bhaineann le rialuithe ar tháirgí a thagann isteach i margadh an Aontais, maidir le glantaigh agus dromchlaghníomhaithe. Ní mór do na húdaráis atá i gceannas ar na rialuithe seo, is é sin na húdaráis chustaim i bhformhór na mBallstát, na rialuithe a fheidhmiú ar bhonn anailís riosca dá dtagraítear in Airteagail 46 agus 47 de Rialachán (AE) Uimh. 952/2013 ó Pharlaimint na hEorpa agus ón gComhairle (13), ar bhonn a gníomhartha cur chun feidhme agus na treoraíochta comhfhreagraí. Dá bhrí sin, níor cheart Caibidil VII de Rialachán (AE) 2019/1020 a mhodhnú leis an Rialachán seo ná an bealach a n-eagraíonn nó a bhfeidhmíonn na húdaráis atá i gceannas ar na rialuithe ar tháirgí a thagann isteach i margadh an Aontais.

(52)

I dteannta chreat na rialuithe a bhunaítear le Caibidil VII de Rialachán (AE) 2019/1020, ba cheart do na húdaráis chustaim a bheith in ann a fhíorú go huathoibríoch gur ann do phas táirge digiteach le haghaidh glantach agus dromchlaghníomhaithe allmhairithe atá faoi réir an Rialacháin seo chun na rialuithe ag teorainneacha seachtracha an Aontais a neartú agus chun cosc a chur le glantaigh agus dromchlaghníomhaithe neamhchomhlíontacha teacht isteach i margadh an Aontais.

(53)

I gcás ina gcuirtear glantaigh agus dromchlaghníomhaithe úsáideora deiridh a thagann ó thríú tíortha faoin nós imeachta custaim um scaoileadh i saorchúrsaíocht, ba cheart don oibreoir eacnamaíoch an tagairt do phas táirge digiteach le haghaidh na nglantach agus na ndromchlaghníomhaithe sin a chur ar fáil do na húdaráis chustaim. Ba cheart an tagairt sin a bheith ag comhfhreagairt d’aitheantóir clárúcháin uathúil arna chur in iúl don oibreoir eacnamaíoch ag an gclárlann. Ba cheart do na húdaráis chustaim a fhíorú, mar íoscheanglas, go gcomhfhreagraíonn an t-aitheantóir clárúcháin uathúil agus cód tráchtearraí ábhartha an ghlantaigh nó an dromchlaghníomhaí úsáideora deiridh a sholáthraítear nó a chuirtear ar fáil dóibh do na sonraí a stóráiltear sa chlárlann. Lamhálfadh sé sin do na húdaráis chustaim a fhíorú go bhfuil pas táirge digiteach ann do ghlantaigh agus do dhromchlaghníomhaithe allmhairithe. Chun an fíorú uathoibríoch sin a dhéanamh, ba cheart an t-idirnasc idir an chlárlann agus Córas Malartaithe Deimhnithe de chuid Ionad Ilfhreastail AE maidir le Custam a úsáid.

(54)

Leis na sonraí a chuimsítear sa phas táirge digiteach, beartaítear a lamháil do na húdaráis chustaim an bainistiú riosca a fheabhsú agus a éascú agus díriú níos fearr ar rialuithe ag an teorainn a chumasú. Dá bhrí sin, ba cheart do na húdaráis chustaim a bheith in ann na sonraí a chuimsítear sa phas táirge digiteach agus sa chlárlann lena mbaineann a aisghabháil agus a úsáid chun a gcúraimí a dhéanamh i gcomhréir le reachtaíocht an Aontais, lena n-áirítear bainistíocht riosca i gcomhréir le Rialachán (AE) Uimh. 952/2013.

(55)

Níor cheart fíorú uathoibríoch thagairt an phas táirge dhigitigh a dhéanann údaráis custaim le haghaidh glantaigh agus dromchlaghníomhaithe a thagann isteach i margadh an Aontais a chur in ionad freagrachtaí na n-údarás faireachais margaidh ná na freagrachtaí sin a mhodhnú, ach ba cheart ina ionad sin creat foriomlán na rialuithe ar tháirgí a thagann isteach i margadh an Aontais a chomhlánú leis. Ba cheart do na údaráis faireachais margaidh, i gcomhréir le Rialachán (AE) 2019/1020, seiceálacha a dhéanamh ar na sonraí sna pasanna táirge digiteacha, seiceálacha a dhéanamh ar tháirgí laistigh den mhargadh agus, i gcás ina gcuireann na húdaráis atá ainmnithe chun rialuithe a dhéanamh ag teorainneacha seachtracha an Aontais scaoileadh i saorchúrsaíocht ar fionraí, comhlíontacht agus rioscaí tromchúiseacha maidir le táirgí a chinneadh de bhun Chaibidil VII de Rialachán (AE) 2019/1020.

(56)

Is ionstraim fhíor-riachtanach é an faireachas margaidh chun cur i bhfeidhm ceart agus aonfhoirmeach dhlí an Aontais a áirithiú. Leagtar amach an creat chun faireachas margaidh a dhéanamh ar tháirgí atá faoi réir dhlí an Aontais um chomhchuibhiú i Rialachán (AE) 2019/1020. Dá bhrí sin, ba cheart do na Ballstáit faireachas margaidh a eagrú agus a dhéanamh ar ghlantaigh agus ar dhromchlaghníomhaithe i gcomhréir leis an Rialachán sin.

(57)

Déantar foráil i Rialachán (CE) Uimh. 648/2004 maidir le nós imeachta cosanta faoinar féidir leis an gCoimisiún scrúdú a dhéanamh ar an mbonn cirt atá le beart arna dhéanamh ag Ballstát i ndáil leis na glantaigh agus na dromchlaghníomhaithe a mheastar riosca a bheith i gceist leo. Chun trédhearcacht a mhéadú, is gá an nós imeachta cosanta a bhí ann roimhe a fheabhsú, d’fhonn é a dhéanamh níos éifeachtúla agus ag tarraingt ar an saineolas atá ar fáil sna Ballstáit. Ba cheart nós imeachta faoina gcuirfí páirtithe leasmhara ar an eolas faoi bhearta atá beartaithe a ghlacadh maidir le glantaigh agus dromchlaghníomhaithe lena mbaineann riosca do shláinte an duine, nó don chomhshaol, a chur in ionad an chórais a bhí ann roimhe sin. Ba cheart a cheadú do na húdaráis faireachais margaidh, i gcomhar leis na hoibreoirí eacnamaíocha ábhartha, gníomhú ag céim luath i leith na nglantach agus na ndromchlaghníomhaithe sin. Ba cheart don Choimisiún, trí bhíthin gníomhartha cur chun feidhme, agus an nós imeachta scrúdúcháin a leagtar síos i Rialachán (AE) Uimh. 182/2011 ó Pharlaimint na hEorpa agus ón gComhairle (14) á chur i bhfeidhm, a chinneadh an bhfuil bonn cirt le beart sealadach i ndáil le glantach nó dromchlaghníomhaí lena mbaineann riosca. Tá feidhm ag an nós imeachta coimirce sonrach sin gan dochar do ghnáthrialuithe a dhéanann údaráis faireachais margaidh i gcomhréir le Rialachán (AE) 2019/1020.

(58)

Léiríonn an taithí a fuarthas agus Rialachán (CE) Uimh. 648/2004 á chur i bhfeidhm, i gcásanna sonracha, go raibh riosca don tsláinte nó don chomhshaol ag baint mar sin féin le glantaigh agus dromchlaghníomhaithe a chomhlíon na ceanglais is infheidhme. Ba cheart forálacha a dhéanamh lena áirithiú go ndéanann údaráis faireachais margaidh beart in aghaidh aon ghlantach nó aon dromchlaghníomhaí lena mbaineann riosca do shláinte an duine nó don chomhshaol, fiú i gcás ina bhfuil siad ag cloí leis na ceanglais dhlíthiúla. Ba cheart don Choimisiún, trí bhíthin gníomhartha cur chun feidhme, agus an nós imeachta scrúdúcháin a leagtar síos in Rialachán (AE) Uimh. 182/2011 á chur i bhfeidhm, a chinneadh an bhfuil bonn cirt le beart sealadach i ndáil le glantaigh nó dromchlaghníomhaithe atá comhlíontach i gcás ina bhfionnfadh Ballstát go mbaineann riosca do shláinte agus do shábháilteacht an duine nó don chomhshaol leis na táirgí sin.

(59)

D’fhonn dul chun cinn teicniúil agus eolaíoch nó fianaise eolaíoch nua, agus leibhéal na hullmhachta digití a chur san áireamh, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh a tharmligean chuig an gCoimisiún i leith an méid seo a leanas: leasú a dhéanamh ar na hIarscríbhinní a ghabhann leis an Rialachán seo chun iad a chur in oiriúint don dul chun cinn teicniúil; na ceanglais ghinearálta maidir le lipéadú digiteach a fhorlíonadh a thuilleadh; leasú a dhéanamh ar an bhfaisnéis faoi lipéadú nach bhféadfaí a sholáthar ach amháin i bhformáid dhigiteach; leasú a dhéanamh ar theorainn na n-ailléirginí cumhráin nuair a bhunaítear teorainneacha tiúchana rioscabhunaithe aonair le haghaidh ailléirginí cumhráin faoi Rialachán (CE) Uimh. 1223/2009 ó Pharlaimint na hEorpa agus ón gComhairle (15) nó nuair a chuirtear ailléirginí cumhráin nua leis; agus leasú a dhéanamh ar na ceanglais in-bhithdhíghrádaitheachta atá ann cheana chun ceanglais in-bhithdhíghrádaitheachta a thabhairt isteach maidir le substaintí agus meascáin i nglantaigh, seachas dromchlaghníomhaithe, lena n-áirítear capsúil ghlantaigh, i gcás ina bhfuil gá leis sin mar gheall ar fhianaise eolaíoch nua nó i gcás ina gceadaítear maolú ar na critéir sin i gcásanna a bhfuil údar cuí leo. Ba cheart an Coimisiún a chumhachtú le leasú a dhéanamh, trí bhíthin gníomhartha tarmligthe, ar an bhfaisnéis shonrach atá le cur san áireamh sa phas táirge digiteach, chomh maith leis an bhfaisnéis atá le cur sa chlárlann. Ina theannta sin, chun obair na n-údarás custaim a éascú maidir le glantaigh agus dromchlaghníomhaithe agus na ceanglais a leagtar amach sa Rialachán seo, ba cheart an Coimisiún a chumhachtú le gníomhartha tarmligthe a ghlacadh lena leasaítear an Iarscríbhinn a ghabhann leis an Rialachán seo ina bhfuil an liosta de chóid tráchtearraí, mar a leagtar amach in Iarscríbhinn I a ghabhann le Rialachán (CEE) Uimh. 2658/87 (16) ón gComhairle, agus i dtuairiscí ar ghlantaigh agus ar dhromchlaghníomhaithe. Ar ghlacadh gníomhartha tarmligthe faoin Rialachán seo, tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (17). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(60)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún chun na ceanglais theicniúla mhionsonraithe a bhunú don phas táirge digiteach do ghlantaigh agus dromchlaghníomhaithe. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011.

(61)

I bhfianaise an ghá atá ann ardleibhéal cosanta a áirithiú i ndáil le sláinte an duine agus an comhshaol agus an ghá forbairtí nua bunaithe ar fhíorais eolaíocha a chur san áireamh, ba cheart don Choimisiún tuarascáil maidir le cur chun feidhme an Rialacháin seo a chur faoi bhráid Pharlaimint na hEorpa agus na Comhairle. Ba cheart don Choimisiún measúnú a dhéanamh ar, inter alia, cé acu atá nó nach bhfuil cuspóirí an Rialacháin seo á mbaint amach, agus an tionchar ar fhiontair bheaga agus mheánmhéide á gcur san áireamh. A mhéid a bhaineann le fosfar, ba cheart measúnú a bheith sa tuarascáil ar a indéanta atá sé teorainneacha fosfair a laghdú a thuilleadh, d’fhonn deireadh a chur de réir a chéile lena úsáid amach anseo, más féidir. A mhéid a bhaineann leis na substaintí is díobhálaí, ba cheart don Choimisiún, agus an méid a baineadh amach faoi dhlí ábhartha eile de chuid an Aontais á chur san áireamh aige, measúnú a dhéanamh ar an ngá le forálacha a áireamh sa Rialachán seo maidir le láithreacht na substaintí sin i nglantaigh agus i ndromchlaghníomhaithe, chun a áirithiú go gcomhlíonfar na spriocanna a leagtar amach sa Chomhaontú Glas don Eoraip maidir leis an gcur chuige cineálach i leith bainistiú riosca do na substaintí is díobhálaí i dtáirgí tomhaltais, agus d’fhonn deireadh a chur, b’fhéidir, le húsáid na substaintí sin de réir a chéile, más iomchuí. Ina theannta sin, a mhéid a bhaineann le substaintí gníomhacha bithicídeacha, ba cheart don Choimisiún measúnú a dhéanamh ar an ngá le rialacha níos déine a thabhairt isteach chun teacht timpeall ar scéim formheasa a bunaíodh le Rialachán (AE) Uimh. 528/2012 a sheachaint. Chun ardleibhéal cosanta do shláinte an duine agus don chomhshaol a áirithiú, chun nuálaíocht a chothú agus chun borradh a chur faoin iomaíochas, ba cheart don Choimisiún measúnú a dhéanamh ar na ceanglais sábháilteachta do ghlantaigh ina bhfuil miocrorgánaigh. Chun an t-aistriú chuig geilleagar iomlán ciorclach a éascú, ba cheart don Choimisiún measúnú a dhéanamh ar spriocanna a thabhairt isteach le haghaidh amhábhair in-athnuaite agus ábhar athchúrsáilte le haghaidh glantach.

(62)

Tugtar isteach leis an Rialachán seo go bhféadfaí cuid den fhaisnéis éigeantach faoi lipéadú a sholáthar ar lipéid dhigiteacha amháin i gcásanna áirithe agus ceanglaítear leis an Rialachán seo pas táirge digiteach a chruthú le haghaidh glantach agus dromchlaghníomhaithe. Dá bhrí sin, is gá foráil a dhéanamh maidir le dóthain ama a thabhairt d’oibreoirí eacnamaíocha a n-oibleagáidí faoin Rialachán seo a chomhlíonadh, do na Ballstáit chun an bonneagar riaracháin is gá a bhunú chun é a chur i bhfeidhm agus don Choimisiún chun cur chun feidhme cheanglais theicniúla an phas táirge dhigitigh a ullmhú. Dá dhroim sin, ba cheart cur i bhfeidhm an Rialacháin seo a chur siar go dtí dáta faoinar réasúnta é bailchríoch a bheith curtha ar na hullmhúcháin sin.

(63)

Chun an deimhneacht dhlíthiúil a áirithiú agus dramhaíl a chosc, is gá d’oibreoirí eacnamaíocha a bheith in ann stoc a dhíol atá sa slabhra dáilte cheana féin nó atá á stóráil ag dáta chur i bhfeidhm an Rialacháin seo. Dá bhrí sin, is gá foráil a dhéanamh maidir le socruithe idirthréimhseacha trínar féidir glantaigh agus dromchlaghníomhaithe a chur ar fáil ar an margadh, ar glantaigh agus dromchlaghníomhaithe iad a cuireadh ar an margadh cheana i gcomhréir le Rialachán (CE) Uimh. 648/2004 roimh an dáta sin gan gá do na táirgí sin an Rialachán seo a chomhlíonadh. Dá bhrí sin, ba cheart do dháileoirí a bheith in ann na glantaigh agus dromchlaghníomhaithe sin a sholáthar, is é sin stoc atá sa slabhra dáilte cheana féin, roimh dháta chur i bhfeidhm an Rialacháin seo.

(64)

Chun deimhneacht dhlíthiúil a áirithiú a thuilleadh agus dramhaíl a chosc, tá sé tábhachtach go mbeidh oibreoirí eacnamaíocha in ann, ar feadh tréimhse theoranta tar éis dháta chur i bhfeidhm an Rialacháin seo, stoc nach bhfuil sa slabhra dáilte go fóill a dhíol. Chuige sin, ba cheart socruithe idirthréimhseacha a dhéanamh freisin lena gceadaítear glantaigh agus dromchlaghníomhaithe nach bhfuil sa slabhra dáilte go fóill a chur ar an margadh ar dháta chur i bhfeidhm an Rialacháin seo, gan iallach a bheith ar na táirgí sin an Rialachán seo a chomhlíonadh, ar choinníoll go gcomhlíonann siad Rialachán (CE) Uimh. 648/2004. Dá bhrí sin, ba cheart do mhonaróirí agus d’allmhaireoirí a bheith in ann na glantaigh agus dromchlaghníomhaithe sin a chur ar an margadh, is é sin stoc nach bhfuil sa slabhra dáilte fós, tar éis dháta chur i bhfeidhm an Rialacháin seo. I bhfianaise chuspóir na hidirthréimhse sin, ba cheart an fhéidearthacht sin a theorannú go docht ó thaobh ama de go bliain amháin tar éis an dáta sin agus, go háirithe, níor cheart é a bheith indéanta an stoc sin a chur ar fáil ar an margadh tar éis na tréimhse bliana sin.

(65)

Ós rud é nach féidir leis na Ballstáit cuspóirí an Rialacháin seo, mar atá feidhmiú an mhargaidh inmheánaigh a ráthú agus a áirithiú an tráth céanna go gcomhlíonann na glantaigh agus na dromchlaghníomhaithe atá ar an margadh na ceanglais lena ndéantar foráil maidir le hardchéim chosanta i ndáil leis an tsláinte agus leis an gcomhshaol, a ghnóthú go leordhóthanach agus, de bharr a bhfairsinge agus a n-éifeachtaí, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú,