DIRETTIVA (UE) 2024/2881 TAL-PARLAMENT EWROPEW U TAL-KUNSILL tat-23 ta’ Ottubru 2024 dwar il-kwalità tal-arja ambjentali u arja iktar nadifa għall-Ewropa (tfassil mill-ġdid)

(1)

Id-Direttivi 2004/107/KE (4) u 2008/50/KE (5) tal-Parlament Ewropew u tal-Kunsill ġew emendati b’mod sostanzjali. Peress li għandhom isiru iżjed emendi, jenħtieġ li dawk id-Direttivi jiġu riformulati fl-interess taċ-ċarezza.

(2)

Il-Kummissjoni, fil-komunikazzjoni tagħha tal-11 ta’ Diċembru 2019 intitolata “Il-Patt Ekoloġiku Ewropew”, stabbiliet pjan direzzjonali ambizzjuż biex l-Unjoni tinbidel f’soċjetà ġusta u prospera, b’ekonomija moderna, effiċjenti fl-użu tar-riżorsi u kompetittiva, bl-għan li tipproteġi, tikkonserva u ssaħħaħ il-kapital naturali tal-Unjoni, u li tipproteġi s-saħħa u l-benesseri taċ-ċittadini minn riskji u impatti relatati mal-ambjent. B’mod speċifiku dwar l-arja nadifa, il-Kummissjoni impenjat ruħha li tkompli ttejjeb il-kwalità tal-arja u li tallinja l-istandards tal-kwalità tal-arja tal-UE iktar mill-qrib mar-rakkomandazzjonijiet tal-Organizzazzjoni Dinjija tas-Saħħa (WHO). Fil-Patt Ekoloġiku Ewropew, il-Kummissjoni ħabbret ukoll it-tisħiħ tad-dispożizzjonijiet dwar il-monitoraġġ, l-immudellar u l-ippjanar tal-kwalità tal-arja.

(3)

Fil-komunikazzjoni tagħha tat-12 ta’ Mejju 2021 intitolata “Perkors għal Pjaneta b’Saħħitha għal Kulħadd – Pjan ta’ Azzjoni tal-UE: Lejn Tniġġis Żero għall-Arja, għall-Ilma u għall-Ħamrija”, il-Kummissjoni stabbiliet “Pjan ta’ Azzjoni ta’ Tniġġis Żero” li, fost l-oħrajn, jindirizza l-aspetti tat-tniġġis tal-Patt Ekoloġiku Ewropew u fih il-Kummissjoni timpenja ruħha wkoll li sal-2030, tnaqqas l-impatt tat-tniġġis tal-arja fuq is-saħħa b’iktar minn 55 % u l-ekosistemi tal-Unjoni fejn it-tniġġis tal-arja jhedded il-bijodiversità b’25 %.

(4)

Il-Pjan ta’ Azzjoni ta’ Tniġġis Żero jistabbilixxi wkoll viżjoni għall-2050, fejn it-tniġġis tal-arja jitnaqqas għal livelli li ma jibqgħux jitqiesu ta’ ħsara għas-saħħa u għall-ekosistemi naturali. Għal dak il-għan, jenħtieġ li jiġi segwit approċċ fi stadji lejn l-istabbiliment ta’ standards attwali u futuri tal-kwalità tal-arja tal-Unjoni, l-istabbiliment ta’ standards tal-kwalità tal-arja għall-2030 u lil hinn, u l-iżvilupp ta’ perspettiva għall-allinjament mal-Linji Gwida l-iktar aġġornati tal-WHO dwar il-Kwalità tal-Arja sa mhux iktar tard mill-2050 abbażi ta’ mekkaniżmu ta’ rieżami regolari biex titqies l-aħħar evidenza xjentifika. Minħabba r-rabtiet bejn it-tnaqqis tat-tniġġis u d-dekarbonizzazzjoni, l-għan fit-tul li tinkiseb l-ambizzjoni ta’ tniġġis żero jenħtieġ li jiġi segwit flimkien mat-tnaqqis tal-emissjonijiet ta’ gassijiet serra kif stabbilit bir-Regolament (UE) 2021/1119 tal-Parlament Ewropew u tal-Kunsill (6).

(5)

F’Settembru 2021, il-WHO aġġornat il-Linji Gwida tagħha dwar il-Kwalità tal-Arja, abbażi ta’ rieżami sistematiku tal-evidenza xjentifika dwar l-effetti tat-tniġġis tal-arja fuq is-saħħa. Il-Linji Gwida aġġornati tal-WHO dwar il-Kwalità tal-Arja jenfasizzaw evidenza ġdida dwar l-effetti li jseħħu f’livelli baxxi ta’ esponiment għat-tniġġis tal-arja, u jifformulaw livelli ta’ linji gwida dwar il-kwalità tal-arja iktar baxxi għall-materja partikolata (PM10 u PM2,5) u għad-diossidu tan-nitroġenu meta mqabbla mal-linji gwida preċedenti. Din id-Direttiva tqis l-aħħar evidenza xjentifika, inklużi l-Linji Gwida l-iktar aġġornati tal-WHO dwar il-Kwalità tal-Arja.

(6)

Matul l-aħħar tletin sena, il-leġiżlazzjoni tal-Unjoni u dik nazzjonali wasslu għal tnaqqis kostanti fl-emissjonijiet ta’ sustanzi li jniġġsu l-arja li jagħmlu l-ħsara u għal titjib korrispondenti fil-kwalità tal-arja. L-għażliet ta’ politika analizzati skont il-valutazzjoni tal-impatt li takkumpanja din id-Direttiva jindikaw benefiċċji soċjoekonomiċi netti addizzjonali minn tnaqqis ulterjuri tat-tniġġis tal-arja, filwaqt li l-benefiċċji tas-saħħa u ambjentali stmati jegħlbu b’mod sinifikanti l-kostijiet tal-implimentazzjoni mistennija.

(7)

Meta jieħdu l-miżuri rilevanti fil-livell tal-Unjoni u f’dak nazzjonali biex jintlaħaq l-għan ta’ tniġġis żero għat-tniġġis tal-arja, l-Istati Membri, il-Parlament Ewropew, il-Kunsill u l-Kummissjoni jenħtieġ li jkunu ggwidati mill- prinċipju ta’ prekawzjoni, u mill-prinċipji li jenħtieġ li tittieħed azzjoni ta’ prevenzjoni, li l-ħsara ambjentali jenħtieġ li tiġi riflessa bħala prijorità fis-sors u li min iniġġes jenħtieġ li jħallas, stabbiliti fit-Trattat dwar il-Funzjonament tal-Unjoni Ewropea (TFUE), u mill-prinċipju ta’ “la tagħmilx ħsara” tal-Patt Ekoloġiku Ewropew, filwaqt li jirrikonoxxu d-dritt tal-bniedem għal ambjent nadif, b’saħħtu u sostenibbli kif rikonoxxut fir-Riżoluzzjoni 76/300 adottata mill-Assemblea Ġenerali tan-Nazzjonijiet Uniti (NU) fit-28 ta’ Lulju 2022. Huma jenħtieġ li, fost l-oħrajn, iqisu l-elementi li ġejjin: il-kontribut ta’ kwalità tal-arja mtejba għas-saħħa pubblika, il-kwalità tal-ambjent u r-reżiljenza tal-ekosistema, il-benesseri taċ-ċittadini, l-ugwaljanza u l-protezzjoni ta’ popolazzjoni sensittiva u gruppi vulnerabbli, il-kostijiet tal-kura tas-saħħa, il-prosperità tas-soċjetà, l-impjiegi u l-kompetittività tal-ekonomija; it-tranżizzjoni tal-enerġija, it-tisħiħ tas-sigurtà tal-enerġija u l-indirizzar tal-faqar enerġetiku; is-sigurtà u l-affordabbiltà tal-ikel; l-iżvilupp ta’ soluzzjonijiet ta’ mobbiltà u trasport sostenibbli u intelliġenti u infrastruttura relatata; l-impatt tal-bidliet fl-imġiba; l-impatt tal-politiki fiskali; l-ekwità u s-solidarjetà fost l-Istati Membri u fi ħdanhom, fid-dawl tal-kapaċità ekonomika tagħhom, iċ-ċirkostanzi nazzjonali tagħhom, bħal pereżempju l-ispeċifiċitajiet tal-gżejjer, u l-ħtieġa li jkun hemm il-konverġenza maż-żmien; il-ħtieġa li t-tranżizzjoni tkun waħda xierqa u soċjalment ekwa permezz ta’ programmi edukattivi u ta’ taħriġ xierqa, inkluż għall-professjonisti tal-kura tas-saħħa; l-aqwa evidenza xjentifika disponibbli u l-iktar aġġornata, b’mod partikolari s-sejbiet irrappurtati mill-WHO; il-ħtieġa li r-riskji relatati mat-tniġġis tal-arja jiġu integrati fid-deċiżjonijiet dwar l-investiment u l-ippjanar; il-kosteffettività, l-aħjar soluzzjonijiet teknoloġiċi disponibbli u n-newtralità teknoloġika fil-kisba tat-tnaqqis tal-emissjonijiet ta’ sustanzi li jniġġsu fl-arja u l-progress li jkun qed isir maż-żmien b’rabta mal-integrità ambjentali u mal-livell ta’ ambizzjoni.

(8)

Din id-Direttiva tikkontribwixxi biex jintlaħqu l-Għanijietjiet ta’ Żvilupp Sostenibbli (SDGs), b’mod partikolari l-SDGs 3, 7, 10, 11, u 13.

(9)

Il-Programm Ġenerali ta’ Azzjoni Ambjentali tal-Unjoni sal-2030 stabbilit fid-Deċiżjoni (UE) 2022/591 tal-Parlament Ewropew u tal-Kunsill (7) (“it-Tmien Programm ta’ Azzjoni Ambjentali”) jistabbilixxi, fost l-oħrajn, l-għan li jinkiseb ambjent mhux tossiku, u li jipproteġi s-saħħa u l-benesseri tan-nies, tal-annimali u tal-ekosistemi minn riskji relatati mal-ambjent u impatti negattivi, u, għal dak l-għan, jistipula, fost l-oħrajn, li huwa meħtieġ iktar titjib tal-metodi ta’ monitoraġġ, kooperazzjoni internazzjonali aħjar, informazzjoni aħjar għall-pubbliku u aċċess għall-ġustizzja. Dan jiggwida l-għanijietjiet stabbiliti f’din id-Direttiva.

(10)

Il-Kummissjoni jenħtieġ li tirrieżamina regolarment l-evidenza xjentifika relatata mas-sustanzi niġġiesa, l-effetti tagħhom fuq is-saħħa tal-bniedem u l-ambjent, u, fost l-oħrajn, il-kostijiet diretti u indiretti tal-kura tas-saħħa assoċjati mat-tniġġis tal-arja, l-impatti soċjoekonomiċi, il-kostijiet ambjentali, u l-iżviluppi tal-imġiba, fiskali u teknoloġiċi. Abbażi tar-rieżami tagħha, jenħtieġ li l-Kummissjoni tivvaluta jekk l-istandards tal-kwalità tal-arja applikabbli għadhomx xierqa biex jintlaħqu l-għanijiet ta’ din id-Direttiva. Jenħtieġ li l-Kummissjoni twettaq l-ewwel rieżami sal-31 ta’ Diċembru 2030. Meta twettaq rieżami, il-Kummissjoni jenħtieġ li tivvaluta l-għażliet u l-iskedi ta’ żmien għall-allinjament tal-istandards tal-kwalità tal-arja mal-iktar Linji Gwida reċenti tal-WHO dwar il-Kwalità tal-Arja, jekk l-istandards tal-kwalità tal-arja jeħtiġux li jiġu aġġornati fid-dawl tal-aħħar informazzjoni xjentifika, jekk jenħtieġx li jiġu koperti sustanzi niġġiesa tal-arja addizzjonali u jekk għandhomx jiġu emendati d-dispożizzjonijiet dwar il-posponiment tal-iskadenzi għall-kisba u t-tniġġis tal-arja transfruntier. Wara r-rieżami tagħha, jenħtieġ li l-Kummissjoni, fejn tqis li jkun meħtieġ, tippreżenta proposta biex tirrevedi l-istandards tal-kwalità tal-arja jew biex tkopri sustanzi niġġiesa oħra tal-arja. Fejn il-Kummissjoni tqis li jkun meħtieġ, jenħtieġ li tippreżenta wkoll proposti biex tintroduċi jew tirrevedi kwalunkwe leġiżlazzjoni tas-sors rilevanti sabiex tikkontribwixxi għall-kisba tal-istandards riveduti tal-kwalità tal-arja proposti fil-livell tal-Unjoni u tipproponi azzjonijiet ulterjuri li għandhom jittieħdu fil-livell tal-Unjoni.

(11)

Jenħtieġ li jiġi segwit approċċ komuni għall-valutazzjoni tal-kwalità tal-arja ambjentali bl-applikazzjoni ta’ kriterji ta’ valutazzjoni komuni. Fil-valutazzjoni tal-kwalità tal-arja ambjentali, jenħtieġ li jittieħed kont tad-daqs tal-popolazzjonijiet u tal-ekosistemi esposti għat-tniġġis tal-arja. Huwa għalhekk xieraq li t-territorju ta’ kull Stat Membru jiġi kklassifikat f’żoni li jirriflettu d-densità tal-popolazzjoni u l-unitajiet territorjali tal-esponiment medju.

(12)

Il-kejl fiss jenħtieġ li jkun obbligatorju f’żoni fejn jinqabżu l-livelli limitu ta’ valutazzjoni. Applikazzjonijiet ta’ mmudellar u kejl indikattiv, flimkien ma’ informazzjoni minn kejl fiss, jippermettu li d-data minn punt tkun tista’ tiġi interpretata f’termini ta’ distribuzzjoni ġeografika ta’ konċentrazzjonijiet. L-użu ta’ tali metodi tekniċi supplimentari ta’ valutazzjoni jenħtieġ li jippermetti wkoll it-tnaqqis tal-għadd minimu meħtieġ ta’ punti ta’ kampjunar għal kejl fiss f’żoni fejn il-valuri limitu jew il-valuri fil-mira jiġu ssodisfati iżda l-limitu ta’ valutazzjoni jinqabeż. F’żoni fejn il-valuri limitu jew il-valuri fil-mira jinqabżu, minn sentejn wara l-adozzjoni tal-atti ta’ implimentazzjoni dwar l-applikazzjonijiet ta’ mmudellar u dwar id-determinazzjoni tar-rappreżentattività spazjali tal-punti ta’ kampjunar, jenħtieġ li jintużaw applikazzjonijiet ta’ mmudellar jew kejl indikattiv flimkien ma’ kejl fiss obbligatorju biex tiġi vvalutata l-kwalità tal-arja ambjentali. Monitoraġġ addizzjonali tal-konċentrazzjonijiet fl-isfond u d-depożizzjoni ta’ sustanzi niġġiesa fl-arja ambjentali jenħtieġ li jitwettaq ukoll biex jippermetti fehim aħjar tal-livelli ta’ tniġġis u d-dispersjoni.

(13)

Meta applikabbli, jenħtieġ li jiġu applikati applikazzjonijiet ta’ mmudellar sabiex data minn punt speċifiku tkun tista’ tiġi interpretata f’termini ta’ distribuzzjoni ġeografika ta’ konċentrazzjoni ta’ sustanzi niġġiesa, li jista’ jgħin biex jiġi identifikat ksur ta’ standards tal-kwalità tal-arja u biex jiġu infurmati l-pjanijiet dwar il-kwalità tal-arja u l-pjanijiet direzzjonali dwar il-kwalità tal-arja u t-tqegħid tal-punti ta’ kampjunar. Minbarra r-rekwiżiti għall-monitoraġġ tal-kwalità tal-arja definiti f’din id-Direttiva, għall-finijiet ta’ monitoraġġ, l-Istati Membri huma mħeġġa jisfruttaw il-prodotti ta’ informazzjoni u l-għodod supplimentari, pereżempju permezz ta’ rapporti regolari ta’ evalwazzjoni u valutazzjoni tal-kwalità jew applikazzjonijiet online ta’ politika, ipprovduti mill-komponent tal-Osservazzjoni tad-Dinja tal-Programm Spazjali tal-Unjoni, b’mod partikolari s-Servizz ta’ Monitoraġġ tal-Atmosfera ta’ Copernicus.

(14)

Huwa importanti li s-sustanzi niġġiesa ta’ tħassib emerġenti, bħall-partikoli ultrafini, il-karbonju iswed u l-karbonju elementali, kif ukoll l-ammonijaka u l-potenzjal ossidattiv tal-materja partikolata, jitkejjlu f’supersiti ta’ monitoraġġ kemm f’postijiet bi sfond rurali kif ukoll f’postijiet bi sfond urban sabiex jiġi appoġġat il-fehim xjentifiku tal-effetti tagħhom fuq is-saħħa u l-ambjent, kif irrakkomandat mil-WHO. Għall-Istati Membri li t-territorju tagħhom huwa inqas minn 10 000 km2, il-kejl f’supersiti ta’ monitoraġġ f’postijiet bi sfond urban ikun biżżejjed.

(15)

Jenħtieġ li jsir kejl dettaljat ta’ materja partikolata fina (PM2,5) sabiex jiġu mifhuma aħjar l-impatti ta’ dik is-sustanza niġġiesa u sabiex jiġu żviluppati politiki adegwati. Tali kejl jenħtieġ li jsir b’mod konsistenti ma’ dak tal-programm kooperattiv għall-monitoraġġ u l-evalwazzjoni tat-trażmissjoni fuq distanza twila ta’ sustanzi niġġiesa tal-arja fl-Ewropa (EMEP) stabbilit taħt il-Konvenzjoni tal-1979 dwar it-Tniġġis Transkonfini tal-Arja f’Distanza Twila tal-Kummissjoni Ekonomika għall-Ewropa tan-Nazzjonijiet Uniti (UNECE) approvata mid-Deċiżjoni tal-Kunsill 81/462/KEE (8) u l-Protokolli tagħha, inkluż il-Protokoll għat-tnaqqis tal-aċidifikazzjoni, l-ewtrofikazzjoni u l-ożonu troposferiku tal-1999, li ġie rivedut fl-2012.

(16)

Sabiex ikun żgurat li l-informazzjoni miġbura dwar it-tniġġis tal-arja tkun rappreżentattiva u paragunabbli biżżejjed fl-Unjoni kollha, huwa importanti li jintużaw metodi tekniċi ta’ kejl standardizzati u kriterji komuni għall-għadd u l-post ta’ punti ta’ kampjunar għall-valutazzjoni tal-kwalità tal-arja ambjentali. Jistgħu jintużaw metodi tekniċi li mhumiex kejl sabiex tiġi vvalutata l-kwalità tal-arja ambjentali u għalhekk huwa meħtieġ li jkunu definiti l-kriterji għall-użu u l-preċiżjoni meħtieġa ta’ tali metodi tekniċi.

(17)

Il-provvediment ta’ metodi ta’ kejl ta’ referenza hu rikonoxxut bħala kwistjoni importanti. Il-Kummissjoni diġà ordnat biex isir xogħol għat-tħejjija tal-istandards EN għall-kejl ta’ idrokarburi aromatiċi poliċikliċi u għall-evalwazzjoni tal-prestazzjoni tas-sistemi ta’ sensuri għad-determinazzjoni tal-konċentrazzjonijiet tas-niġġiesa gassużi u l-materja partikolata (PM10 and PM2,5) fl-arja ambjentali bil-għan li jiġu żviluppati u adottati malajr. Fejn m’ hemmx metodi standard EN, l-użu ta’ metodi ta’ kejl ta’ referenza standard internazzjonali, metodi ta’ kejl ta’ referenza nazzjonali jew speċifikazzjonijiet tekniċi tal-Kumitat Ewropew għall-Istandardizzazzjoni (CEN) jenħtieġ li jkun permess.

(18)

Sabiex jiġu protetti s-saħħa tal-bniedem u l-ambjent kollu, huwa partikolarment importanti li l-emissjonijiet ta’ sustanzi niġġiesa jiġu miġġielda f’ras il-għajn u li jiġu identifikati u implimentati l-miżuri l-iktar effettivi għat-tnaqqis ta’ emissjonijiet fil-livell lokali, nazzjonali u tal-Unjoni, b’mod partikolari f’dak li jirrigwarda l-emissjonijiet mill-agrikoltura, mill-industriji, mit-trasport, mis-sistemi ta’ tisħin u tkessiħ u mill-ġenerazzjoni tal-enerġija. Għalhekk, jenħtieġ li jiġu evitati, ipprevenuti jew imnaqqsa l-emissjonijiet ta’ sustanzi li jniġġsu fl-arja u li jagħmlu l-ħsara u jenħtieġ li jiġu stabbiliti standards xierqa għall-kwalità tal-arja abbażi ta’, fost l-oħrajn, l-iktar evidenza xjentifika aġġornata, inkluż ir-rakkomandazzjonijiet tal-WHO.

(19)

Evidenza xjentifika turi li d-diossidu tal-kubrit, id-diossidu tan-nitroġenu u l-ossidi tan-nitroġenu, il-materja partikolata (PM10 and PM2,5), il-benżen, il-monossidu tal-karbonju, l-arseniku, il-kadmju, iċ-ċomb, in-nikil, ċerti idrokarburi aromatiċi poliċikliċi u l-ożonu huma responsabbli għal għadd ta’ effetti negattivi sinifikanti fuq is-saħħa tal-bniedem, u huma marbuta ma’ diversi każijiet ta’ mard mhux komunikabbli, kundizzjonijiet ħżiena tas-saħħa u żieda fil-mortalità. L-impatt fuq is-saħħa tal-bniedem u fuq l-ambjent iseħħ permezz ta’ konċentrazzjonijiet fl-arja ambjentali u permezz tad-depożizzjoni.

(20)

Għalkemm it-tniġġis tal-arja huwa problema universali tas-saħħa, ir-riskji mhumiex mifruxa b’mod uniformi fost il-popolazzjoni peress li l-popolazzjoni sensittiva u l-gruppi vulnerabbli jinsabu f’riskju akbar ta’ ħsara minn oħrajn. Din id-Direttiva tirrikonoxxi r-riskji akbar għall-popolazzjoni sensittiva u l-gruppi vulnerabbli, u l-ħtiġijiet speċifiċi tagħhom, fir-rigward tat-tniġġis tal-arja u għandha l-għan li tinfurmahom u tipproteġihom.

(21)

Skont ir-Rapport Nru 22/2018 tal-Aġenzija Ewropea għall-Ambjent bit-titolu “Unequal exposure and unequal impacts: social vulnerability to air pollution, noise and extreme temperatures in Europe” (L-esponiment inugwali u l-impatti inugwali: il-vulnerabbiltà soċjali għat-tniġġis tal-arja, għall-istorbju u għat-temperaturi estremi fl-Ewropa), is-saħħa tal-persuni bi status soċjoekonomiku iktar baxx għandha t-tendenza li tiġi affettwata iktar mit-tniġġis tal-arja mis-saħħa tal-popolazzjoni ġenerali, u dan huwa riżultat kemm tal-esponiment akbar tagħhom kif ukoll tal-vulnerabbiltà ogħla tagħhom. Din id-Direttiva tqis l-aspetti soċjali tat-tniġġis tal-arja u l-impatti soċjoekonomiċi tal-miżuri meħuda.

(22)

L-effetti tal-arseniku, tal-kadmju, taċ-ċomb, tal-merkurju, tan-nikil u tal-idrokarburi aromatiċi poliċikliċi fuq is-saħħa tal-bniedem, inkluż permezz tal-katina tal-ikel, u l-ambjent, iseħħu wkoll permezz ta’ depożizzjoni. Jenħtieġ li titqies l-akkumulazzjoni ta’ dawk is-sustanzi fil-ħamrija u l-protezzjoni tal-ilma sotterran.

(23)

L-esponiment medju tal-popolazzjoni għas-sustanzi niġġiesa bl-ogħla impatt dokumentat fuq is-saħħa tal-bniedem, il-materja partikolata fina (PM2,5) u d-diossidu tan-nitroġenu jenħtieġ li jitnaqqas abbażi tar-rakkomandazzjonijiet l-iktar aġġornati tal-WHO. Għal dan l-għan, jenħtieġ li jiġi introdott obbligu ta’ tnaqqis tal-esponiment medju bħala standard komplementari tal-kwalità tal-arja, flimkien mal-valuri limitu iżda mhux bħala sostitut għalihom.

(24)

Il-Kontroll tal-Idoneità tad-Direttivi dwar il-Kwalità tal-Arja fl-Ambjent, li jkopri d-Direttivi 2004/107/KE u 2008/50/KE, wera li l-valuri limitu huma iktar effettivi biex inaqqsu l-konċentrazzjonijiet tas-sustanzi niġġiesa minn tipi oħra ta’ standards tal-kwalità tal-arja, bħall-valuri fil-mira. Bil-għan li jiġu minimizzati l-effetti dannużi fuq is-saħħa tal-bniedem, waqt li jittieħed kont partikolari tal-popolazzjonijiet sensittivi u tal-gruppi vulnerabbli, u l-ambjent, jenħtieġ li jiġu stabbiliti valuri limitu għall-konċentrazzjoni tad-diossidu tal-kubrit, id-diossidu tan-nitroġenu, il-materja partikolata (PM10 and PM2,5), il-benżen, il-monossidu tal-karbonju, l-arseniku, il-kadmju, iċ-ċomb, in-nikil u l-idrokarburi aromatiċi poliċikliċi fl-arja ambjentali. Il-benżo(a)piren jenħtieġ li jintuża bħala indikatur tar-riskju karċinoġenu tal-idrokarburi aromatiċi poliċikliċi fl-arja ambjentali.

(25)

Sabiex l-Istati Membri jkunu jistgħu jħejju għall- istandards riveduti tal-kwalità tal-arja stabbiliti minn din id-Direttiva u biex tiġi żgurata l-kontinwità legali, għal perjodu interim jenħtieġ li l-valuri limitu u l-valuri fil-mira jkunu identiċi għal dawk stabbiliti skont id-Direttivi mħassra sakemm jibdew japplikaw il-valuri limitu l-ġodda.

(26)

L-ożonu huwa sustanza niġġiesa b’effetti transkonfini fformat fl-atmosfera mill-emissjoni ta’ sustanzi niġġiesa primarji. Uħud minn dawk is-sustanzi niġġiesa atmosferiċi huma indirizzati mid-Direttiva (UE) 2016/2284 tal-Parlament Ewropew u tal-Kunsill (9). L-ożonu fil-livell tal-art jaffettwa ħażin mhux biss is-saħħa tal-bniedem iżda wkoll il-veġetazzjoni u l-ekosistemi. Il-progress lejn il-miri u l-għanijiet fit-tul għall-ożonu stabbiliti f’din id-Direttiva jenħtieġ li jiġi determinat mill-miri u mill-impenji tat-tnaqqis tal-emissjonijiet previsti fid-Direttiva (UE) 2016/2284 u, bl-implimentazzjoni ta’ miżuri kosteffettivi, pjanijiet direzzjonali dwar il-kwalità tal-arja u pjanijiet dwar il-kwalità tal-arja meta jkun xieraq.

(27)

Il-valuri fil-mira u l-għanijiet fit-tul tal-ożonu għall-iżgurar ta’ protezzjoni effettiva kontra l-effetti ta’ ħsara fuq is-saħħa tal-bniedem u l-veġetazzjoni u l-ekosistemi mill-esponiment għall-ożonu jenħtieġ li jiġu aġġornati fid-dawl tal-iktar evidenza xjentifika aġġornata, inkluż ir-rakkomandazzjonijiet tal-WHO.

(28)

Jenħtieġ li jiġu stabbiliti livell limitu ta’ allert u livell limitu ta’ informazzjoni għad-diossidu tal-kubrit, id-diossidu tan-nitroġenu, il-materja partikolata (PM10 u PM2,5)u l-ożonu għall-protezzjoni tal-popolazzjoni ġenerali, u speċjalment il-popolazzjoni sensittiva u l-gruppi vulnerabbli, minn esponimenti għal żmien qasir għal konċentrazzjonijiet għoljin ta’ sustanzi niġġiesa. Dawk il-livelli limitu jenħtieġ li jagħtu bidu għad-disseminazzjoni ta’ informazzjoni lill-pubbliku rigward ir-riskji għas-saħħa assoċjati tal-esponiment u l-implimentazzjoni, meta applikabbli, ta’ miżuri f’perjodu ta’ żmien qasir sabiex jitnaqqsu l-livelli tat-tniġġis meta l-livell limitu ta’ allert jinqabeż.

(29)

F’konformità mal-Artikolu 193 tat-TFUE, l-Istati Membri jistgħu jżommu jew jintroduċu miżuri protettivi aktar iebsa bil-kundizzjoni li jkunu kompatibbli mat-Trattati u li jiġu nnotifikati lill-Kummissjoni. Tali notifika tista’ tkun akkumpanjata minn spjegazzjoni tal-proċess ta’ kif dawk l-istandards tal-kwalità tal-arja jkunu ġew stabbiliti u l-informazzjoni xjentifika użata.

(30)

Meta l-istatus tal-kwalità tal-arja jkun diġà tajjeb, huwa jenħtieġ li jinżamm jew li jittejjeb. Fejn l-istandards tal-kwalità tal-arja stabbiliti f’din id-Direttiva jkunu fir-riskju li ma jintlaħqux, jew ma ntlaħqux, l-Istati Membri jenħtieġ li jadottaw miżuri f’konformità mal-iskedi ta’ żmien rilevanti stabbiliti f’din id-Direttiva sabiex jikkonformaw mal-valuri limitu, l-obbligi tat-tnaqqis tal-esponiment medju u l-livelli kritiċi u, fejn possibbli, sabiex jiksbu l-valuri fil-mira u l-għanijiet fit-tul għall-ożonu.

(31)

Il-merkurju hu sustanza perikoluża ħafna għas-saħħa tal-bniedem u għall-ambjent. Hu preżenti kullimkien fl-ambjent, fil-forma ta’ metilmerkurju, u għandu l-kapaċità li jakkumula f’organiżmi, u partikolarment li jikkonċentra ruħu f’organiżmi iktar ’il fuq fil-katina tal-ikel. Merkurju rilaxxat fl-atmosfera huwa kapaċi li jiġi ttrasportat fuq distanzi twal.

(32)

Ir-Regolament (UE) 2017/852 tal-Parlament Ewropew u tal-Kunsill (10) għandu l-għan li jipproteġi s-saħħa tal-bniedem u l-ambjent mir-rilaxx tal-merkurju, ibbażat fuq approċċ ta’ ċiklu tal-ħajja, u li jieħu kont tal-produzzjoni, tal-użu, tat-trattament tal-iskart u tal-emissjonijiet. Id-dispożizzjonijiet dwar il-monitoraġġ tal-merkurju f’din id-Direttiva jikkomplementaw u jipprovdu informazzjoni għal dak ir-Regolament.

(33)

Ir-riskji li joħloq it-tniġġis tal-arja għall-veġetazzjoni u l-ekosistemi naturali huma l-iktar importanti f’postijiet lil hinn minn żoni urbani. Il-valutazzjoni ta’ tali riskji u l-konformità mal-livelli kritiċi għall-protezzjoni tal-veġetazzjoni jenħtieġ li għalhekk jiffokaw fuq postijiet lil hinn minn żoni mibnija. Dik il-valutazzjoni jenħtieġ li tqis u tikkomplementa r-rekwiżiti skont id-Direttiva (UE) 2016/2284 biex timmonitorja l-impatti tat-tniġġis tal-arja fuq l-ekosistemi terrestri u akkwatiċi, u biex tirrapporta dawn l-impatti.

(34)

Il-kontributi minn sorsi naturali jistgħu jiġu vvalutati iżda ma jistgħux jiġu kkontrollati. Għalhekk, meta l-kontributi naturali għal sustanzi niġġiesa tal-arja ambjentali jistgħu jiġu ddeterminati b’ċertezza suffiċjenti, u meta l-qabżiet fuq il-limiti jkunu kompletament jew parzjalment dovuti għal dawn il-kontributi naturali, dawn jenħtieġ li jkunu jistgħu, taħt il-kundizzjonijiet stabbiliti f’din id-Direttiva, jitnaqqsu meta tkun qed tiġi vvalutata l-konformità mal-valuri limitu tal-kwalità tal-arja u l-obbligi tat-tnaqqis tal-esponiment medju. Il-kontribuzzjonijiet għall-qabżiet fuq il-valuri limitu ta’ materja partikolata (PM10) attribwibbli għat-tixrid tar-ramel fix-xitwa jew tal-melħ fit-toroq fix-xitwa jenħtieġ li jkunu jistgħu wkoll jitnaqqsu meta tkun qed tiġi vvalutata l-konformità mal-valuri limitu tal-kwalità tal-arja sakemm ikunu ttieħdu miżuri raġonevoli biex jitnaqqsu l-konċentrazzjonijiet. It-tnaqqis ta’ dawk il-kontributi ma jżommux lill-Istati Membri milli jieħdu azzjoni biex inaqqsu l-impatt tagħhom fuq is-saħħa.

(35)

Huwa kruċjali li tiġi mmonitorjata b’mod sistematiku l-kwalità tal-arja f’hotspots tat-tniġġis tal-arja, inkluż fejn il-livell tat-tniġġis huwa influwenzat immens mill-emissjonijiet minn sorsi ta’ tniġġis qawwi li jistgħu jesponu lill-individwi u lill-gruppi tal-popolazzjoni għal riskji elevati ta’ effetti negattivi fuq is-saħħa. Għal dak l-għan, l-Istati Membri jenħtieġ li jinstallaw punti ta’ kampjunar fil-hotspots tat-tniġġis tal-arja u jieħdu miżuri xierqa biex jimminimizzaw l-impatt tat-tniġġis tal-arja fuq is-saħħa tal-bniedem f’dawk il-hotspots.

(36)

Għal żoni fejn il-kundizzjonijiet huma partikolarment diffiċli, jenħtieġ li, b’mod eċċezzjonali, ikun possibbli li tiġi posposta l-iskadenza għall-konformità mal-valuri limitu tal-kwalità tal-arja f’każijiet fejn, minkejja l-implimentazzjoni ta’ miżuri xierqa għat-tnaqqis tat-tniġġis, jeżistu problemi kbar ta’ konformità f’żoni speċifiċi. Kwalunkwe posponiment għal żona partikolari jenħtieġ li tkun akkumpanjata minn pjan direzzjonali dwar il-kwalità tal-arja li għandu jiġi vvalutat mill-Kummissjoni. F’tali każ, jenħtieġ li l-pjan direzzjonali dwar il-kwalità tal-arja jistabbilixxi miżuri xierqa sabiex il-perjodu ta’ qbiż jinżamm qasir kemm jista’ jkun. Biex tiġi żgurata l-konformità, jenħtieġ li l-Istati Membri juru wkoll li l-miżuri fil-pjanijiet direzzjonali tagħhom dwar il-kwalità tal-arja ikunu ġew implimentati.

(37)

Jenħtieġ li jiġu żviluppati u aġġornati pjanijiet dwar il-kwalità tal-arja għal żoni jew unitajiet territorjali tal-esponiment medju li fihom il-konċentrazzjonijiet ta’ sustanzi niġġiesa fl-arja ambjentali jaqbżu l-valuri limitu rilevanti tal-kwalità tal-arja, il-valuri fil-mira jew l-obbligi tat-tnaqqis tal-esponiment medju. Jenħtieġ li jiġu żviluppati u aġġornati wkoll pjanijiet dwar il-kwalità tal-arja għall-qabżiet tal-valuri fil-mira għall-ożonu, ħlief jekk ma jkun hemm l-ebda potenzjal sinifikanti biex jitnaqqsu l-konċentrazzjonijiet tal-ożonu fiċ-ċirkostanzi partikolari u l-miżuri biex jiġu indirizzati l-qabżiet ikunu jinvolvu kostijiet sproporzjonati.

(38)

Is-sustanzi niġġiesa fl-arja jiġu minn ħafna sorsi u attivitajiet differenti. Sabiex tiġi żgurata l-koerenza bejn politiki differenti, il-pjanijiet dwar il-kwalità tal-arja jew il-pjanijiet direzzjonali dwar il-kwalità tal-arja jenħtieġ li jkunu konsistenti, fejn fattibbli, mal-pjanijiet u l-programmi ppreparati skont id-Direttivi 2002/49/KE (11) u 2010/75/UE (12) tal-Parlament Ewropew u tal-Kunsill u d-Direttiva (UE) 2016/2284.

(39)

Kif stabbilit mill-ġurisprudenza tal-Qorti tal-Ġustizzja (13), il-fatt li tfassal pjan dwar il-kwalità tal-arja ma jfissirx, fih innifsu, li Stat Membru madankollu jkun issodisfa l-obbligi tiegħu li jiżgura li l-livelli ta’ sustanzi niġġiesa tal-arja ma jaqbżux l-istandards tal-kwalità tal-arja stabbiliti b’din id-Direttiva.

(40)

Il-pjanijiet direzzjonali dwar il-kwalità tal-arja jenħtieġ li jitħejjew qabel l-2030 fejn ikun hemm riskju li l-Istati Membri ma jilħqux il-valuri limitu jew, meta jkun xieraq, il-valuri fil-mira sa dik id-data, sabiex jiġi żgurat li l-livelli ta’ sustanzi niġġiesa jitnaqqsu kif xieraq. Il-pjan direzzjonali dwar il-kwalità tal-arja jenħtieġ li jistabbilixxi politiki u miżuri sabiex jiġu rispettati dawk il-valuri limitu u, meta jkun xieraq, il-valuri fil-mira sal-iskadenza għall-kisba. Għal raġunijiet ta’ ċarezza legali, u minkejja t-terminoloġija speċifika użata, pjan direzzjonali dwar il-kwalità tal-arja huwa tip ta’ pjan dwar il-kwalità tal-arja kif definit f’din id-Direttiva.

(41)

Jenħtieġ li jiġu stabbiliti pjanijiet ta’ azzjoni għal żmien qasir li jindikaw il-miżuri li għandhom jittieħdu fuq perjodu ta’ żmien qasir fejn ikun hemm riskju li jinqabżu wieħed jew iktar mil-livelli limitu ta’ allert sabiex jitnaqqas dak ir-riskju u sabiex ikun limitat it-tul ta’ żmien tiegħu. L-Istati Membri jenħtieġ li jkunu jistgħu, f’ċerti ċirkostanzi, joqogħdu lura milli jistabbilixxu tali pjanijiet ta’ azzjoni għal żmien qasir għall-ożonu jekk ma jkun hemm l-ebda potenzjal sinifikanti biex jitnaqqsu r-riskju, it-tul ta’ żmien jew is-severità ta’ tali qabżiet.

(42)

It-tniġġis tal-arja m’għandux limiti u huwa mifrux madwar l-Unjoni. Fil-biċċa l-kbira tal-Istati Membri, sehem sinifikanti tat-tniġġis jiġi ġġenerat barra mit-territorju tagħhom. Meta jkun xieraq, l-Istati Membri jenħtieġ li jikkooperaw ma’ xulxin jekk, wara tniġġis sinifikanti li joriġina fi Stat Membru ieħor, il-livell ta’ sustanza niġġiesa jaqbeż, jew x’aktarx jaqbeż, kwalunkwe valur limitu, il-valur fil-mira, l-obbligu għat-tnaqqis tal-esponiment medju jew il-livell limitu ta’ allert. In-natura transkonfini ta’ sustanzi niġġiesa speċifiċi, bħall-ożonu u l-materja partikolata (PM10 u PM2,5), tirrikjedi li l-Istati Membri kkonċernati jikkooperaw ma’ xulxin sabiex jidentifikaw is-sorsi tat-tniġġis tal-arja u l-miżuri li għandhom jittieħdu biex jiġu indirizzati dawk is-sorsi u jitfasslu attivitajiet koordinati, bħall-koordinazzjoni tal-pjanijiet dwar il-kwalità tal-arja u l-pjanijiet ta’ azzjoni għal żmien qasir, li fihom kull Stat Membru jenħtieġ li jindirizza s-sorsi tat-tniġġis fit-territorju tiegħu, sabiex jitneħħew dawn il-qabżiet, kif ukoll biex jinfurmaw lill-pubbliku. Meta jkun xieraq, l-Istati Membri jenħtieġ li jfittxu l-kooperazzjoni ma’ pajjiżi terzi, b’enfasi partikolari fuq l-involviment bikri tal-pajjiżi kandidati. Il-Kummissjoni jenħtieġ li tiġi infurmata fil-ħin dwar kwalunkwe kooperazzjoni bħal din u tiġi mistiedna biex tkun preżenti u tassisti għal din il-kooperazzjoni, u jenħtieġ li tkun tista’ tipprovdi appoġġ tekniku lill-Istati Membri fuq talba meta jkun xieraq.

(43)

Jeħtieġ li l-Istati Membri u l-Kummissjoni jiġbru, jiskambjaw u jiddisseminaw l-informazzjoni dwar il-kwalità tal-arja sabiex jifhmu aħjar l-impatti tat-tniġġis tal-arja u jiżviluppaw politiki adegwati. Jenħtieġ li wkoll tkun faċilment disponibbli għall-pubbliku informazzjoni aġġornata, meta disponibbli, dwar il-konċentrazzjonijiet tas-sustanzi niġġiesa rregolati kollha fl-arja ambjentali, informazzjoni dwar l-impatti fuq is-saħħa, kif ukoll il-pjanijiet dwar il-kwalità tal-arja, il-pjanijiet direzzjonali dwar il-kwalità tal-arja u l-pjanijiet ta’ azzjoni għal żmien qasir b’mod koerenti u faċli biex jinftiehem.

(44)

Sabiex jiġi żgurat aċċess pubbliku wiesa’ għall-informazzjoni dwar il-kwalità tal-arja, jenħtieġ li dik l-informazzjoni ssir pubblika billi jintużaw kanali ta’ komunikazzjoni diġitali u, fejn rilevanti, mhux diġitali.

(45)

Informazzjoni dwar il-konċentrazzjonijiet u d-depożizzjoni tas-sustanzi niġġiesa li huma regolati jenħtieġ tingħadda lill-Kummissjoni biex isservi ta’ bażi għal rapporti regolari. Sabiex ikunu ffaċilitati t-trattament u l-paragun tal-informazzjoni dwar il-kwalità tal-arja, id-data jenħtieġ li ssir disponibbli għall-Kummissjoni f’forma standardizzata.

(46)

Huwa meħtieġ li jiġu adattati proċeduri għall-forniment tad-data, il-valutazzjoni u r-rapportar tal-kwalità tal-arja sabiex jippermettu l-użu ta’ mezzi elettroniċi u l-Internet bħala l-għodod ewlenin sabiex jagħmlu l-informazzjoni disponibbli, u sabiex tali proċeduri jkunu kompatibbli mad-Direttiva 2007/2/KE tal-Parlament Ewropew u tal-Kunsill (14).

(47)

Huwa xieraq li tkun prevista l-possibbiltà li l-kriterji u l-metodi tekniċi użati għall-valutazzjoni tal-kwalità tal-arja ambjentali jiġu adattati għall-progress xjentifiku u tekniku u li tiġi adattata għalihom l-informazzjoni li għandha tingħata.

(48)

Kif stabbilit mill-ġurisprudenza tal-Qorti tal-Ġustizzja (15), l-Istati Membri ma għandhomx jirrestrinġu l-pożizzjoni legali għall-kontestazzjoni ta’ deċiżjoni ta’ awtorità pubblika għal dawk il-membri tal-pubbliku kkonċernati li jkunu ħadu sehem fil-proċedura amministrattiva preċedenti għall-adozzjoni ta’ dik id-deċiżjoni. Barra minn hekk, kwalunkwe proċedura ta’ rieżami għandha tkun ġusta, ekwa, f’waqtha u mhux għalja b’mod projbittiv, u tipprevedi mekkaniżmi ta’ rimedju adegwati, inkluż rimedju b’mandat ta’ inibizzjoni kif xieraq. Barra minn hekk, f’konformità mal-ġurisprudenza tal-Qorti tal-Ġustizzja (16), l-aċċess għall-ġustizzja għandu, bħala minimu, jingħata lill-pubbliku kkonċernat.

(49)

Din id-Direttiva tirrispetta d-drittijiet fundamentali u tosserva l-prinċipji rikonoxxuti b’mod partikolari mill-Karta tad-Drittijiet Fundamentali tal-Unjoni Ewropea (il-“Karta”). Fejn tkun seħħet ħsara għas-saħħa tal-bniedem minħabba l-ksur tar-regoli nazzjonali li jittrasponu l-Artikolu 19(1) sa (5) u l-Artikolu 20(1) u (2) ta’ din id-Direttiva, u li l-ksur ikun sar b’mod intenzjonali jew negliġenti, l-Istati Membri jenħtieġ li jiżguraw li l-individwi affettwati minn tali ksur ikollhom id-dritt li jitolbu u jiksbu kumpens għal dik il-ħsara mill-awtorità kompetenti rilevanti. Ir-regoli dwar il-kumpens, l-aċċess għall-ġustizzja u l-penali stipulati f’din id-Direttiva għandhom l-għan li jevitaw, jipprevjenu u jnaqqsu l-effetti ta’ ħsara mit-tniġġis tal-arja fuq is-saħħa tal-bniedem u l-ambjent, f’konformità mal-Artikolu 191(1) tat-TFUE. Dawk ir-regoli jfittxu li jintegraw fil-politiki tal-Unjoni livell għoli ta’ protezzjoni tal-ambjent u t-titjib tal-kwalità tal-ambjent f’konformità mal-prinċipju ta’ żvilupp sostenibbli kif stabbilit fl-Artikolu 37 tal-Karta, u jpoġġu f’termini konkreti l-obbligu li jiġi protett id-dritt għall-ħajja u għall-integrità tal-persuna u d-dritt għall-kura tas-saħħa stabbilit fl-Artikoli 2, 3 u 35 tal-Karta. Din id-Direttiva tikkontribwixxi wkoll għad-dritt għal rimedju effettiv quddiem tribunal, kif stabbilit fl-Artikolu 47 tal-Karta, fir-rigward tal-protezzjoni tas-saħħa tal-bniedem. Il-pieni previsti f’din id-Direttiva jenħtieġ li jkunu effettivi, proporzjonati u dissważivi.

(50)

Sabiex ikunu żgurati kundizzjonijiet uniformi għall-implimentazzjoni ta’ din id-Direttiva, jenħtieġ li l-Kummissjoni tingħata setgħat ta’ implimentazzjoni fir-rigward ta’ dettalji tekniċi ulterjuri għall-applikazzjonijiet ta’ mmudellar; għad-determinazzjoni tar-rappreżentattività spazjali tal-punti ta’ kampjunar; għad-dimostrazzjoni u t-tnaqqis ta’ qabżiet attribwibbli lil sorsi naturali; għad-determinazzjoni tal-kontribuzzjonijiet mir-risospensjoni ta’ partikoli wara t-tixrid tar-ramel fix-xitwa jew tal-melħ fix-xitwa; għar-rekwiżiti għall-projezzjonijiet imwettqa għall-finijiet ta’ posponiment tal-iskadenzi għall-kisba u dwar l-informazzjoni li għandha tiġi inkluża fir-rapporti ta’ implimentazzjoni; u għar-rekwiżiti għat-trażmissjoni tal-informazzjoni u r-rapportar dwar il-kwalità tal-arja fir-rigward ta’ (i) l-istabbiliment ta’ regoli relatati mal-informazzjoni dwar il-kwalità tal-arja ambjentali li l-Istati Membri għandhom jagħmlu disponibbli lill-Kummissjoni kif ukoll l-iskedi ta’ żmien li fihom dik l-informazzjoni għandha tiġi kkomunikata u (ii) is-simplifikazzjoni tal-mod kif id-data tiġi rrappurtata u l-iskambju reċiproku ta’ informazzjoni u data minn networks u punti individwali ta’ kampjunar li jkejlu t-tniġġis tal-arja ambjentali fl-Istati Membri. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (17).

(51)

Sabiex jiġi żgurat li din id-Direttiva tkompli tilħaq l-għanijiet tagħha, b’mod partikolari biex jiġu evitati, ipprevenuti u mnaqqsa l-effetti ta’ ħsara mill-kwalità tal-arja ambjentali fuq is-saħħa tal-bniedem u l-ambjent, is-setgħa li jiġu adottati atti f’konformità mal-Artikolu 290 tat-TFUE jenħtieġ li tiġi ddelegata lill-Kummissjoni fir-rigward tal-emendar tal-Annessi III sa VII, IX u X ta’ din id-Direttiva biex jitqiesu l-iżviluppi tekniċi u xjentifiċi fir-rigward tal-valutazzjoni tal-kwalità tal-arja ambjentali, tal-miżuri li jenħtieġ li jitqiesu biex jiġu inklużi fil-pjanijiet ta’ azzjoni għal żmien qasir u l-informazzjoni lill-pubbliku. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, inkluż fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (18). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(52)

Jenħtieġ li l-obbligu li din id-Direttiva tiġi trasposta fil-liġi nazzjonali jkun limitat għal dawk id-dispożizzjonijiet li jirrappreżentaw emenda sostantiva meta mqabbel mad-Direttivi ta’ qabel. L-obbligu li jiġu trasposti d-dispożizzjonijiet li mhumiex mibdula joħroġ mid-Direttivi ta’ qabel.

(53)

Jenħtieġ li din id-Direttiva tkun mingħajr preġudizzju għall-obbligi tal-Istati Membri marbuta mal-limiti ta’ żmien għat-traspożizzjoni fil-liġi nazzjonali tad Direttivi stipulati fil-Parti B tal-Anness XI ta’ din id-Direttiva.

(54)

Minħabba li l-għan ta’ din id-Direttiva, jiġifieri li jiġu stabbiliti dispożizzjonijiet dwar il-kwalità tal-arja bl-għan li jinkiseb għan ta’ tniġġis żero, sabiex il-kwalità tal-arja fl-Unjoni tittejjeb progressivament għal livelli li ma jibqgħux jitqiesu ta’ ħsara għas-saħħa tal-bniedem, għall-ekosistemi naturali jew għall-bijodiversità, ma jistax jinkiseb b’mod suffiċjenti mill-Istati Membri minħabba n-natura transfruntiera tas-sustanzi li jniġġsu l-arja, iżda jista’ pjuttost, minħabba l-iskala u l-effetti tiegħu, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità kif stabbilit f’dak l-Artikolu, din id-Direttiva ma tmurx lil hinn minn dak li huwa meħtieġ sabiex jinkiseb dak l-għanijiet,