REGOLAMENT (UE) 2024/3005 TAL-PARLAMENT EWROPEW U TAL-KUNSILL tas-27 ta’ Novembru 2024 dwar it-trasparenza u l-integrità tal-attivitajiet ta’ klassifikazzjoni Ambjentali, Soċjali u ta’ Governanza (ESG), u li jemenda r-Regolamenti (UE) 2019/2088 u (UE) 2023/2859 (Test b’rilevanza għaż-ŻEE)

(1)

Fil-25 ta’ Settembru 2015, l-Assemblea Ġenerali tan-NU adottat qafas globali ġdid għall-iżvilupp sostenibbli, l-Aġenda 2030 għall-Iżvilupp Sostenibbli (l-“Aġenda 2030”), li għandha fil-qalba tagħha l-Għanijiet ta’ Żvilupp Sostenibbli (SDGs). Il-Komunikazzjoni tal-Kummissjoni tat-22 ta’ Novembru 2016 intitolata “Il-passi li jmiss għal ġejjieni Ewropew sostenibbli: Azzjoni Ewropea għas-sostenibbiltà” torbot l-SDGs mal-qafas ta’ politika tal-Unjoni biex jiġi żgurat li l-azzjonijiet u l-inizjattivi ta’ politika kollha tal-Unjoni, kemm fl-Unjoni kif ukoll globalment, jikkunsidraw l-SDGs mill-bidu nett. Il-konklużjonijiet tal-Kunsill Ewropew tat-22 u t-23 ta’ Ġunju 2017 ikkonfermaw l-impenn tal-Unjoni u tal-Istati Membri għall-implimentazzjoni tal-Aġenda 2030 b’mod sħiħ, koerenti, komprensiv, integrat u effettiv u f’kooperazzjoni mill-qrib mas-sħab u ma’ partijiet ikkonċernati oħrajn. Barra minn hekk, il-Prinċipji għall-Investiment Responsabbli appoġjati min-NU għandhom, saż-żmien tal-adozzjoni ta’ dan ir-Regolament, aktar minn 5 300 firmatarju li jirrappreżentaw aktar minn EUR 120 triljun ta’ assi mmaniġġati. Fil-11 ta’ Diċembru 2019, il-Kummissjoni ppubblikat il-komunikazzjoni tagħha intitolata “Il-Patt Ekoloġiku Ewropew” (il-“Patt Ekoloġiku Ewropew”). Fit-30 ta’ Ġunju 2021, il-Liġi Ewropea dwar il-Klima ġiet adottata bħala Regolament (UE) 2021/1119 tal-Parlament Ewropew u tal-Kunsill (3), li jnaqqax fid-dritt tal-Unjoni l-għan stabbilit fil-Patt Ekoloġiku Ewropew li l-ekonomija u s-soċjetà tal-Unjoni jsiru newtrali għall-klima sal-2050.

(2)

It-tranżizzjoni lejn ekonomija sostenibbli hija kruċjali biex jiġu żgurati l-kompetittività u s-sostenibbiltà fit-tul tal-ekonomija tal-Unjoni u l-kwalità tal-ħajja taċ-ċittadini fl-Unjoni, u biex it-tisħin globali jinżamm sew taħt il-limitu ta’ 1,5 grad Celsius. Is-sostenibbiltà ilha għal żmien twil fil-qalba tal-politiki tal-Unjoni u kemm it-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea (TFUE) jirrikonoxxu d-dimensjonijiet soċjali u ambjentali tagħha.

(3)

L-ilħuq tal-objettivi tal-SDGs fl-Unjoni jirrikjedi d-direzzjonar tal-flussi tal-kapital lejn investimenti sostenibbli. Huwa neċessarju li jiġi sfruttat bis-sħiħ il-potenzjal tas-suq intern għall-ilħuq ta’ dawk l-objettivi. F’dak il-kuntest, huwa kruċjali li jitneħħew l-ostakli għall-moviment effiċjenti tal-kapital lejn investimenti sostenibbli fis-suq intern, li jiġi evitat li jitfaċċaw ostakli bħal dawn, u li jiġu stabbiliti regoli u standards biex, minn naħa waħda, jiġu promossi finanzi sostenibbli u, min-naħa l-oħra, jiġu diżinċentivati investimenti li jista’ jkollhom impatt negattiv fuq l-ilħuq tal-objettivi tal-SDGs.

(4)

L-approċċ tal-Unjoni għal tkabbir sostenibbli u inklużiv huwa ankrat fl-20 prinċipju tal-Pilastru Ewropew tad-Drittijiet Soċjali, kif stabbilit fil-Komunikazzjoni tal-Kummissjoni tas-26 ta’ April 2017 intitolata “It-Twaqqif ta’ Pilastru Ewropew tad-Drittijiet Soċjali”, li għandu l-għan li tiġi żgurata tranżizzjoni ġusta lejn tali tkabbir u biex jiġu żgurati politiki li ma jħallu lil ħadd jibqa’ lura. Barra minn hekk, l-acquis soċjali tal-Unjoni, li jinkludi l-Istrateġiji tal-Unjoni tal-Ugwaljanza, jipprovdi standards fl-oqsma tal-liġi tax-xogħol, l-ugwaljanza, l-aċċessibbiltà, is-saħħa u s-sikurezza fuq il-post tax-xogħol, u l-ġlieda kontra d-diskriminazzjoni.

(5)

Is-swieq finanzjarji jiżvolġu rwol kruċjali fid-direzzjonar tal-kapital lejn investimenti li huma meħtieġa għall-ilħuq tal-objettivi klimatiċi u ambjentali tal-Unjoni. Fil-komunikazzjoni tagħha tat-8 ta’ Marzu 2018, il-Kummissjoni ppubblikat il-Pjan ta’ Azzjoni tagħha dwar il-Finanzjament tat-Tkabbir Sostenibbli, li jniedi l-istrateġija tagħha dwar il-finanzi sostenibbli. L-objettivi ta’ dak il-Pjan ta’ Azzjoni huma li l-fatturi ta’ sostenibbiltà jiġu integrati fl-immaniġġar tar-riskju u li l-flussi tal-kapital jiġu orjentati mill-ġdid lejn investiment sostenibbli sabiex jinkiseb tkabbir sostenibbli u inklużiv.

(6)

Bħala parti miill-Pjan ta’ Azzjoni dwar il-Finanzjament tat-Tkabbir Sostenibbli, fl-2021, il-Kummissjoni kkummissjonat studju intitolat “Studju dwar il-Klassifikazzjonijiet, id-Data u r-Riċerka Relatati mas-Sostenibbiltà” biex tqis l-iżviluppi fis-suq tal-prodotti u tas-servizzi relatati mas-sostenibbiltà, tidentifika l-parteċipanti ewlenin fis-suq u tenfasizza n-nuqqasijiet potenzjali. Dak l-istudju pprovda inventarju u klassifikazzjoni tal-atturi tas-suq, il-prodotti u s-servizzi ta’ sostenibbiltà disponibbli fis-suq u analiżi tal-użu u tal-kwalità perċepita tal-prodotti u s-servizzi relatati mas-sostenibbiltà mill-parteċipanti fis-suq. L-istudju enfasizza l-eżistenza ta’ kunflitti ta’ interess, in-nuqqas ta’ trasparenza u akkuratezza tal-metodoloġiji tal-klassifikazzjonijiet ambjentali, soċjali u ta’ governanza (ESG) u n-nuqqas ta’ ċarezza fuq it-terminoloġija u l-operazzjonijiet tal-fornituri ta’ klassifikazzjonijiet ESG.

(7)

Fil-qafas tal-Patt Ekoloġiku Ewropew, il-Kummissjoni ressqet strateġija ta’ finanzjament sostenibbli aġġornata, li ġiet adottata fil-komunikazzjoni tagħha tas-6 ta’ Lulju 2021 intitolata “Strateġija għall-Finanzjament tat-Tranżizzjoni għal Ekonomija Sostenibbli”.

(8)

Bħala segwitu, il-Kummissjoni ħabbret f’dik l-istrateġija konsultazzjoni pubblika dwar il-klassifikazzjonijiet ESG biex tikkontribwixxi għal valutazzjoni tal-impatt. Fil-konsultazzjoni pubblika li saret fl-2022, il-partijiet ikkonċernati kkonfermaw tħassib dwar in-nuqqas ta’ trasparenza tal-metodoloġiji u l-objettivi tal-klassifikazzjonijiet ESG u ċarezza fuq l-attivitajiet ta’ klassifikazzjoni ESG. Peress li l-fiduċja hija kruċjali għall-funzjonament tas-swieq finanzjarji, tali nuqqas ta’ trasparenza u affidabbiltà tal-klassifikazzjonijiet ESG jenħtieġ li jiġi indirizzat b’mod urġenti.

(9)

Fil-livell internazzjonali, l-Organizzazzjoni Internazzjonali tal-Kummissjonijiet tat-Titoli (IOSCO) ħarġet rapport f’Novembru 2021 li fih sett ta’ rakkomandazzjonijiet dwar il-fornituri ta’ klassifikazzjonijiet u ta’ prodott tad-data. Il-Kummissjoni u l-Awtorità Superviżorja Ewropea (Awtorità Ewropea tat-Titoli u s-Swieq) (ESMA) stabbilita bir-Regolament (UE) Nru 1095/2010 tal-Parlament Ewropew u tal-Kunsill (4) jenħtieġ li jikkunsidraw l-applikazzjoni ta’ dawk ir-rakkomandazzjonijiet tal-IOSCO meta jivvalutaw il-konformità ta’ ġuriżdizzjoni ta’ pajjiż terz jew ta’ fornitur ta’ klassifikazzjonijiet ESG mar-rekwiżiti ta’ dan ir-Regolament għall-fini ta’ ekwivalenza, approvazzjoni jew rikonoxximent.

(10)

Il-klassifikazzjonijiet ESG għandhom rwol importanti fis-swieq kapitali globali, minħabba li l-investituri, il-mutwatarji u l-emittenti qed jużaw dejjem aktar il-klassifikazzjonijiet ESG bħala parti mill-proċess ta’ teħid ta’ deċiżjonijiet infurmati relatati ma’ investiment u finanzjament sostenibbli. L-istituzzjonijiet ta’ kreditu, id-ditti tal-investiment, l-impriżi tal-assigurazzjoni, l-impriżi tal-assigurazzjoni fuq il-ħajja u l-impriżi tar-riassigurazzjoni, fost l-oħrajn, ta’ spiss jużaw il-klassifikazzjonijiet ESG bħala referenza għall-prestazzjoni tas-sostenibbiltà jew għar-riskji u l-opportunitajiet tas-sostenibbiltà fl-attività tal-investiment tagħhom. Konsegwentement, il-klassifikazzjonijiet ESG għandhom impatt sinifikanti fuq l-operazzjoni tas-swieq u fuq il-fiduċja u l-kunfidenza tal-investituri u l-konsumaturi. Sabiex jiġi żgurat li l-klassifikazzjonijiet ESG użati fl-Unjoni jkunu indipendenti, komparabbli meta dan ikun possibbli, imparzjali, sistematiċi u ta’ kwalità adegwata, huwa importanti li l-attivitajiet ta’ klassifikazzjoni ESG jitwettqu f’konformità mal-prinċipji ta’ integrità, trasparenza, responsabbiltà u governanza tajba, filwaqt li jikkontribwixxu għall-aġenda tal-Unjoni dwar il-finanzi sostenibbli. Komparabbiltà aħjar u affidabbiltà akbar tal-klassifikazzjonijiet ESG itejbu l-effiċjenza ta’ dak is-suq li qed jikber malajr, u b’hekk jiffaċilitaw il-progress lejn l-objettivi tal-Patt Ekoloġiku Ewropew.

(11)

Il-klassifikazzjonijiet ESG għandhom rwol abilitanti għall-funzjonament xieraq tas-suq tal-finanzi sostenibbli tal-Unjoni billi jipprovdu lill-investituri u istituzzjonijiet finanzjarji b’informazzjoni importanti għall-istrateġiji ta’ investiment, l-immaniġġar tar-riskju u l-obbligi ta’ divulgazzjoni tagħhom. Għalhekk, huwa meħtieġ li jiġi żgurat li l-klassifikazzjonijiet ESG jipprovdu informazzjoni materjali utli għad-deċiżjonijiet lill-utenti tal-klassifikazzjonijiet ESG, u li l-utenti tal-klassifikazzjonijiet ESG jifhmu aħjar l-objettivi li jfittxu li jilħqu l-klassifikazzjonijiet ESG u l-kwistjonijiet u metriċi speċifiċi mkejla minn tali klassifikazzjonijiet.

(12)

Huwa meħtieġ li jiġu rikonoxxuti d-diversi mudelli tan-negozju tas-suq tal-klassifikazzjonijiet ESG. L-ewwel mudell tan-negozju huwa l-mudell ta’ ħlas mill-utent, fejn l-utenti tal-klassifikazzjonijiet ESG huma prinċipalment investituri li jixtru klassifikazzjonijiet ESG bil-għan li jagħmlu deċiżjonijiet ta’ investiment. It-tieni mudell tan-negozju huwa l-mudell imħallas mill-emittent, fejn l-impriżi jixtru klassifikazzjonijiet ESG bil-għan li jivvalutaw ir-riskji u l-opportunitajiet fi ħdan l-operazzjonijiet tagħhom. Sabiex tiġi żgurata affidabbiltà akbar tal-klassifikazzjonijiet ESG ipprovduti fl-Unjoni, jenħtieġ li l-elementi kklassifikati jew, fil-każ ta’ strument finanzjarju jew prodott finanzjarju, l-emittenti ta’ elementi kklassifikati jkollhom il-possibbiltà li jivverifikaw id-data użata minn fornitur ta’ klassifikazzjonijiet ESG u li jiġi enfasizzat kwalunkwe żball fattwali fis-sett tad-data użat li jista’ potenzjalment ikollu impatt fuq il-kwalità tal-klassifikazzjonijiet futuri. Għal dak il-fini, element ikklassifikat jew emittent ta’ element ikklassifikat jenħtieġ li jkun jista’, fuq talba, jaċċessa s-sett ta’ data użat biex tinħareġ il-klassifikazzjoni ESG. Il-possibbiltà li jiġi vverifikat dak is-sett tad-data jeħtieġ li tkun għodda purament għall-verifika tal-fatti, u l-element ikklassifikat jew l-emittenti ta’ elementi ikklassifikati jenħtieġ li fl-ebda ċirkostanza ma jkunu jistgħu jinfluwenzaw bi kwalunkwe mod il-metodoloġiji tal-klassifikazzjoni jew l-eżitu tal-klassifikazzjoni. Ir-rekwiżit għal fornitur ta’ klassifikazzjoni ESG li jinnotifika lill-element klassifikat qabel il-ħruġ tal-klassifikazzjoni ESG jenħtieġ li tapplika biss qabel l-ewwel ħruġ tal-klassifikazzjoni u mhux għal kwalunkwe aġġornament sussegwenti. Dak ir-rekwiżit iservi ta’ mezz biex l-element klassifikat jew l-emittent ta’ element klassifikat jiġi informat li huwa se jiġi klassifikat minn fornitur tal-klassifikazzjonijiet ESG.

(13)

L-Istati Membri la jirregolaw u lanqas jissorveljaw l-attivitajiet tal-fornituri ta’ klassifikazzjonijiet ESG jew il-kundizzjonijiet għall-forniment ta’ klassifikazzjonijiet ESG. Minħabba d-diverġenzi eżistenti, in-nuqqas ta’ trasparenza u n-nuqqas ta’ regoli komuni, huwa probabbli li l-Istati Membri jadottaw miżuri u approċċi diverġenti li jfixklu l-allinjament mal-objettivi tal-SDGs u l-Patt Ekoloġiku Ewropew. Dawk il-miżuri u approċċi diverġenti jkollhom impatt negattiv dirett fuq il-funzjonament xieraq tas-suq intern u joħolqu ostakli għalih, u jkunu ta’ detriment għas-suq tal-klassifikazzjonijiet ESG. Il-fornituri ta’ klassifikazzjonijiet ESG li joħorġu klassifikazzjonijiet ESG għall-użu ta’ istituzzjonijiet u impriżi finanzjarji fl-Unjoni jkunu soġġetti għal regoli differenti fi Stati Membri differenti. Standards u prattiki tas-suq diverġenti jagħmluha diffiċli li jkun hemm ċarezza fuq il-kostruzzjoni tal-klassifikazzjonijiet ESG u jippermettu t-tqabbil tagħhom, biex b’hekk jinħolqu kundizzjonijiet tas-suq mhux uniformi għall-utenti tal-klassifikazzjonijiet ESG. Dan jikkawża ostakli addizzjonali fis-suq intern, u jirriskja li jfixkel d-deċiżjonijiet ta’ investiment.

(14)

Dan ir-Regolament jikkomplementa l-atti legali eżistenti tal-Unjoni -fil-qasam tal-finanzi sostenibbli u għandu l-għan lijiffaċilita il-flussi ta’ informazzjoni sabiex jiffaċilita d-deċiżjonijiet ta’ investiment.

(15)

Sabiex jiġi definit b’mod adegwat il-kamp ta’ applikazzjoni territorjali, dan ir-Regolament jenħtieġ li jkun ibbażat fuq il-kunċett ta’ “operazzjoni fl-Unjoni”, filwaqt li ssir distinzjoni bejn, minn naħa waħda, il-każijiet meta l-fornituri ta’ klassifikazzjonijiet ESG ikunu stabbiliti fl-Unjoni jew, min-naħa l-oħra, il-każijiet meta l-fornituri ta’ klassifikazzjonijiet ESG ikunu stabbiliti barra l-Unjoni. Fl-ewwel każ, jenħtieġ li l-fornituri ta’ klassifikazzjoniet ESG stabbiliti fl-Unjoni jitqiesu li joperaw fl-Unjoni meta joħorġu u jippubblikaw il-klassifikazzjonijiet ESG tagħhom fuq is-sit web tagħhom jew b’mezzi oħra, jew meta joħorġu u jiddistribwixxu l-klassifikazzjonijiet ESG tagħhom b’sottoskrizzjoni jew relazzjonijiet kuntrattwali oħra lil impriżi finanzjarji regolati fl-Unjoni, lil impriżi fil-kamp ta’ applikazzjoni tad-Direttiva 2013/34/UE tal-Parlament Ewropew u tal-Kunsill (5), lil impriżi fil-kamp ta’ applikazzjoni tad-Direttiva 2004/109/KE tal-Parlament Ewropew u tal-Kunsill (6), b’mod partikolari fir-rigward ta’ emittenti ta’ pajjiżi terzi li t-titoli tagħhom huma ammessi għall-kummerċ fi swieq regolati tal-Unjoni, jew lill-istituzzjoniet, korpi, uffiċċji u aġenziji tal-Unjoni jew awtoritajiet pubbliċi tal-Istati Membri. Fit-tieni każ, il-fornituri ta’ klassifikazzjoniet ESG stabbiliti barra mill-Unjoni jenħtieġ li jitqiesu li joperaw fl-Unjoni biss meta joħorġu u jiddistribwixxu l-klassifikazzjonijiet ESG tagħhom b’sottoskrizzjoni jew relazzjonijiet kuntrattwali oħra lill-istess entitajiet bħal fornituri ta’ klassifikazzjonijiet ESG stabbiliti fl-Unjoni.

(16)

Dan ir-Regolament huwa mfassal biex jirregola l-ħruġ, id-distribuzzjoni u, meta dan ikun rilevanti, il-pubblikazzjoni tal-klassifikazzjonijiet ESG, mingħajr ma jkun intenzjonat li jirregola l-użu tagħhom. Minħabba li l-kamp ta’ applikazzjoni territorjali ta’ dan ir-Regolament huwa marbut mal-kunċett ta’ “operazzjoni fl-Unjoni”, jenħtieġ li l-utenti ta’ klassifikazzjonijiet ESG jinvolvu ruħhom mal-fornituri ta’ klassifikazzjonijiet ESG li jkunu awtorizzati jew irreġistrati skont dan ir-Regolament. Madankollu, f’każijiet limitati, utent tal-klassifikazzjonijiet ESG fl-Unjoni jenħtieġ li jkun jista’ jinvolvi ruħu ma’ fornitur ta’ klassifikazzjonijiet ESG stabbilit barra mill-Unjoni u mhux awtorizzat jew rikonoxxut skont dan ir-Regolament. Tali każijiet jenħtieġ li jaderixxu strettament ma’ kundizzjonijiet speċifiċi biex jiġi evitat kwalunkwe riskju ta’ ċirkomvenzjoni tar-rekwiżiti ta’ dan ir-Regolament.

(17)

Biex tiġi definita b’mod adegwat il-firxa ta’ prodotti li għalihom japplika dan ir-Regolament, id-definizzjoni ta’ klassifikazzjoni ESG jenħtieġ li tiġi limitata għal opinjonijiet jew, punteġġi, jew kumbinazzjoni tat-tnejn, li jkunu bbażati kemm fuq metodoloġija stabbilita kif ukoll fuq sistema ta’ klassifikazzjoni definita bħal kategoriji tal-klassifikazzjonijiet. Pereżempju, l-assenjazzjoni ta’ element għal kategorija jew skala li tkun pożittiva jew negattiva, abbażi ta’ metodoloġija stabbilita fir-rigward tad-drittijiet ambjentali, soċjali u tal-bniedem, jew tal-fatturi ta’ governanza jew fir-rigward tal-esponiment għar-riskji, jenħtieġ li titqies sistema ta’ klassifikazzjoni għal fini ta’ dan ir-Regolament.

(18)

Jenħtieġ li dan ir-Regolament ma japplikax għall-pubblikazzjoni jew id-distribuzzjoni ta’ data dwar id-drittijiet ambjentali, soċjali u tal-bniedem, u l-fatturi ta’ governanza li ma tirriżultax fl-iżvilupp ta’ klassifikazzjoni ESG. Barra minn hekk, jenħtieġ li dan ir-Regolament ma jkunx applikabbli għal prodotti jew servizzi li jinkorporaw element ta’ klassifikazzjoni ESG, inkluża r-riċerka dwar l-investiment kif stabbilit fid-Direttiva 2014/65/UE tal-Parlament Ewropew u tal-Kunsill (7). Ir-rieżamijiet esterni tal-Bonds Ekoloġiċi Ewropej kif previsti fir-Regolament (UE) 2023/2631 tal-Parlament Ewropew u tal-Kunsill (8), u r-rieżamijiet esterni u l-opinjonijiet ta’ tieni parti dwar bonds ikkummerċjalizzati bħala ambjentalment sostenibbli, bonds marbuta mas-sostenibbiltà, u bonds, self u tipi oħra ta’ strumenti ta’ dejn ikkummerċjalizzati bħala sostenibbli, jenħtieġ li jkunu wkoll jaqgħu barra mill-kamp ta’ applikazzjoni ta’ dan ir-Regolament sal-punt li tali rieżamijiet esterni u opinjonijiet ta’ tieni parti ma jkunx fihom klassifikazzjonijiet ESG maħruġa mir-rieżaminatur estern jew mill-fornitur tal-opinjoni ta’ tieni parti. Ir-rieżamijiet esterni jinkludu rieżamijiet ta’ divulgazzjoni ta’ qabel il-ħruġ, bħal skedi informattivi tal-Bonds Ekoloġiċi Ewropej jewoqfsa ta’ bonds ikkumerċjalizzati bħala sostenibbli, kif ukoll rieżamijiet ta’ divulgazzjoni ta’ wara l-ħruġ, bħal rapporti ta’ allokazzjoni annwali tal-Bonds Ekoloġiċi Ewropej, rapporti tal-impatt tal-Bonds Ekoloġiċi Ewropej u rapporti dwar bonds ikkumerċjalizzati bħala sostenibbli. Barra minn hekk, dan ir-Regolament jenħtieġ li ma japplikax għal klassifikazzjonijiet żviluppati esklużivament għall-proċessi ta’ akkreditazzjoni jew ċertifikazzjoni, peress li tali klassifikazzjonijiet mhumiex immirati lejn l-analiżi tal-investimenti, l-analiżi finanzjarja, it-teħid tad-deċiżjonijiet dwar l-investimenti jew it-teħid tad-deċiżjonijiet finanzjarji. Fl-aħħar nett, dan ir-Regolamentjenħtieġ li ma jkunx japplika għall-attivitajiet ta’ tikkettar ESG dment lit-tikkettar mogħti lil entitajiet, strumenti finanzjarji jew prodotti ma jinvolvux id-divulgazzjoni ta’ klassifikazzjoni ESG.

(19)

Barra minn hekk, jenħtieġ li dan ir-Regolament ma japplikax għal klassifikazzjonijiet maħruġa minn membri tas-Sistema Ewropea ta’ Banek Ċentrali (SEBĊ) meta dawn il-klassifikazzjonijiet ma jkunux ippubblikati jew imqassma għal skopijiet kummerċjali. Din il-limitazzjoni fil-kamp ta’ applikazzjoni hija sabiex jiġi żgurat li dan ir-Regolament ma jkollux impatt mhux intenzjonat fuq miżuri tas-SEBĊ li jkunu intiżi biex iqisu kunsiderazzjonijiet klimatiċi, jew kunsiderazzjonijiet ambjentali, soċjali u ta’ governanza oħra fil-qafas tal-kollateral tal-politika monetarja tas-SEBĊ meta l-SEBĊ issegwi l-objettiv primarju tagħha li żżomm l-istabbiltà tal-prezzijiet u, mingħajr preġudizzju għal dak l-objettiv, tappoġġa l-politiki ekonomiċi ġenerali fl-Unjoni.

(20)

Meta impriża jew istituzzjoni finanzjarja tiddivulga informazzjoni dwar l-impatti, ir-riskji u l-opportunitajiet għas-sostenibbiltà tagħha stess, jew dawk tal-katina tal-valur tagħha, jenħtieġ li tali informazzjoni ma titqiesx bħala klassifikazzjoni ESG skont dan ir-Regolament.

(21)

Jenħtieġ li dan ir-Regolament ma japplikax għal klassifikazzjonijiet ESG privati maħruġa fuq ordni individwali u pprovduti esklużivament lill-persuna li tkun għamlet l-ordni u li ma jkunux maħsuba għal divulgazzjoni jew għal distribuzzjoni pubblika b’sottoskrizzjoni jew b’mezzi oħrajn. Jenħtieġ li dan ir-Regolament lanqas ma japplika għal klassifikazzjonijiet ESG maħruġa minn impriżi finanzjarji regolati fl-Unjoni li jintużaw esklużivament għal finijiet interni jew għall-forniment ta’ servizzi jew prodotti finanzjarji interni jew intragrupp.

(22)

Sabiex ikomplu jissaħħu l-funzjonament tas-suq intern u l-livell ta’ protezzjoni tal-investituri, huwa importanti li tiġi żgurata trasparenza suffiċjenti u konsistenti tal-klassifikazzjonijiet ESG maħruġa minn impriżi finanzjarji regolati fl-Unjoni u inkorporati fil-prodotti jew is-servizzi finanzjarji tagħhom meta tali klassifikazzjonijiet jiġu ddivulgati u għalhekk ikunu viżibbli għal partijiet terzi. L-investituri jenħtieġ li jirċievu informazzjoni adegwata dwar il-metodoloġiji sottostanti għall-klassifikazzjonijiet ESG, li jenħtieġ li jiġu ddivulgati fil-komunikazzjonijiet ta’ kummerċjalizzazzjoni. Għalhekk, jenħtieġ li dan ir-Regolament jikkomplementa wkoll l-obbligi ta’ divulgazzjoni relatati mal-komunikazzjonijiet ta’ kummerċjalizzazzjoni stabbiliti mir-Regolament (UE) 2019/2088 tal-Parlament Ewropew u tal-Kunsill (9). L-istess informazzjoni jenħtieġ li tkun meħtieġa wkoll minn kwalunkwe impriża finanzjarja regolata oħra fl-Unjoni li tiddivulga klassifikazzjoni ESG maħruġa minn impriża finanzjarja regolata għal parti terza bħala parti mill-komunikazzjonijiet ta’ kummerċjalizzazzjoni tagħha, barra meta tkun soġġetta għar-Regolament (UE) 2019/2088. Jenħtieġ li l-investituri jirċievu, permezz ta’ link għad-divulgazzjonijiet fuq is-sit web tal-impriża finanzjarja regolata fl-Unjoni, l-istess informazzjoni bħal dik meħtieġa minn fornitur ta’ klassifikazzjonijiet ESG skont il-punt 1 tal-Anness III ta’ dan ir-Regolament, filwaqt li jitqies il-kontenut ta’ kwalunkwe informazzjoni diġà ddivulgata mill-parteċipanti fis-swieq finanzjarji u mill-konsulenti finanzjarji skont ir-Regolament (UE) 2019/2088. Impriżi finanzjarji regolati oħra fl-Unjoni jenħtieġ li jiddivulgaw l-istess informazzjoni, filwaqt li jqisu d-diversi tipi ta’ prodotti finanzjarji, il-karatteristiċi tagħhom u d-differenzi bejniethom kif ukoll il-ħtieġa li tiġi evitata kwalunkwe duplikazzjoni ta’ informazzjoni diġà ppubblikata skont rekwiżiti regolatorji applikabbli oħra. B’mod ġenerali, kwalunkwe duplikazzjoni tar-rekwiżiti ta’ divulgazzjoni applikabbli jenħtieġ li tiġi evitata. B’dak l-istess objettiv, jenħtieġ li l-impriżi finanzjarji regolati fl-Unjoni li joħorġu klassifikazzjonijiet ESG u jinkorporaw dawk il-klassifikazzjonijiet fil-prodotti jew servizzi finanzjarji li joffru lil partijiet terzi jiġu esklużi mill-kamp ta’ applikazzjoni ta’ dan ir-Regolament.

(23)

L-organizzazzjonijiet mingħajr skop ta’ qligħ li joħorġu klassifikazzjonijiet ESG għal finijiet mhux kummerċjali u li jippubblikaw dawk il-klassifikazzjonijiet mingħajr ħlas, jenħtieġ li ma jitqisux li jaqgħu fil-kamp ta’ applikazzjoni ta’ dan ir-Regolament. Madankollu, jenħtieġ li jagħmlu ħilithom biex jintegraw ir-rekwiżiti ta’ trasparenza stabbiliti f’dan ir-Regolament meta dan ikun applikabbli. Meta l-organizzazzjonijiet mingħajr skop ta’ qligħ jimponu tariffi fuq l-elementi kklassifikati jew l-emittenti ta’ elementi klassifikati biex jirrapportaw data jew biex jassenjawlhom klassifikazzjoni permezz tal-pjattaforma tagħhom, jew meta jimponu tariffi fuq l-utenti tal-klassifikazzjonijiet ESG biex jaċċessaw kwalunkwe informazzjoni dwar il-klassifikazzjonijiet ESG, jenħtieġ li dawn ikunu soġġetti għar-rekwiżiti stabbiliti f’dan ir-Regolament.

(24)

Il-persuni fiżiċi inklużi l-akkademiċi u l-ġurnalisti li jippubblikaw u jiddistribwixxu klassifikazzjonijiet ESG għal finijiet mhux kummerċjali jenħtieġ li ma jaqgħux fil-kamp ta’ applikazzjoni ta’ dan ir-Regolament.

(25)

Biex jiġi vvalutat il-profil ESG tal-kumpaniji, u bħala parti mill-proċessi ta’ teħid ta’ deċiżjonijiet tagħhom dwar il-finanzjament u l-investiment sostenibbli, l-istituzzjonijiet ta’ kreditu, id-ditti tal-investiment, l-impriżi tal-assigurazzjoni u l-impriżi tar-riassigurazzjoni, fost l-oħrajn, jiddependu kemm fuq klassifikazzjonijiet ESG esterni kif ukoll fuq prodotti tad-data ESG esterni. L-istituzzjonijiet finanzjarji jenħtieġ li jkunu responsabbli fil-każ ta’ akkużi ta’ greenwashing relatati mal-prodotti finanzjarji tagħhom, filwaqt li d-distribuzzjoni unika ta’ informazzjoni ESG dwar entitajiet jew prodotti finanzjarji, ibbażata fuq metodoloġija proprjetarja jew stabbilita, li tinkludi, fost l-oħrajn, settijiet ta’ data dwar l-emissjonijiet u data dwar il-kontroversji ESG, jenħtieġ li ma tkunx koperta minn dan ir-Regolament. Jenħtieġ li l-Kummissjoni twettaq rieżami ta’ dan ir-Regolament biex tivvaluta jekk il-kamp ta’ applikazzjoni identifikat huwiex biżżejjed biex jiżgura l-fiduċja tal-investituri u l-konsumaturi fil-prestazzjoni tas-sostenibbiltà ta’ prodotti u servizzi finanzjarji. Il-Kumissjoni jenħtieġ li tipprevedi, meta jkun meħtieġ, t-twessigħ tas-sett ta’ prodotti tad-data ESG u l-fornituri ta’ prodott tad-data ESG koperti b’dan ir-Regolament.

(26)

Huwa importanti li jiġu stabbiliti regoli li jiżguraw li l-klassifikazzjonijiet ESG ipprovduti mill-fornituri ta’ klassifikazzjonijiet ESG awtorizzati fl-Unjoni jkunu ta’ kwalità adegwata, ikunu soġġetti għal rekwiżiti xierqa li jirrikonoxxu l-eżistenza ta’ mudelli ta’ negozju differenti, u jiżguraw l-integrità tas-suq. Dawk ir-regoli jkunu japplikaw għall-klassifikazzjonijiet ESG ġenerali li jkopru fatturi ambjentali, soċjali u ta’ governanza, u għal klassifikazzjonijiet li jħarsu biss lejn fattur ambjentali, soċjali jew ta’ governanza uniku jew subkomponent ta’ tali fattur. Jenħtieġ li jiġu pprovduti klassifikazzjonijiet ambjentali (E), soċjali (S) u ta’ governanza (G) separati minflok klassifikazzjoni ESG unika li taggrega l-fatturi E, S u G. Jekk il-fornituri ta’ klassifikazzjoni ESG jiddeċiedu li jipprovdu klassifikazzjonijiet aggregati, jenħtieġ li jiddivulgaw ir-rata u l-ponderazzjoni mogħtija lil kull kategorija E, S u G u jippreżentaw dik l-informazzjoni b’mod li jiżgura li kull waħda minn dawk il-kategorijitkun tista’ titqabbel mal-oħrajn.

(27)

Minħabba l-użu tal-klassifikazzjonijiet ESG minn fornituri stabbiliti barra mill-Unjoni, u sabiex jiġu żgurati l-integrità tas-suq, il-protezzjoni tal-investituri u l-infurzar xieraq ta’ dan ir-Regolament, huwa meħtieġ li jiġu introdotti rekwiżiti bbażati fuq liema fornituri ta’ klassifikazzjonijiet ESG stabbiliti barra mill-Unjoni jistgħu joffru s-servizzi tagħhom fl-Unjoni. Għalhekk, qed jiġu proposti tliet reġimi possibbli għal dawk il-fornituri ta’ klassifikazzjonijiet ESG stabbiliti barra mill-Unjoni: ekwivalenza, approvazzjoni u rikonoxximent. Bħala regola, jenħtieġ li s-superviżjoni u r-regolamentazzjoni f’pajjiż terz ikunu ekwivalenti għas-superviżjoni u r-regolamentazzjoni tal-Unjoni tal-klassifikazzjonijiet ESG. Għalhekk, il-klassifikazzjonijiet ESG ipprovduti minn fornitur ta’ klassifikazzjonijiet ESG stabbilit barra l-Unjoni u awtorizzat jew irreġistrat hekk f’pajjiż terz, jenħtieġ li jiġu offruti biss fl-Unjoni meta tkun ittieħdet deċiżjoni pożittiva mill-Kummissjoni dwar l-ekwivalenza tar-reġim tal-pajjiż terz. Madankollu, sabiex jiġi evitat kwalunkwe impatt negattiv li jirriżulta minn waqfien f’daqqa possibbli tal-offerta fl-Unjoni tal-klassifikazzjonijiet ESG ipprovduti minn fornitur ta’ klassifikazzjonijiet ESG stabbilit barra mill-Unjoni, huwa meħtieġ li jiġu previsti ċerti reġimi oħrajn, jiġifieri dak tal-approvazzjoni u r-rikonoxximent. Kwalunkwe fornitur ta’ klassifikazzjonijiet ESG bi struttura ta’ grupp jenħtieġ li jkun jista’ juża r-reġim ta’ approvazzjoni għall-klassifikazzjonijiet ESG żviluppati barra mill-Unjoni. Biex jagħmel dan, jenħtieġ li jistabbilixxi, fi ħdan l-istruttura tal-grupp, fornitur ta’ klassifikazzjonijiet ESG awtorizzat fl-Unjoni. Dak il-fornitur ta’ klassifikazzjonijiet ESG awtorizzat jenħtieġ li jiżgura li l-ħruġ u d-distribuzzjoni ta’ klassifikazzjonijiet ESG jissodisfaw rekwiżiti li mill-inqas ikunu stretti daqs ir-rekwiżiti ta’ dan ir-Regolament. Barra minn hekk, il-fornitur ta’ klassifikazzjonijiet ESG stabbilit fl-Unjoni jenħtieġ li jkollu l-għarfien espert meħtieġ biex jimmonitorja effetivament il-ħruġ u d-distribuzzjoni tal-klassifikazzjonijiet ESG pprovduti mill-fornitur ta’ klassifikazzjonijiet ESG stabbilit barra mill-Unjoni u jenħtieġ li jkun hemm raġuni oġġettiva għaliex il-klassifikazzjonijiet approvati jinħarġu minn fornitur stabbilit barra mill-Unjoni. Ir-rekwiżit li tintwera l-konformità ma’ dan ir-Regolament jenħtieġ li ma jiġix ippruvat għal kull klassifikazzjoni ESG individwali approvata iżda pjuttost għall-metodoloġiji u l-proċeduri ġenerali implimentati mill-fornitur ta’ klassifikazzjonijiet ESG. Min-naħa tagħhom, fornituri iżgħar ta’ klassifikazzjonijiet ESG li huma kkategorizzati bħala impriżi żgħar jew gruppi żgħar skont il-kriterji stabbiliti fid-Direttiva 2013/34/UE (“fornituri żgħar ta’ klassifikazzjoni ESG”) jenħtieġ li jkunu jistgħu jibbenefikaw mir-reġim ta’ rikonoxximent. Meta fornitur ta’ klassifikazzjonijiet ESG stabbilit barra mill-Unjoni jkun soġġett għal superviżjoni f’pajjiż terz, jenħtieġ li jiġu stabbiliti arranġamenti ta’ kooperazzjoni xierqa sabiex jiġi żgurat l-iskambju effiċjenti ta’ informazzjoni mal-awtorità kompetenti rilevanti tal-pajjiż terz.

(28)

Il-kunċett ta’ stabbiliment jestendi għal kwalunkwe attività reali u effettiva eżerċitata permezz ta’ arranġamenti stabbli. Meta jkun qed jiġi ddeterminat jekk entità bbażata barra mill-Unjoni għandhiex stabbiliment fi Stat Membru, huwa pertinenti li jiġi kkunsidrat il-grad ta’ stabbiltà ta’ dawk l-arranġamenti, l-eżerċizzju effettiv tal-attivitajiet fl-Unjoni, u n-natura speċifika tal-attivitajiet ekonomiċi u s-servizzi pprovduti.

(29)

L-Unjoni tirrappreżenta wieħed mis-swieq ewlenin għall-klassifikazzjonijiet ESG. Hija wkoll waħda mill-ewwel ġuriżdizzjonijiet li rregolat it-trasparenza u l-integrità tal-klassifikazzjonijiet ESG. Jenħtieġ li l-Kummissjoni tkompli taħdem mas-sħab internazzjonali biex trawwem il-konverġenza tar-regoli li japplikaw għall-fornituri ta’ klassifikazzjonijiet ESG.

(30)

Sabiex jiġi żgurat livell għoli ta’ fiduċja tal-investituri u tal-konsumaturi fis-suq intern, jenħtieġ li l-fornituri ta’ klassifikazzjonijiet ESG li jipprovdu klassifikazzjonijiet ESG fl-Unjoni jkunu meħtieġa li jiġu awtorizzati. Għalhekk, jeħtieġ li jiġu stabbiliti kundizzjonijiet armonizzati għal tali awtorizzazzjoni u l-proċedura għall-għoti jew ir-rifjut, u s-sospensjoni jew l-irtirar ta’ tali awtorizzazzjoni. Jenħtieġ li l-fornituri ta’ klassifikazzjonijiet ESG awtorizzati jinnotifikaw lill-ESMA dwar kwalunkwe bidla materjali fil-kundizzjonijiet għall-awtorizzazzjoni inizjali tagħhom mingħajr dewmien żejjed. Bidla materjali tinkludi kwalunkwe ftuħ jew għeluq ta’ fergħa fl-Unjoni. Sabiex tipprovdi aktar ċarezza lill-fornituri ta’ klassifikazzjonijiet ESG, jenħtieġ li l-ESMA tispeċifika x’jikkostitwixxi bidla materjali billi toħroġ linji gwida għal dak l-għan.

(31)

Sabiex jiġi żgurat livell għoli ta’ informazzjoni lill-investituri u lil utenti oħrajn tal-klassifikazzjonijiet ESG, jenħtieġ li l-informazzjoni dwar il-klassifikazzjonijiet ESG u l-fornituri ta’ klassifikazzjonijiet ESG tkun disponibbli fuq il-Punt ta’ aċċess uniku Ewropew (ESAP) stabbilit bir-Regolament (UE) 2023/2859 tal-Parlament Ewropew u tal-Kunsill (10).

(32)

Sabiex jiġu żgurati l-kwalità u l-affidabbiltà tal-klassifikazzjonijiet ESG, jenħtieġ li l-fornituri ta’ klassifikazzjonijiet ESG jużaw metodoloġiji ta’ klassifikazzjoni li jkunu rigorużi, sistematiċi, indipendenti, u kapaċi li jiġu ġġustifikati u li japplikaw b’mod kontinwu u b’mod trasparenti. Jenħtieġ li l-fornituri ta’ klassifikazzjonijiet ESG jiġu mħeġġa jindirizzaw iż-żewġ aspetti tal-prinċipju ta’ materjalità doppja. Jenħtieġ li l-fornituri ta’ klassifikazzjonijiet ESG jirrieżaminaw il-metodoloġiji tal-klassifikazzjoni ESG fuq bażi kontinwa u mill-inqas kull sena, filwaqt li jqisu l-iżviluppi tal-Unjoni u dawk internazzjonali li jaffettwaw il-fatturi E, S jew G. Madankollu, huwa importanti li titħalla f’idejn il-fornituri ta’ klassifikazzjonijiet ESG stess id-determinazzjoni tal-metodoloġiji proprji tagħhom f’konformità ma’ dawk il-prinċipji.

(33)

Jenħtieġ li l-fornituri ta’ klassifikazzjonijiet ESG jiddivulgaw informazzjoni lill-pubbliku dwar il-metodoloġiji, il-mudelli u s-suppożizzjonijiet ewlenin tal-klassifikazzjoni li dawk il-fornituri jużaw fl-attivitajiet ta’ klassifikazzjoni ESG tagħhom u f’kull wieħed mill-prodotti ta’ klassifikazzjoni ESG tagħhom. Fid-dawl tal-użi tal-klassifikazzjonijiet ESG mill-investituri, jenħtieġ li prodotti ta’ klassifikazzjoni jiddivulgaw b’mod ċar liema dimensjoni tal-prinċipju ta’ materjalità doppja l-klassifikazzjoni tindirizza, jiġifieri jekk tinvolvix kemm ir-riskju finanzjarju materjali għall-element ikklassifikat jew għall-emittent tal-element ikklassifikat kif ukoll l-impatt materjali tal-element ikklassifikat jew tal-emittent tal-element ikklassifikat fuq l-ambjent u fuq is-soċjetà b’mod ġenerali, jew jekk tindirizzax wieħed biss minn dawk id-dimensjonijiet. Jenħtieġ li l-fornituri ta’ klassifikazzjonijiet ESG jiddivulgaw b’mod ċar ukoll jekk il-klassifikazzjoni tindirizzax dimensjonijiet oħrajn. Għall-istess raġuni, jenħtieġ li l-fornituri ta’ klassifikazzjonijiet ESG jipprovdu informazzjoni aktar dettaljata dwar il-metodoloġiji, il-mudelli u s-suppożizzjonijiet ewlenin tal-klassifikazzjoni lill-utenti tal-klassifikazzjonijiet ESG. Jenħtieġ li dik l-informazzjoni tippermetti lill-utenti tal-klassifikazzjonijiet ESG iwettqu d-diliġenza dovuta tagħhom stess meta jivvalutaw jekk għandhomx jiddependu fuq dawk il-klassifikazzjonijiet ESG. Madankollu, jenħtieġ li d-divulgazzjoni ta’ informazzjoni li tikkonċerna l-metodoloġiji, il-mudelli u s-suppożizzjonijiet ewlenin tal-klassifikazzjoni ma tiżvelax informazzjoni kummerċjali sensittiva u ma tfixkilx l-innovazzjoni. Il-fornituri ta’ klassifikazzjoni ESG jenħtieġ li jiddivulgaw ukoll jekk qisux il-fatturi E, S jew G, jew aggregazzjoni tagħhom, il-klassifikazzjoni mogħtija lil kull fattur rilevanti, u l-ponderazzjoni li kull wieħed minn dawk il-fatturi jkun ingħata fl-aggregazzjoni. Il-fornituri ta’ klassifikazzjoni ESG jenħtieġ li jiddivulgaw ukoll il-limitazzjonijiet tal-informazzjoni disponibbli għalihom u l-limitazzjonijiet tal-metodoloġija użata, bħal meta jivvalutaw biss waħda miż-żewġ dimensjonijiet tal-prinċipju ta’ materjalità doppja jew meta l-klassifikazzjoni ESG tiġi espressa f’valur assolut jew relattiv. Huma jenħtieġ ukoll li jiddivulgaw informazzjoni dwar kwalunkwe involviment possibbli ma’ partijiet ikkonċernati tal-element ikklassifikat jew tal-emittent tal-element ikklassifikat.

(34)

Biex jiġi żgurat livell suffiċjenti ta’ kwalità, huwa rrakkomandat li l-klassifikazzjonijiet ESG iqisu l-objettivi tal-Unjoni u l-istandards internazzjonali għal kull fattur.Għaldaqstant, jenħtieġ li l-fornituri ta’ klassifikazzjonijiet ESG jipprovdu informazzjoni dwar jekk il-klassifikazzjoni ESG tqisx, fost oħrajn, il-miri u l-objettivi tal-ftehimiet internazzjonali rilevanti, inkluż dawk fil-Ftehim ta’ Pariġi adottat fl-ambitu tal-Konvenzjoni Qafas tan-Nazzjonijiet Uniti dwar it-Tibdil fil-Klima (il-“Ftehim ta’ Pariġi”) approvat mill-Unjoni fil-5 ta’ Ottubru 2016 (11) għall-fattur E, il-konformità mal-konvenzjonijiet ewlenin tal-Organizzazzjoni Internazzjonali tax-Xogħol dwar id-dritt għall-organizzazzjoni u n-negozjar kollettiv għall-fattur S, u l-allinjament mal-istandards internazzjonali dwar l-evażjoni u l-evitar tat-taxxa għall-fattur G.

(35)

Ir-Regolament (UE) 2019/2088, ir-Regolament (UE) 2020/852 tal-Parlament Ewropew u tal-Kunsill (12) u d-Direttiva (UE) 2022/2464 tal-Parlament Ewropew u tal-Kunsill (13) jirrappreżentaw inizjattivi leġiżlattivi deċiżivi biex jitjiebu d-disponibbiltà, il-kwalità u l-konsistenza tar-rekwiżiti ESG tul il-katina tal-valur sħiħa ta’ parteċipanti fis-suq finanzjarju, li jikkontribwixxu għat-titjib tal-kwalità tal-klassifikazzjonijiet ESG.

(36)

Jenħtieġ li dan ir-Regolament ma jinterferix mal-metodoloġiji tal-klassifikazzjoni ESG jew mal-kontenut tal-klassifikazzjonijiet ESG. Id-diversità fil-metodoloġiji tal-fornituri ta’ klassifikazzjoni ESG tiżgura li jkunu jistgħu jintlaħqu r-rekwiżiti wesgħin tal-utentital-klassifikazzjonijiet ESG u tippromwovi l-kompetizzjoni fis-suq.

(37)

Filwaqt li fornitur tal-klassifikazzjoni ESG jenħtieġ li jkun jista’ juża l-allinjament mat-tassonomija stabbilita fir-Regolament (UE) 2020/852 bħala fattur rilevanti jew indikatur ewlieni tal-prestazzjoni fil-metodoloġija tal-klassifikazzjoni tiegħu, il-klassifikazzjonijiet ESG fil-kamp ta’ applikazzjoni ta’ dan ir-Regolament jenħtieġ li ma jitqisux tikketti ESG li jindikaw jew jiggarantixxu l-konformità jew l-allinjament mar-Regolament (UE) 2020/852 jew ma’ kwalunkwe standard ieħor.

(38)

Jenħtieġ li l-fornituri ta’ klassifikazzjonijiet ESG jiżguraw li jipprovdu klassifikazzjonijiet ESG li jkunu indipendenti, imparzjali, sistematiċi u ta’ kwalità adegwata. Huwa importanti li jiġu introdotti rekwiżiti organizzazzjonali li jiżguraw il-prevenzjoni u l-mitigazzjoni ta’ kunflitti ta’ interess potenzjali. Sabiex tiġi żgurata l-indipendenza tagħhom, jenħtieġ li l-fornituri ta’ klassifikazzjonijiet ESG jevitaw sitwazzjonijiet ta’ kunflitt ta’ interess u jimmaniġġaw tali kunflitti b’mod adegwat meta dawn ikunu inevitabbli. Jenħtieġ li l-fornituri ta’ klassifikazzjonijiet ESG jiddivulgaw il-kunflitti ta’ interess fil-ħin. Jenħtieġ li jżommu wkoll rekords tat-theddid sinifikanti kollu għall-indipendenza tagħhom u dik tal-impjegati tagħhom u ta’ persuni oħrajn involuti fil-proċess ta’ klassifikazzjoni, u tas-salvagwardji applikati biex jittaffa’ dak it-theddid. Barra minn hekk, sabiex jiġu evitati kunflitti ta’ interess potenzjali, jenħtieġ li l-fornituri ta’ klassifikazzjonijiet ESG ma jitħallewx joffru mill-istess entità għadd ta’ attivitajiet oħrajn, inklużi servizzi ta’ konsulenza, klassifikazzjonijiet tal-kreditu, parametri referenzjarji, attivitajiet ta’ investiment, awditjar, jew attivitajiet tal-istituzzjonijiet ta’ kreditu, tal-assigurazzjoni u tar-riassigurazzjoni. Fl-aħħar nett, sabiex jiġi evitat, identifikat, eliminat jew immaniġġat u ddivulgat kwalunkwe kunflitt ta’ interess u sabiex jiġu żgurati f’kull ħin il-kwalità, l-integrità u r-reqqa tal-proċess ta’ klassifikazzjoni u rieżami ESG, jenħtieġ li l-fornituri ta’ klassifikazzjonijiet ESG jistabbilixxu politiki u proċeduri interni xierqa b’rabta mal-impjegati u ma’ persuni oħrajn involuti fil-proċess ta’ klassifikazzjoni. Jenħtieġ li tali politiki u proċeduri, b’mod partikulari, jinkludu mekkaniżmi ta’ kontroll intern u funzjoni ta’ sorveljanza.

(39)

Sabiex jiġu indirizzati r-riskji ta’ kunflitti ta’ interess, jenħtieġ li xi attivitajiet jiġu offruti minn entitajiet legali separati. Madankollu, xi wħud minn dawk l-attivitajiet jistgħu jiġu offruti mill-istess entità ġuridika meta l-fornitur ta’ klassifikazzjoni ESG kkonċernat jkollu biżżejjed miżuri u proċeduri fis-seħħ biex jiżgura li kull attività tiġi eżerċitata b’mod awtonomu u biex jiġi evitat li jinħolqu riskji potenzjali ta’ kunflitti ta’ interess fit-teħid ta’ deċiżjonijiet fl-attivitajiet ta’ klassifikazzjoni ESG tagħha. Jenħtieġ li tali deroga ma tkunx possibbli għal attivitajiet ta’ klassifikazzjoni tal-kreditu u għal attivitajiet ta’ awditjar u konsultazzjoni. L-attivitajiet ta’ konsultazzjoni jinkludu l-iżvilupp ta’ strateġiji ta’ sostenibbiltà u strateġiji għall-immaniġġar tar-riskji jew tal-impatti għas-sostenibbiltà. Fir-rigward tal-attività tal-provvista tal-parametri referenzjarji, l-ESMA jenħtieġ li tivvaluta jekk il-miżuri proposti mill-fornitur ta’ klassifikazzjonijiet ESG humiex xierqa u suffiċjenti fir-rigward tar-riskji potenzjali ta’ kunflitt ta’ interess. Tali valutazzjoni jenħtieġ li tqis jekk l-amministratur tal-parametru referenzjarju joffrix parametri referenzjarji li jsegwu objettivi ta’ sostenibbiltà u b’mod partikolari Parametri Referenzjarji tat-Tranżizzjoni Klimatika tal-UE u Parametri referenzjarji tal-UE allinjati mal-Ftehim ta’ Pariġi f’konformità mar-Regolament (UE) 2016/1011 tal-Parlament Ewropew u tal-Kunsill (14).

(40)

Il-fornituri ta’ klassifikazzjonijiet ESG jenħtieġ li jiżguraw li l-impjegati taħghom u persuni oħra involuti fil-proċess ta’ klassifikazzjoni ma jipparteċipawx fid-determinazzjoni ta’ klassifikazzjoni ESG ta’ kwalunkwe element kklassifikat, jew jinfluwenzawha b’xi mod ieħor, jekk ikun hemm kwalunkwe evidenza ta’ awtorieżami, interess personali, promozzjoni, jew familjarità li jirriżultaw minn relazzjonijiet finanzjarji, personali, kummerċjali, ta’ impjieg jew oħrajn bejn dawk il-persuni u l-element kklassifikat jew l-emittenti tal-element kklassifikat, li b’riżultat tagħhom parti terza oġġettiva, raġonevoli u infurmata, filwaqt li tqis is-salvagwardji applikati, tikkonkludi li l-indipendenza ta’ dawk il-persuni hija kompromessa. Jekk, matul il-perjodu li fih l-impjegati tal-fornituri ta’ klassifikazzjonijiet ESG jew persuni oħra involuti fil-proċess ta’ klassifikazzjoni jkunu parti mill-attivitajiet ta’ valutazzjoni, element kklassifikat jew emittent ta’ element kklassifikat tiġi fuża ma’ entità oħra jew takkwista entità oħra, jenħtieġ li dawk il-persuni jidentifikaw u jevalwaw kwalunkwe interess jew relazzjoni attwali jew reċenti li, filwaqt li jitqiesu s-salvagwardji disponibbli, jistgħu jikkompromettu l-indipendenza u l-kapaċità ta’ dawk il-persuni li jkomplu jkunu involuti fl-attivitajiet ta’ valutazzjoni wara d-data effettiva tal-fużjoni jew tal-akkwiżizzjoni.

(41)

Biex ikun hemm aktar ċarezza u tissaħħaħ il-fiduċja fir-rigward tal-operazzjonijiet tal-fornituri ta’ klassifikazzjonijiet ESG, huwa meħtieġ li jiġu stabbiliti rekwiżiti għas-superviżjoni kontinwa tal-fornituri ta’ klassifikazzjonijiet ESG fl-Unjoni. Fid-dawl tas-similaritajiet sinifikanti bejn l-attivitajiet tal-aġenziji ta’ klassifikazzjoni tal-kreditu u dawk tal-fornituri ta’ klassifikazzjonijiet ESG, l-allinjament mill-qrib relatat tal-aspetti ċentrali tal-qafas regolatorju għall-fornituri ta’ klassifikazzjonijiet ESG mal-qafas regolatorju għall-aġenziji ta’ klassifikazzjoni tal-kreditu skont ir-Regolament (KE) Nru 1060/2009 tal-Parlament Ewropew u tal-Kunsill (15), u sabiex jiġu żgurati l-applikazzjoni armonizzata ta’ dan ir-Regolament kif ukoll is-superviżjoni uniformi, huwa meqjus rakkomandabbli, meta titqies id-deċiżjoni meħuda skont ir-Regolament (KE) Nru 1060/2009 li s-superviżjoni tiġi fdata lill-ESMA, li s-superviżjoni tal-fornituri ta’ klassifikazzjonijiet ESG tiġi fdata wkoll lill-ESMA. Il-fatt li dan ir-Regolament jafda is-superviżjoni lill-ESMA ma jikkostitwixxix preċedent u jenħtieġ li ma jiġix interpretat bħala li jistabbilixxi prattika jew politika dwar l-attribuzzjoni ta’ responsabbiltajiet superviżorji fis-settur tas-servizzi finanzjarji.

(42)

Minbarra l-użu tagħhom fis-settur tas-servizzi finanzjarji, il-klassifikazzjonijiet ESG jintużaw ukoll fil-kuntest tal-akkwist u tal-katina tal-provvista. Għalhekk jenħtieġ li, fis-superviżjoni tagħha tal-fornituri ta’ klassifikazzjonijiet ESG, l-ESMA tqis id-distinzjoni bejn il-fornituri ta’ klassifikazzjonijiet ESG fis-setturi tas-servizzi finanzjarji u dawk fis-setturi tas-servizzi mhux finanzjarji.

(43)

Jenħtieġ li l-ESMA tkun tista’ titlob l-informazzjoni kollha meħtieġa biex twettaq il-kompiti superviżorji tagħha b’mod effettiv. Għalhekk jenħtieġ li tkun tista’ titlob tali informazzjoni mingħand il-fornituri ta’ klassifikazzjonijiet ESG, il-persuni involuti f’attivitajiet ta’ klassifikazzjoni ESG, l-elementi kklassifikati u l-emittenti ta’ elementi kklassifikati, partijiet terzi li lilhom fornituri ta’ klassifikazzjonijiet ESG jkunu esternalizzaw funzjonijiet jew attivitajiet operattivi, persuni li b’xi mod ieħor huma relatati jew konnessi mill-qrib u sostanzjalment ma’ fornituri ta’ klassifikazzjonijiet ESG jew ma’ attivitajiet ta’ klassifikazzjoni ESG, u rappreżentanti legali nominati taħt ir-reġim ta’ rikonoxximent.

(44)

Jenħtieġ li l-ESMA tkun tista’ twettaq il-kompiti superviżorji tagħha, u b’mod partikolari tkun tista’ ġġiegħel lill-fornituri ta’ klassifikazzjonijiet ESG biex itemmu ksur, jipprovdu informazzjoni kompluta u korretta, jew jissottomettu ruħhom għal investigazzjoni jew spezzjoni fuq il-post. Biex jiġi żgurat li tkun tista’ twettaq dawk il-kompiti superviżorji, jenħtieġ li l-ESMA tkun tista’ timponi multijew pagamenti perjodiċi ta’ penali.

(45)

Minħabba r-rwol tagħha bħala l-awtorità tal-Unjoni li tawtorizza u tissorvelja l-fornituri ta’ klassifikazzjonijiet ESG, jenħtieġ li l-ESMA tiżviluppa abbozzi ta’ standards tekniċi regolatorji u tippreżentahom lill-Kummissjoni. Jenħtieġ li l-ESMA tispeċifika aktar l-informazzjoni meħtieġa għall-awtorizzazzjoni tal-fornituri ta’ klassifikazzjonijiet ESG. Jenħtieġ li l-Kummissjoni jkollha s-setgħa li tadotta dawk l-istandards tekniċi regolatorji permezz ta’ atti delegati skont l-Artikolu 290TFUE u f’konformità mal-Artikoli 10 sa 14 tar-Regolament (UE) Nru 1095/2010.

(46)

Meta tawtorizza u tissorvelja l-fornituri ta’ klassifikazzjonijiet ESG, jenħtieġ li l-ESMA tkun tista’ titlob lill-entitajiet taħt superviżjoni tariffi superviżorji. Jenħtieġ li dawn it-tariffi jkunu proporzjonati u xierqa għad-daqs tal-fornituri ta’ klassifikazzjonijiet ESG u sal-punt tas-superviżjoni tagħhom.

(47)

Sabiex jiġu speċifikati aktar l-elementi tekniċi ta’ dan ir-Regolament, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-TFEU fir-rigward tal-ispeċifikazzjonijiet tal-proċedura biex jiġu imposti multi jew pagamenti perjodiċi ta’ penali, inklużi dispożizzjonijiet dwar id-drittijiet ta’ difiża, dispożizzjonijiet temporali, dispożizzjonijiet dwar il-ġbir ta’ multi jew pagamenti perjodiċi ta’ penali, u regoli dettaljati dwar il-perjodi ta’ limitazzjoni għall-impożizzjoni u l-infurzar ta’ multi jew pagamenti perjodiċi ta’ penali u fir-rigward tat-tip ta’ tariffi, il-kwistjonijiet li għalihom huma dovuti t-tariffi, l-ammont tat-tariffi, u l-mod li bih għandhom jitħallsu dawk it-tariffi. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (16). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(48)

Huwa meħtieġ li jkun hemm fis-seħħ għadd ta’ miżuri li jappoġġaw fornituri żgħar ta’ klassifikazzjonijiet ESG biex ikunu jistgħu jkomplu l-attivitajiet tagħhom, jew jidħlu fis-suq wara d-data tal-applikazzjoni ta’ dan ir-Regolament. F’dak l-isfond, jenħtieġ li jiġi introdott reġim temporanju biex jiffaċilita d-dħul fis-suq ta’ fornituri żgħar ta’ klassifikazzjonijiet ESG u jappoġġa l-iżvilupp ta’ fornituri żgħar eżistenti ta’ klassifikazzjonijiet ESG li diġà joperaw fl-Unjoni qabel id-dħul fis-seħħ ta’ dan ir-Regolament. Skont dak ir-reġim temporanju, il-fornituri żgħar ta’ klassifikazzjonijiet ESGjenħtieġ li jirreġistraw mal-ESMA, mingħajr il-ħtieġa li jingħataw awtorizzazzjoni biex joperaw fl-Unjoni, u jenħtieġ li jkunu soġġetti biss għad-dispożizzjonijiet ta’ dan ir-Regolament dwar ir-rekwiżiti organizzazzjonali u ta’ trasparenza. Jenħtieġ li l-ESMA jkollha s-setgħa li titlob informazzjoni u li twettaq investigazzjonijiet ġenerali u spezzjonijiet fuq il-post kif ukoll li tadotta miżuri amministrattivi. Jenħtieġ li l-ESMA tiżgura li r-riskji ta’ ċirkomvenzjoni ta’ dan ir-Regolament jiġu evitati, b’mod partikolari billi jiġi evitat li impriżi żgħar fi gruppi ta’ daqs medju jew kbar skont il-kriterji stabbiliti fid-Direttiva 2013/34/UE jibbenefikaw mir-reġim temporanju. Ladarba jintemm ir-reġim temporanju, il-fornituri żgħar ta’ klassifikazzjonijiet ESG jenħtieġ li japplikaw għall-awtorizzazzjoni biex joperaw fl-Unjoni u jibbenefikaw mir--rekwiżiti ta’ governanza proporzjonati, utariffi superviżorji proporzjonati mal-fatturat nett annwali tal-fornitur ta’ klassifikazzjonijiet ESG ikkonċernat.

(49)

Meta element, emittent ta’ element jew investitur ifittxu klassifikazzjoni ESG mingħand tal-inqas żewġ fornituri ta’ klassifikazzjonijiet ESG, dawn jistgħu jqisu li jaħtru mill-inqas fornitur ta’ klassifikazzjonijiet ESG wieħed b’sehem mis-suq għal attivitajiet tal-klassifikazzjonijiet ESG ta’ mhux aktar minn 10 % fl-Unjoni.

(50)

Minħabba li l-objettiv ta’ dan ir-Regolament, jiġifieri li jistabbilixxi reġim konsistenti u effettiv biex jiġu indirizzati n-nuqqasijiet u l-vulnerabbiltajiet li joħolqu l-klassifikazzjonijiet ESG, ma jistax jinkiseb b’mod suffiċjenti mill-Istati Membri, iżda jista’ pjuttost, minħabba l-iskala u l-effetti, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-objettiv.

(51)

Dan ir-Regolament japplika mingħajr preġudizzju għall-applikazzjoni tal-Artikoli 101 u 102 tat-TFUE.

(52)

Il-Bank Ċentrali Ewropew ta l-opinjoni fuq inizjattiva proprja tiegħu fl-4 ta’ Ottubru 2023,